Prologue (deuh reuh, ni chiah lo)
Damdawi in khuma an rawn nawr luh mek mipa chu ka pan hnai ve thuai a, sawisakna hnuhma tih hriat takin chu pa hmai leh hnar te chu a thi hnuang mai bawk a, emergency room a kan nawr luh dawn chuan mipa naupang pakhat hian ka kawr tlangah lo manin "Tidam leh ngei ngei rawh aw" a lo ti reuh a, a mittui a tling par bawk, a Tu pawh chu ni se he naupang tan hian a pawimawh viau a nih ka ring.
____
"Zodingliana, mipa tihmawh leh sual tawrawt lutuk kha ka duh i ring em ni a, khawvelah hian amah chauh kha mipa pawh awm se ka duh chuanglo ang."
____
"Min duh let ve theihna tur a nih phawt chuan engpawh ka ti ang, a tul a nih chuan ka kawng daltu chu ka dahtha hreh lo."
___
"Phatsantu i nih kha, engtikah mah ka ring leh tawh ngai lo ang che, min kalsan rawh."
___
"Nang leh kei chu hlim dun tura ruat kan ni lo ani ang!"
____
"Pathian dem suh, Pathian rawng ni lo va kohhran rawng bawl thin i nu leh pate kha dem zawk rawh"
___
**KOHHRAN kan sawi lan avang hian inhnialna tam tak a awm theih ka ring a, mahse hei hi thawnthu mai a ni tih min hriatsak ula ka duh. A tak ang thei ber tura duan kan duh theuh a, hetiang thil hi thil thleng ngai lo pawh a nih bik loh kha maw?? **
TRAITOR
By Ziki nu
Chapter-1
"Kan street fighter chu eng nge a an a Awmawm? Nizan lamte a mu thei maw?" tia ka bulah rawn thuin a coffee rawn ken chu min pe ve thuai a,
"Mu thei aniang, a che ein lo" ka tih chuan lo nui hakin, "Khatiang hliamte kha chu a tawrh zin hmel emai, engah vak a ngai teuh lo" a ti liam puat a, a phone a en zui ta bawk nen keipawhin ka sawi zawm tawh lem lo.
Ka thiannu Gracy hi nurse ve tho a ni a, veng khatah awm lo mah ila tette atanga inhria leh inkawm chho kan ni a, zirna lamah pawh kan kal rual zel a, tuna kan thawhna damdawi in ah hian kei aiin a thawk hmasa hret a, mahse tunah chuan keipawh kum 4 dawn chu ka thawk ve leh tawh.
Ka nu in min boralsan hnu lawkah ka pa in nupui dang a nei leh a, nuhrawn sual tak hrawn ka in rin laiin ka pa nupui chu ka lakah a tha em em reng a, a tirah han hel ve viau mah ila ka haw reng thei bik lo.
Unau pianpui ka nei lo va, ka pa nen fa an nei leh tawh lo bawk a, a fa bik, Jayden Lallawmawma nen erawh unau piang hmun ang maiin kan awm thei a, kan in khak zing viau thung.
Rawlthar tir, kum 19 chauh a la ni a, tleirawl sual neia buaipui hrep ngaia a awm ka hlauh avangin ka khuahkhirh viau zel a, ka zilhhau ve fo bawk, mahse a sawt mawh khawp mai.
Kan chhungkua chu chutih zawng chu kan nih avangin kan felfai thawkhat viau a, ka nu leh pate kohhram lamah an inhmang ve bawk nen keimahni tawk theuhah kan buai ve viau hlawm a, ka pa pension hlawha chhungkua kan la inenkawl theih bakah ka nu hian phai lam atangin puan a chah thleng thin a, chung a hralhna te nen chuan chhungkaw khawsak harsa tak kan ni hran lo.
Keimah ka inchawm theih chuan tiin ka nu leh pa te pawhin ka hlawh chu min dil ngai lo va, theih ang anga khawl zel tur in min ti thin.
"Nurse Awmawmi kha a awm chuan nizana tlangval hliam i buaipui khan a hmu duh che aw" tia kan thawhpui pakhatin min rawn hrilh chuan ka thiannu chu ka melh vat a, zing dar 6 a ri chauha la mut ve mai mai tur alawm ti rilru nauh nauh chungin ka tho zui ve mai bawk.
Ward ka thlen phei chuan khumah a lo thu luau tawh a, a pa lianin a hmel chu a nelawm loh bawk nen phur lo deuh in ka pan phei a,
"I lo harh tawh maw? Eng nge i hliamte chu a an a?" tiin ka nuih lui sang a, min chhang mai lo va min en rengte chuan ka tiril a fan a, ka mur sung sung thei hialin ka hria.
"Thianpa?"
Ka tih leh takah chuan a kut chu rawn lek vutin "Phelh vat teh, ka hmanhmawh" a ti hmuk a, a kuta venflon invuah chu a melh ngur bawk.
"Chuti maiin i chhuak thei hleinem, i hliam pawh.. "
ka sawi zo hman lo, a mitmeng thip leh sen rûma min en rual chuan ka tawng chu ka tawp chawt a, hetiang reng renga mihring nelawm lo hi ka la hmu lo.
Thawk ka la ru suai suai a, "I chhungte an lo kal dawn em?" tiin ka zawt nawn ve leh ngat a, damlo enkawltu zawk ka nihna laiah pawh zam anga lan chu ka duh bik lo a ni.
Thaw hawkin a kut chu a la let leh vut a, a lu chu dawmin a then zui sawk bawk.
"Hmanhmawh viau mah la doctor lo thlen hma chu i chhuak thei lo ang, nizana lo hruaitu che kha i pa nge nia i pu zawk? Mipa naupang pakhatin a rawn zui ve bawk a, mahse i harh chhuah lawk loh avang leh a tlai deuh tawh avangin naupang kha haw pui mai turin kan ti a nih kha, an lo ngaihven leh mai ang che" ka ti chu hre âwm pawhin a lang lo.
"Khaw maw" tih leh pahin a hmai duk lai chu en sak ka tum a, ka kut chu lo man lawkin min phih dawr a, a chet duh dan mai mai chu ka ngaihdan a ni ta bik lo.
"Ngaithla rawh thianpa, helai hmun hi dam lo enkawlna hmun a nih hi, khawlai mai mai emaw ti miah suh, doctor rawn kal hunah chhuah chu i dil dawn nia" toh leh kalsan ka rual a, kei aia upa bik hauhlo tur hmel pu in min zahlo lutuk kha ka duh lo.
Zahawmna hi ka ngaihlu a, inngaihsak tawnna leh mihring inzah tawnna hian khawsakho pawh a tinuam thin.
Tunlai thangtharte hian aia upa zah nachang an hre ta lo lutuk a, an khawvel chen duhdan lahin Pathian thu a hlat hlawm bawk si, fel bik lua lo mah ila hengte avang hian ania ka unaupa lakah pawh ka khirh viau ni.
"Eng nge a lo an a?" common room ka thlen ruala ka thiannuin a lo tih chuan "A na vak lo aniang, min melh rum thei emai" tiin za vaklo hian ka nui a, ka thuamhnaw la in inthlak turin ka kaltlang nghal bawk.
"Ka hawsan ang che aw, vawiin chu inrinni a ni bawka nilengin ka mu dawn" ka bag ak tha mawlh mawlh pah chuan ka ti a, Dr. Ramkima lo lut ve chiah chuan ka thilsawi kha a lo hre pha a niang "Mu nileng ngei ngei ang che" a rawn ti lut a, hlim takin kan inthlah hlawm a, ka scooty dahna ka thlen chuan nur nangin thawk ka la halh mai. Kan damdawi inah hian khawlai zawhte hi an tam lutuk a, scooty seat ah an ke tereuhte thla hi a lo lang leh kalh zel.
Ka hruk fai laia damdawi in canteen kawta ka mi hmuh chu ka hmuh sual emaw tiin ka en nawn leh ngat a, ka hmu suallo nasa mai, a kutah venflon a invuah tawh lo a, a lu an vuakna kan bel var lûk leh a mitko duk phei ruih erawh a reh mai mai tawh lo ang.
Min rawn hmu ve tih ka hriat rual chuan hawi sawn vatin scooty ah chuan ka thu kai rawk rawk a, ka tlan chhuak zui nghal bawk.
Kan in leh ka thawhna damdawi in hi a hlat tham deuh avangin tlan chhung a rei a, traffic a jam loh pawhin minute 20 vel tlan a ni hrim hrim.
Kan kawtah chuan bike leh scooty a lo ding leh thluah tawh a, ka naua thiante bawk an ni leh ang chu.
Inchhung ka luh rual chuan tawng nak nak thawm chu a reh zui hmak a, "A lo haw hman ka ti" tia choka lam atanga Jaydena'n a rawn tih velah sitting rooma a thianteho chu an lo nui leh huk a, mahse an nui rei ngam lo.
"Lallawmawm, zingkar karah eng nge tih in tum leh tak?" tih pahin choka lamah chuan ka phei ve nghal a, tiffin lian zetah khu vut vutin chaw a lo khawrh mek.
"Kan tent out dawn, a hma pawn ka sawi tawh kha" tiin chaw chu a la khawrh belh zel a, ka lo chek tlak tlak chu melh pawh min melh duh lovin "Ka thiante ka pai kep" a la ti zui a, khawiah nge maw ka pa te pawh hi an awm ni.
"Khawiah nge midang?" ka tih chuan "Ka pa zing tawngtai inkhawm a lo la haw lo, ka nu chu huanah a kal lawk" a ti ve mai a, chaw chu a duhtawk a khawrh tawh aniang chu dawhkanah a nghat chawrh a, an chaw pai ringawt pawh chu rih tham a ni.
Lallawmawma hi chuan hetiang hian a ti ve ziah, ka phalloh thu ka sawi pawhin phal loh theih lohin a thiante a insawm tir huk zel.
Sitting room lamah phei lehin a thiante chu ka en kual dan dan a, ka hmuh than tak takte vek an ni hlawm.
"Khawiah maw in tent out dawn Sawma?" ka tih chuan "Sialsuk tlangah, mahse tent out tihah, kan riak dawn lo naktuk Sunday a ni sia" a lo ti vat a, Pathian ni inkhawm ka ngaihpawimawh thinzia an hre chiang hlawm bawk a, a insawikhalh ni berin ka hria.
"Va fimkhur ang che u, chetsualte a hlauhawm ania, rim dang in rawn nam haw vaih chuan in chak lo ngawt ang" tiin ka vau lawk bawk a, thuawih hmel takin lu chu an bu ve tliar tliar tho.
Rawlthar nun hmang chho mek an ni hlawn a, khaw lo taka an nun an hman ka hlauh avangin hauh pawh ka hau nasa thin a, an haw ngai lem lo na in an zawm meuh chuang lo.
"E... I lo thleng der a ni maw Bawihi, tukin chu ka hmanhmawh lo a, I duh chuan han mu leh rih rawh" ka nu huan lut rawn let leh chuan an rawn ti lut bawrh bawrh a, "Awi aw... Lawmawm, chaw pai len i va tum em em ve" choka a luh ve rualin a ti nghal thawt bawk, a thiante chu an lo nui ru tat tat hlawm a, keipawh ka nui ve tho.
Ka naua rawn phei ve hnu chuan an zinga upa ber leh tê ber Zarzova pui roh chuan "U Awmawm, kan kal hma in tawngtaina min hmansak la" a lo ti khauh a, a thianten an lo sawi zawm ve nak nak bawk nen tawngtaina chu ka hmansak a, an kal tur kan invai liam hnuah mu turin pindan lam ka pan nghal a, khum ka deh rual deuh thaw chuan ka muhil nghal ni berin ka hria.
"Min chhuah vat rawh misualpa" tiin min phuar behna chair atanga tal chhuah tum chuan ka tal fat fat a, ka hmaa mipa ruangâm lian zet mai, hreipui keng chunga min rawn pan hnaitu chu thei leh thei lovin ka melh tawk tawk bawk a, amah kha a ni.
"Damdawi inah khan i inla huai viau a ni lawm ni khah?" tih pahin ka khabe ah min kuai dâk awrh a, kan awmna hmun thim khup leh a hmel landan rapawm lutuk vangte chuan ka tha a khur a, chhan let ka tum chu ka tawng chhuak thei der lo.
A hreipui ken chu a rawn lek kang riai riai a, ka tawng chhuah theih mai loh avangin ka lu thing chung chuan ti lo turin ka tawngtai mawlh mawlh a, "Hremhmunah kal rawh" tih chu a thusawi ka hriat tawp ber a ni.
Ka au chhuak tuar a, mit ka men rualin ka nu hmel ka hmu hmasa ber bawk.
"Eng nge ni a? Mang tha lo i mang em ni" tiin ka khum tlangah chuan a rawn thu kai a, chhang lovin ka khum sir dawhkana tui bottle chu ka ban a, ka lem zui khawlh khawlh mai.
Ka kawr hak pante chu ka taksa ah a bet thlur a, ka nu in min en reng vang chuan "Tha lo lutuk" tih zawngin ka chhang a,sawi zawm pawh ka chak lo.
"Chaw in ei tawh em ni, dar engzat nge ni tawh a?" tih paha ka phone ka en chuan "Ehe.. " ka ti leh hluai a, chaw ei loh a hun tawh lo reng reng.
Dar 11 a pel thui tawh a, 12 a ri tep tawh zawk.
"I pa'n kaitho duh suh a ti a nih kha, in phih harh la, khu, Michaela pawh a awm khu" tiin ka nu chuan min chhuahsan a, ka mutna te siamin ka inthlak hmasa leh tete a, inhnuaia ka chhuk rualin sitting room lama ka pa leh Michaela lo titi mawlh mawlh chu ka hmu nghal a, min rawn hmuh ve rualin ban a rawn vai zauh a, "Eng nge chhun chhunahte i rawn kal a, a van pawimawh âwm em em" tih pahin an bulah chuan ka thu thla ve nghal a,
"In thenawmah sawn ka kal a, ka rawn peng kawi mai mai, nizan lam in va buai âwm ve" a tih chuan message ka la en lo tih ka hre chhuak ve leh chiah a, a zia lo thin khawp mai.
"Nia, emergency kan nei a, I hmanhmawh em? Thingpui in ang aw" ka ti chu ka pa zawkin min lo chhang a, "Chaw va ei rawh u, kha Michaela pawh khan zing chaw ka la ei lo a tih kha, chawhmeh kha chhuan lum a ngai tawh hlawm ang" a lo ti khauh a "I la ri lo maw?" tia ka thianpa ka melh chuan lu lo thingin "Ka pa duty tur ka thlah a, ka ei lo law law" min nuih vur vur chungin a lo ti mai a.
"Va ei rawh u, chaw ei hi a hrisel ber" ka pa'n a lo tih leh takah chuan choka lamah kan inzui phei a, Michaela nen hian kan inzui ve nasa a, kan ina chaw ei pawh zahah a la duh tawh biklo.
Veng khatah kan awm a, Pentecostal kohhran chhungkua atanga sei lian ve ve kan ni bawk a, PYD lamah pawh kan inhmang dun zel a, Gracy tih loha ka thian kawm ber ti ila a dik ang.
"Lo thu rawh, ka'n ti lum zung zung ang" tih pahin chawhmeh thing ho chu gas ah ka chhuang kai a, eng eng emaw sawiin kan titi ve luam tak naa, ka mumang leh nizan lam thilthleng mawlh khan rilru a la luah a, mumangah takngial pawh khapa hmel kha chu hmuh nawn leh ka duh tawh lo.
.....
Hringnun hi kan duhdan vekin a kal thei lo a, kan ruahmanna leh duhthusam ang hian a thleng vek lo thin.
Mihring ve tho ka ni a, hmeichhia ka ni.
Ka hmeichhiatpui dangte ang bawkin suangtuahna ka nei ve a, hlawhtlin ka duh a, chhungkaw hlim tak din ve pawh ka duh.
Mahse hmangaihna lamah hian ka tluanglo a, ka duhthusam hna thawkin chhungkaw pangngai tak nei mah ila khawhar rukna hi ka nei ve fo thin.
Nula kum 30 ral kai tawh, thiante leh chhungkhat lainaten nula senior tia an fiam rawn, thenawm khawvengte pawhina 'pasal nei tawh rawh' an tih rawn sek tawh ka ni a, chuti maiin pasal tur ka hmu bik bawk si lo.
Thenkhat hi chuan puitling viau tawh turah te min han ngai ngawt a, kan kum zat a kal zung zung ang hian kan rilru lam a kal zung zung ve lo lai hi a buaithlak.
Ka lo tawn tawh leh paltlang tawhte atangin inzir ve zel mah ila puitlin tak tak erawh a har a ni.
Ka hna hi a awlsam lo va, chhun leh zanah kan in duty chhawk reng a, kohhran leh khawtlangah pawh duh angin ka inhmang tam ve thei lo.
Chuti chung chuan kohhran lamah rawngbawlna chanvo eng eng emaw hi ka nei ve reng tho a, ka theih leh tlin tawk baka min lo beiseitute tan erawh ka ninawmin ka hnawk ru ve viau thin ang.
Thawhtan ni tûka ka duty tur chu ka tlan loh ni a nih avangin ka nau in min thlah a, zing dar 9 atanga tlai dar 6 thleng ka shift neih hun a nih bakah Jaydena school kal ve tho a ngaih avangin hma deuhah kan chhuak a,
"Bialpa chu nei la hma deuh deuha ka thawh ve ziah hi a ngai lovang maw le" tutu chu ner khum nangin, "Tuktin ka ngaihthawh nghal loh che" ka ti a, kawng tluanin kan inhau phei a ni ber.
Min hnialin tawng zawt zawt thin mah se han tirh hi chuan thuawih deuh hian a ti ve mai thin a, unau pianghmun ang tak takin kan khawsa a tih theih ang chu.
Damdawi in kawt kan thlen rualin ka chhuk vat a, dar 8 a la pel thui lo.
Ka naua lah chuan "Ka thlah man che ei tur min lei thei" a la ti zui a, "Kal nal nal rawh, in i thleng anga chaw in ei nghal dawn" ka tih pawhin a ding tlat a, a tawngtheih bakah a luhlul lutuk hi a buaithlak thin.
In tur leh momo ka leisak hnu chuan nui vur vurin a tlan haw a, chu tih laia ka phone rawn ri chu ka phawrh chhuak sawk sawk a, Gracy a ni.
Ka chhan rual chuan " I thleng tawh em?" A lo ti nghal zat a, ka thlen chiah thu ka sawi laia a lo thaw halh chu ka hre thei.
"Zanin chu min lo kep leh lawk thei ang em le?"Inthlahrun hmel deuha a Io tih chuan a chhan ka lo zawt let thuai a, a sawi hreh deuh nge mawni a riat nawi niah niah reng a, " Rinhlupuia nen in leng leh tawh dawn em ni a?" ka lo ti leh chu a lo nui duai a, "Zanin chiah aw, naktuk zan chu ka âwl ve ngei ngei ang che" a ti tuah nghal hum bawk nen, "Inthlakna pawh ka keng lo asin" ti niah niahin aw chu ka pawh ve leh ta tho.
Thian dun tih takah eng emaw tih tur tul dang kan neih chang hi chuan kan shift hi kan inthlakthleng mai thin a, bialpa nei zawk tih takah zan lam hi chu min rawn tur leh thut thut zel.
Nilenga damlote kianga hun hman chuan ngaihtuahna a kal thui duh thin khawp a, kan vanneihzia te pawh ka hriat thar phah thin.
Ka riah leh thut dawn avangin school banah Jaydena'n chaw min rawn pe a, uniform pawh thlaklo hian hmeichhe pakhat hi a hnungah a rawn phur ve bawk a, an school luhna a in ang a nih hmel.
"I thiannu vang hian ka buai phah ve ziah" tiffin min pek pah chuan a han ti leh hram a, chhang lovin a thiannu chu tunge a nin ka lo zawt ve thung.
"Snagkimi a nih hi, kan kal leh nghal dawn ka thlah kawi dawn a" a ti a, zawh belh leh a hlauh hmel bawk Nen ka zawt zui duh ta biklo a, haw hunah erawh ka zawt chîk leh khawp ang.
Thawhpui dangte nen chaw kan ei ho a, thil ei hun hi kan awl ve hunlai ber a nih thin avangin kan thlahlel ve thin hlawm khawp mai.
Cont..
Theih ang anga regular kan tum dawn nia aw, min lo chhiarsak ve leh hram hram u la, in ngaihdante pawh comment ah min lo sawisak ve rawh u aw☺
Show post links
Top