LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu



Chapter-5



Lung phun tukah chuan kan chhungte thenkhat pawh an haw liam leh nghal mai hlawm a, keini thianho erawh tunkar chhung awm kan tum thung a, inrinni ah kan haw ve chauh ang.



Ka nu awm a nawm chiah loh avangin tukthuan ei khama ka thianten lenchhuah an sawi pawh chuan ka zui ve duh ta rih lo a, anmahni'n an hreh lemlo bawk a, thingtlang khuaah chuan an bo biklo turah ka ngai.



Ka vahte'n school an kal a, ka u te nupa anmahni hna ve ve ah an buai bawk nen ka nu nen chuan inchhungte kan hawl fai a, pindan te pawh kan duh danin kan siksawi kual vel a, thil kan tih dun lohna rei tawh vang nge mawni, ka nu nen chauha hun han hman vel chu nuam ka tiin ka phur surh a, a lung a leng tih hria in ka awm chhung chu ka theih anga tihhlim ka tum ruh ve viau bawk.



"Ka thiannu in karleh ah hian pasal a nei dawn a, thianah ka tang dawn a" tia ka hrilh lai chuan hlim hmel a pu a, Rdi nena kan chanchin chu college kan kal lai atang tawha a hriat fo avangin chutianga thiana min hman a tum pawh chu mak ti awmin a lang lo a, kan pahnih chanchin chu sawiin kan titi luam mai.



Ka nu chuan midang zinga awmdan mawi te, kan incheina leh hawiher ringawt pawh in kan mizia a pholan theih dante chu min hrilh leh malh malh a, min hau khât hle chung hian thu tha tak hmangin min fuih a, min zilh hau reng thin.




Chawhnu her a nih meuh chuan ka thiante pawh an rawn let leh tawh a, keini erawh kan la hnawk viau mai.



"In khaw tlang khi a va nuam ve.. Tlai lama len a chakawm zawk anih khi, chhunah chuan ni a sa mah mah a" Riny chuan a rawn ti lut nghal bawrh bawrh a, Aruata'n a thlalak thenkhatte min lo hmuh ve vat bawk.



Ka thawhpuite pahnihin sawi tur an hriat viau laiin Nunpuia erawh chu a ngawichawi viau a, hlim loh rukna riau a neia ka hriat avangin ka tan pawh a nuam bik chiahlo.



"I tha maw? Na i nei em ni?" tiin Riny te kalsawn rual chuan ka dinhnaih nghal vat a, "Nei lo e, a lum lutuk a" tiin a lo kiai suk a, mahse eng emaw chu zep a nei tlatin ka hria.



"Hrehawm i tih chuan sawi hreh suh aw" inthlahrung ru ang reng deuh chuan ka ti leh hram a, "Hrehawm ka ti reng reng lo, mahse kan thianate pahnih sawn min hlamchhiah mah mah a ni, kan len leh dawn hunah chuan lo kal ve tawh ang che" thupe aw zet mai hian a ti a, a landan erawh a nelawm reng tho.



Ka nui ta hak a, Riny mizia ka hre chiang ve si a, Nunpuia ai chuan Aruata a nelin a ngam daih zawk a nga, a ko leh chul bawk anga, a chang leh a kaihrang vel dawn bawk tih ka hria, nuam a ti vaklo pawh chu ka hre thiam tho mai.



"Ka lo kal ve ngei ngei tawh ang" nui chunga ka tih takah chuan a ni pawh a lo nui ve suk a,
"In la buai viau nge? Tihtur tul a awm em?" inchhung thlek kual thuak paha a tih chuan choka atangin ka nu zawkin "Thingpui in a hun tawh, in phawt ang u" a rawn ti lang lang a, thingpui no chu sitting room lamah chawi pheiin dawhkanah a nghat a, Aruata te pawh pindan atangin an lo inzui chhuak ve nghal vat bawk.





Tlai lamah pawh tumah an leng chhuak tawhlo a, naupang nen kan ri nak nak reng bawk nen a khawharthlak lem lo a, ka nu pawh a hmel hmuh a nawm deuh tak avangin ka ngaih a tha viau mai.




Nuam kan ti lutuk nge ni kan tum aiin ni a liam chak a, zirtawp ni ah chuan inchhung lamah tihtur em em a awm tawhlo bawka tiin tlang lamah eitur te nen kan in zui chho hlawm a, kan khaw tlang ah hian hmun mawi leh thengthaw nuam deuh deuh a tam riau a, Pathian ni tlaiah phei chuan khaw thenawm atang thlengin nula leh tlangval te an rawn leng suau suau thin.



Thla te la in hun hlimawm deuh kan hmang a, Nunpuia pawhin nuam a ti ve tak tak tawh aniang a tawng duh bawrh bawrh tawh khawp mai.





"Lalremruat, ka sam i delh" tih ri ah chuan phawk zetin ka hawi a, kan puan phahah mu chunga Riny thla la tur chu Aruata'n a sam a lo delhsak chu niin, "Ka tihluih a ni hleinem" Aruata'n a tih lai chuan "La sawn vat ta che" pakhat chuan a lo ti leh tuar a, a au ring bawka thingkung atangin sava an thlawk chhuak suau mai.




"Ka laksawn duhloh vaih chuan lu kawlhin Aizawl i Haw mai ang" pakhat lah chuan a ti tlat a, tunah tak phei chuan a delh satliah pawh a ni tawhlo, a rahin a rap bet a ni zawk mah.




"A na ange" ka lo tih laiin Nunpuia'n "A chak chak ka tan" a lo ti ve thung bawk a, kan indaih khawp mai.



A tawp a tawpah chuan a thlah ve hram a, rum deuha melh chungin Riny chuan "I va han hmelchhe tak" a ti hlar a, Nunpuia chu rawn en lehin "Nangpawh I chhia" a ti leh a, tum bur chungin a sam thur zet chu a hui mam zui a, thinrim viau mah se a landan chu a nuihzathlak em a, min hmuh hlau ru deuh chungin ka nui ru pat pat tho.




Chawhnu dar 2 velah kan Haw a, kan intihfai zawh meuh chuan khua a lo tlai ruih tawh a, zanriah ei kham rualin kan inpack fel nghal sap sap bawk.



Kan bawr teh vak tawhlo bawk nen sumo ticket pawh la lovin kan mipa te pahnih chuan min phur tawh dawn a, kan thlen thlak eauh chuan a chauhthlak ve khawp ang.
Ka chhungte chuan chaw ei khama kal tur in min ti ve bawk mah se a hma lama thlen an duh hlawm avangin zingkarah chhuah kan tum a, zan pawh kan mu hma hlawm viau ani.


Zing dar 5 velah kan tho a, Riny chu kaihthawh a har leh pek khawp mai, ka tho dawn ti chungin puan chu a invur tha sauh sauh reng a, Aruata thinin a tuar ta vaklo aniang chu bathroom ami tui a va suak teuh a, a hmaia a leih rual chuan a rawn au tuar a, a aw rawl te hi a ring tha bik mai bawk si a, ka vahte pawhin an hlau deuhin ka hria.



"Lalremruat, mawl suh" a ti hlak a, thinrim viau mah se kaihthawh dan kan hriat awm chhun a ni miau si a le, ka nu te pawh an nui an nui mai.




Dar 7 velah kan chhuak hman chauh a, Nunpuia bike hi a hnung sang chi a nilo hlauh a, a sang chi lo ni phei se la chuan chauh a na lehzual viau ang.




Kawng lakah kan chawl tam lemlo bawk nen chawhnu herah Aizawl chu kan lut a, kan ina min thlah thlap hnuah rawn lut kawi lovin a Haw tlang ve nghal a, keipawh inbualna tur tui lumin ka mut zawi hma in ka intifai nghal a, U Mazari te ina chaw ka ei dawn avangin rawngbawl a ngailo bawk nen, tlai lama ka mu chu ka lo muhil tlang ani ang chaw ei dawnah min rawn kaitho a, zan lamah phei chuan ka sil ve viauin ka ring.






U Mazari chuan chanchinte min zawt luam a, kal ve theih a duh thu pawh a la sawi ve reng mai. Zanriah ei kham hnu rei vaklo ah keipawh chu ka haw thla leh mai a, Nunpuia chuan min lo biak leh ka rin tehlul nen a la reh vang vang a, a chau ve deuh pawh a ni mai thei.




Be duh bik lemlo in ka mu ve nghal a, tlai lamah mu hrep tawh mah ila ka chau ve viau aniang reilo te ah ka muhil zui leh mai a, zingah pawh thawh ka hai chiang ngang mai.




Pathianni ni mah se ka inkhawm peih ta nganglo a, Nunpuia'n min lo la be miahlo chu ka ngaih a tha chiah tawhlo khawp mai.

Tlai lama U Mazari rawn leng thla chuan Nunpuia damloh thu chu min rawn hrilh a, min be lo hmak si a, a na viau nge maw ni.



Keipawh zan lam chu inkhawm ve ka rilruk avangin inkhawm ban lamah U Mazari nen va kan ve reng reng ila a tha ang, kan khuaah min rawn zui haw a, chutia a damlo nghal ringawt chu ka tan tak pawh a nuamlo ve riau a ni.





Riny lah chuan a hritlan thu leh a rawl zia ngawt a rawn sawi a, kan khua chu an ngeihlo ta viau emaw tih mai tur a ni. Aruata erawh a la reh vang vang a, a ni pawh a chau viau ang.



Inkhawm banah chuan U Mazari'n min kalpui ta ngei a, U Aldrina te nen kan inzui avangin keipawh ka zakzum duh biklo a, inchhung kan luh rual chuan, "A pindanah a awm kha Sawmi, han chho tawp rawh" U Aldrina lah chuan a ti mai a, keimah chauha tlangval pindana luh chu ka hreh ngang mai.




"Lo kal ve la" tiin U Mazari chu ka va kheuh pah zauh a, "Han kal rawh, ka lo kal ve na chi a ni lo" a tia, ka sawm luih ngial pawhin min chhang duh tawh thaklo.




"Han kal tawp rawh Sawmi, nichin deuh khan chaw chu tlem ka bar luih tir a, a la muhil lo ang" an nu ber chuan a lo ti ve mai bawk nen muangchang in kailawnah chuan ka pen chho a, ka che te reng reng chu ka tim dai ringawt mai a, nuamlo ka ti ru hle ringawt.



A pindan nia an sawi lam chu panin thawk ka la suai suai a, kawngkhar ka kik karh karh chuan min chhangtu an awmlo, zawi muangin ka hawng de de a, khum zau deuh mai chu ka hmuh hmasak ber ni.




Nunpuia chu a lo awm ngei a, min hmuh rual chuan a lo nui suk bawk, ka pan hnai ve thuai a, "I na viau em ni? Engtinnge I awm?" a mutna khum bul ka thlen rual chuan ka ti nghal thawr mai.




Min chhang lovin khuma thu tur chuan min mitmei zui a, ka thut rualin a kut a rawn lek kang vut a, a ngaihna hrelo deuhin ka lo en ha ringawt.



A ni lah chu a tawng duh mang silo a, zaizir chauha min biak a tum chu ka hrethiamlo nasa mai bawk si.


Kan inhel kan inhel hnu chuan "Min thuttir rawh" a tihna lek hi a lo nia, thu mu titiha kan in awmtir hnu chuan a thaw chhuak ve hawk mai.



"I eng nge na ber?" tih pahin a chal chu ka deh sak a, a lum ve vang vang tak na in khawsik sang lutuk erawh a ni tawh rihlo chuan ka hria.



Min chhang loa a lo nui ringawt zel chu ka ngaihdan a ni vak bik tawhlo a, "I natna I sawi duhloh chuna ka haw dawn ania" tiin ka melhrum zui a, chutia ka tih vel takah ah chuan nat hmel em em hian a ner zui vang vang lawi bawk si a, hepa uangthuang thei lutuk hi chu a buaithlak ngawt mai.



"Tak tak a, I lo kal ve duh a ka van lawm ve" tiin a rawn tawng chhuak ve ta nge nge a, "I eng lai maw na ber" ka tih leh chuan "Ka hnungzang ruh hi ka inkhelhnaah ka ti pelhsawlh tawh a, long runa tlan kha ka zo vaklo aniang, a bak chu na pawh ka nei lo" a ti a, dawt sawi hmel a pu lo.




"Chuvang chu em ni I inkhelh tawhloh a?" ka lo ti vat a, bu nghutin, "Kum khat chhung chu ka inenkawl anga, ka dam chian hunah ka zawm leh tho ang" a ti a, ka inthiamlo kher mai.



"Bike I khalh theilo tih te chu sawi ve mai tur alawm" tiin amah zawk chu ka dem a, ka awm a tinuamlo vek tawh, keimah vanga hetia awm hi a ni miau a ni.



"I la thutak lutuk a nih kha, a dam leh mai ang" ngaihsam hmel takin lo ti mah se mi â ka nilo a, a dam leh mai chu ka ring bik hauhlo.


A career chu football a ni tih ka hre ve reng a, keimah vanga a na zual anih chuan ka inthiam thei tawh lo ang.



"In uluk viau ang che, bike pawh khalh tawh suh" ka tih chuan min rawn melhin a kiai suk a, "I thu ber alawm boss" a tih chuan ka nui ve ta nge nge.



Rei tak awmna chi nia ka hriat loh avangin kal leh deuh mai chu ka tum a, "I hmanhmawh em ni?" a lo tih chuan lu ka bu ringawt a, a hrethiam aniang chu min dang lui biklo.



"In I thlen hunah lo sawi rawh" a tih hnuah ka chhuahsan a, kailawna ka chhukthla lai chu inchhunga awmte chuan min lo en thap ni mai hian ka hria a, ka awm a nuamlo leh hle ringawt tawh mai a ni.



"A lo harh em Sawmi?" tia a nu in min zawh chuan a harh thu in ka chhang a, U Mazari chu melh zauhin haw turin ka sawm zui bawk a, min hnial ta bik em lo e.





A ngailo ti ve mah ila U Aldrina chuan motor in min thlah ta tho a, U Mazari te ina a lut chu min sawm ve tak na in ka haw tlang a, ka mut fel rual chuan Nunpuia chu ka va be ta ngei bawk.



Rei fe chu thil ho mai mai sawiin kan inbia a, a ni hi chu engtiklai pawhin biak a nuam reng thin hrim hrim bawk nen, phone atang pawhin min ti nui leh thin.







........



Rdi te inneih ni a hnaih tak viau avangin thawhtan ni chuan an inah ka va leng a, ka awm loh rei avangin inneih kawr tur vel pawh engmah kan la en lo.



"Zanin chu hetah riak la, naktukah in bazar ve tawh dawn nia" tia Nu Sangi'n min sawm chuan ka hnial lem lo a, ni 4 chauhin min dan tawh avangin muangchan theih pawh a ni tawhlo.




Zan lamah pawh hnathawk ho chu an che suau suai reng a, U Stewarda te pawh a thianpa U Dinhlua nen an lo lang ve a, kan mut hman meuh chuan dar a tlai leh duai tawh.




"Enteh Sawm.. Pasal han neih ve ngawt mai chu rilru a hau duh reuh e" tia mut naa ka thiannu in a sawi lai chuan "I la neih loh hi" tiin ka lo fiam zauh a, kan nui dun hak hak tak na in rilru hahna a nei tih chu a hmelah pawh a pang reng.



"Ka naute hi an la lak tlak vak silo a, Duata lah a hrisello bawk si" a ti leh a, "I ngaihtuah thui lutuk anih kha, hmeichhiate chu pasal nei tur kan nia lawm, nangmah hmangaih em emtu che I tawng a, nangpawhin I hmangaih bawk a, I nu leh pate ngaihthah rawh ka tihna nilo in, pasal I neih chuan nangma pualin chhungkaw hran I nei ve tawh dawn a, mawhphurhna chu a sang viau anga, mahse hmahun suangtuah tur tam tak I la nei alawm" ka ti ve malh malh a, ka sawi chhan ber pawh ka hrethiam chiah biklo, mahse ka thiannu hian thlamuang tak leh hlim takin pasal nei sela ka duh a ni.




"In dan ka duh leh duhloh min zawt a, an fapa neihchhun a ni si a, a farnu te an sual viau anih loh chuan tul pawh ka ti chuanglo" a tih leh chuan lo bu nghat pahin "In dan chu a nuam zawk ngei anga, mahse a tul ber lo ve thei a, mizo danah phei chuan in dang tur in ni miahlo aw, upa ten an sawi thin kha, 'Mo tha in chhungkua a hui khawm a, mo sualin a ti darh' an tih kha, bakah U Stewarda pawhin a duhlo zawk ang" ka ti duah a, a pawm ve hmel khawp mai.




Zingkar hma deuhah Nu Sangi'n min kaitho a, eirawngte kan bawl pui hnuah kan insu leh bawk a, chaw ei khama kan inpeih fel meuh chuan kan duh aiin a lo tlai leh tawh.




Ka scooty in kan in phur chhuak a, mo kawr zawrh naah kal hmasa berin kan han ha chhin vel a, kan khirh dun lemlo bawka vawi 3 vel kan hak chhin hnu chuan kan thlang fel der mai.



Pheikhawk lei tura kan kal naah Rinfeli te nupa nen kan intawk leh nawlh a, min hmuh rual chuan "Rintea a lo haw dawn ania" a ti nghal ringawt bawk.





Ka chhan hma in Rdi chuan "Chutiang nunhlui lo sawipui tawh suh" a lo ti a, an inneihnia kal ve tura a sawm mawlh mawlh hnuah kan in kalsan leh mai a, kei chu thil dang ka ngaihtuahnaah a leng leh tawh meuhlo a ni.




Haw kawngah pawh chuan ka tawng tamlo a ti deuh nge ka thiannu chuan "I va nguai ve" a rawn ti leh thin a, tun dinhmunah chuan ngaihtuahloh hram hram tum ila a tha ber ang.




Kan thil lei ho chu in kan thlen rualin an lo en ve sap sap hlawm a, pheikhawk in ang kan lei chu a design in ang chiah mah se a rawng a in ang lo a, Rdi'n a var a lei laiin kei chuan a senno ka lei thung a, mawi an ti ve hlawm khawp mai.




Zanriah ei khamah ka phone a rik avangin bathlarah ka chhuak a, Nunpuia hming ka hmuh rual chuan ka chhang thuai bawk.




"Khawiah nge I kal?" a rawn ti thum dut a, ka thiannu te ina ka awm thu ka sawi chuan a thaw chhuak hawk ri ka hre zui zat bawk.


"Engmah I sawilo a?" a ti leh sup a, kan chhuak bawk nen phone ka en mumal hmanlo a, sawi nachang pawh ka lo hre lo a ni.




"Zirtawpah hian pasal a nei dawn a, ka dinpui dawn a" ka tih chuan a ngawi leh vung vung a, "I lo haw dawnlo maw?" a tih laia a aw chu a zawi khawp mai.



"Aa.. Aw haw dawnlo" ban charh hian ka ti a, "I lo kal em ni a?" Tia ka zawh leh chuan "Imm" a ti ringawt a, hepa hian engnge maw a hriat ni.




"I damloh kha, lo mu mai mai ta che" ti mah ila "Ka dam" a ti leh tlat tawh a, "I hman hunah min lo be ngei ngei rawh, ka haw dawn" tiin ka chhan let hun pawh nghaklo chuan a dah daih a, a awmdan chu mak ka ti leh riau tawh.









Cont....
Show post links
Top