DARK DESIRES BY MAWITEI BAWITLUNG (Completed)

[mawitei bawihtlung]

DARK DESIRES


CHAPTER 5



Tlai anih chuan ka room aṭanga chhuakin inhnuai lam ka pana, Dominic-a rawn haw a hun tih ka hriat vâng a ni pakhat. A duh duh nei thei turin a hausa tâwk tawha, a duh chuan a awm mai mai thei mawle, hetianga hna a thawk reng peih hi a mak zâwk.




Ruahsur pawh a bâng tawha, in pâwna ṭhutna ah chuan ṭhu thla in gate lam chu ka en renga. In hau loa awm chu keipawhin nuam ka ti, mahsela ka u leh ka ṭhiannu ka ngaihtuah lo thei silo. Ka ngaihtuah chhuah châng a piangin ka haw thar leh ṭhin.




Rei pawh ka ṭhut hma chuan gate pâwnah chuan car dum tliang hlarh mai chu a rawn lânga, guard chuan gate chu lo hawn sak vatin Dominic-a te ngei an ni tih ka hre nghal. Pan pheiin car hmaah chuan ka va dinga, ka nui sak bawk, Dominic-a pawh a rawn chhuak har lo.




Car aṭanga a rawn chhuah rual chuan a hma a ka lo ding chu min hnaih nghâl ruakin ka kâwngah chuan a rawn chelh nghal chata. Alamah chuan min pawt hnai salh bawk “Ka thu i âwih chu a ṭha e” tiin ka biangah chuan a hmuiin a rawn nawr vang vanga, chutah inherin in lam pan chuan min kalpui zuia.




“Vawiinah enge ilo tih?” a rawn ti chu amak ka ti zâwk, hetiang a ṭawngkam pângngai hian kan la in be ngai lo hrim hrima, amah ka en chu ka chhânna nghâk tih hriat takin min rawn melh zawka “Um thil ei leh mut a nimai, thil tih tur ka nei ve hleinem. A reh bawk sia ka mu leh tawp” ka ti chu a nui haka.




Zanin chu ka sawi kha aw, reilote hnuah nangmah chei tur che an rawn kal ang. A nalh thei ang berin in chei la ka duh” tiin Frederick-a chu ko hnaiin a bengbulah thil a sawi zauha. A ni pawh a kalsawn nghal nal nal mai, eng tak chu hrilh ang maw?



“Zanriah ei nghâl kan duh ang, lo siam mai rawh u. Chhuah kan ngai tlat, hmanhmawh ula” a tihchuan maid ho chuan ei an siam nghal zung zunga, “I inthlâk dâwn lo em ni?” ka lo tih lai chuan min nuihin chaw ei dawhkân chu a pan zuia, chaira ṭhut thlak pah chuan “Tihian ka kal tlang leh mai ang, ka inthlâk peih vak lo” tiin a bula ṭhu tur chuan min mit mei zauha.




Keipawh chuan ka pan ve nghal mai bawk, nu leh pa an nei tawh bik lo tih ka hria. Kei erawh in pa chu ka nei ngei a; mahsela vawikhat tê mah ka nu thih hnu aṭang kha chuan ka hmu leh tawh ngai lo. Ka kut chu rawn chelhin “Enge i ngaihtuah leh tâk Lilia, min thah dân tur em ni?” a rawn tihchuan phâwk deuh tak chuan ka ena.




Engvanga chutiang thu rawn sawi ringawt nge maw a nih ni, thah maw? Amah anga tualthattu nih ka duh ve hauh lo, “Chutiang ka ngaihtuah lo aw, engvangin nge ka thah ngawt ang che” tiin an thil rawn chhawp chu ka ei nghal zata.




“I mi huatna mitmeng hi ka hmuh hmaih bik hleinem, thah min châk hluah hluah a ni tiraw?” a rawn tihchuan ka thil ei lai chu ka châwl data, “Khatiang sawi lovang, chaw ei ang vat zâwk ang, i ngaihtuahna i kâwm nasa lutuk a nih kha” tiin en duh tawh lo chuan eitur chu ka kâ ah ka in hnawh lût mawlh mawlha.




A ni pawhin engmah a sawi tawh bik lo, keichuan thah ve ka duh lo. Mahsela thihna aia na zâwk tuar ngei se ka duh, chutiang tur chuan ka bei ngei ang. Min hmangaih theihna tur a nihchuan engmah tih hreh ka neilo, chaw ka ei kham hnu lawkah min chei tu tur te pawh an rawn thlenga.



Intifai hmasa-in min chei nghâl mawlh mawlha, ka hmai leh mithmul te chen chuan an uluk em em lehnghâl. Kei erawh incheina lam hi ka uar lova, ka ning tlat ṭhin, a thiam lah ka thiam heklo, makeup tello hian ka confi zâwk tlat. Mahsela Dominic-an ti tura min tih miau avângin ka hnial duh lo, chutilo chu a thinrim leh mai mai.




Kawrfual dum tle sep sep, a ṭhui dân nalh zet chu min hâk tira, a chei dân ringawt aṭang pawhin a to dâwn tih a hriat. Designer lar tak kutchhuak a ni bawk, ka sam chu an bâwk vaha. Bengbeh sei deuh tak ka beh bawk, ka ṭhi leh bengbeh pawh chu an nalhin an to dâwn tih a hriat hluah hluah bawk.




“I inhmeh lutuk, i hmêlṭha in i pian a nalh bawk si. I inhmeh tak tak a nia” min chei tute pawh chuan nui var vara min en chunga an tihchuan ka thaw ve huai mai, Dominic-an min hmuh hunah engtin tak awm ang maw? Nalh taka ka awm theih kha a duh ber a nia, keipawhin tûnah meuh chuan nalh ka inti ve thlâwt.




Room aṭanga chhuakin inhnuai lam ka pana, a chhan chu Dominic-a chuan min lo nghâk tih ka hre miaua. Kailâwn a ka chhuh thlâk lai chuan sofa a ṭhu chung hian ka lam chu a rawn hawia, a meng deuh kâwk chu ka hmuh hmaih lo.




Min en vung vung reng mai, nui sakin a lam pan chuan mahni in ringtawk tak hian ka pen thla chhat chhata, rawn tho chhuakin ka lam chu a rawn pana. Ka bul a rawn thlen rual chuan ka taksa pum chu uluk tak hian a enkual leh dan dana.



“I duhthu a sam em? Nalh taka awm turin min duh si a, nge ni a i duhthusam a la nilo zâwk?” ka tih lai chuan rawn nui hakin “I mawi lutuk, tirawh le chhuak tawh ang hmiang” tiin a kut chu ka vawn turin min rawn pe a, ka lo vuan ve mai bawk.




Car in peih ât a lo awm tawh lam pan chuan kan kal duna, a perfume rimtui tak chu ka hriat hmaih lo. Sir zâwng chuan ka en vang vanga, amah aia mipa hmêlṭha tur ka hmu bik lo, engvanga ka hmelma ni kher kher nge a nih le? Tihte chu ngaihtuahin ngaihtuah kual vak vak duh lovin ka in thing harh zui ta thuaia.




Car kawngkhar min hawn sakah chuan ṭhu lûtin ka mit ka chhing zuia, eng party ah nge min hruai dâwn ka hrelova. Chutih rual erawh in hetiang khawpa min chei tir dânah party naran mai mai anih chu ka ring lo ve tawp mai, kawng tluan chuan kan in be tawh miahlo lehnghâl.




A tâwpah in pakhat ropui zet kawtah hian kan dinga, car chi hrang hrang a lo in hûng dul tawh lehnghâl. Mi pawimawh tak a ni ngei ang, eng tak chu buatsaih ang maw hetiang em em a kal khâwm an tam ni.




“Boss Mr Jules chuan a lo nghâk reng tawh che a nia, midang pawh an thleng vek tawh e” Frederick-s chuan a rawn ti a, a ni hi Dominic-a rinrawl ber a niin Dominic-a pawh hian a duat hle tih ka hria, Dominic-a chuan a bân chu ka kut ka rawlh theih nân a rawn dah hnaia.




Ka lo kuah nghâl vat bawk, in chhung lam pan chuan ngawi rengin kan inzui a. A rûk tak chuan ka zâm lutuk, pâwna car zozai aṭang kha chuan mi an tam dawn tih a hriat, kawngkhâr hawnga inchhung kan pên luh chiah chuan thâwm chu a reh nghal duka.



Kan lam an rawn hawi ṭhap tih ka hriat chuan ka zâm lutuk chuan Dominic-a chu ka hmer na salha, a ni erawh a pângngai thlup reng thung. Ka kut chu rawn hum zauhin mi lo awm nuai nuai na lam chu min panpuia, ka lung chu a phu dawt dawt reng mai.




“A bialnu thar a niang, awi ka thik e. Tunge a nih ang le? Mr Johnson-a hi a phu hlawl lo” ti a lo phun sep sep te pawh ka hriat hmaih loh, mipa lam erawhin ka nalh an tih thu an lo sawi ve sap sapa. Ka hriat loh tur a sawi mahnise ka hre vek bawk si, ka nuih a za lek lek mai.




“Dominic ilo thleng thei maw? Kha khawilam hmeichhia nge? A hmêlṭha in a pian te lah a nalh a nih kha le” tiin pa pakhat hian keichu min rawn en vang vanga, Dominic-a chuan alama min pawh hnaih sauh pahin “Ka hmeichhia a nih hi, a lak aṭangin i mit la sawn rang la a ṭha ang, i birthday ka lawm pui a che.” tih ringawt sawiin intur an dahna lam chu min pan puia.




Chutia kan phei lai chuan ka hawi kual ruaia, chutah kil khata ka pa, min hringtu pa ngei mai leh a nupui leh fanu chu ka hmu nghal zata. Ka inhum ruh nghal fan fan mai, a hmêl ka hmuh leh rual chuan ka rilru a na bawk, a kawp tih a hriat avânga ka nu na hmêl te, a taksa hrisel loh phaha a thih tâk dân te chu ka ngaihtuah lo theilo.




A ruk chuan ka in hum ruh ngat ngata, ka rilru a na thar bawk. Hlim taka an pathuma an nui sâng ka hmuh te chuan ka thinrim bawk nên engmah han tih nachâng pawh ka hrelo. Ka awmna hmun lah ka hre chang tawh hek lo.




“Lilia i ṭha em? Enge thleng?” Dominic-a aw ka hriat avâng chuan harh chhuak zawkin a mah chu ka ena, ngaihtuah hmêl zet leh zawhna mitmeng hian min lo en renga, ka nuih ringawt bawk.



“Engmah a nilo, in tur chu” ka tih tâkah chuan Wine hi min rawn pe vata, ka in nghâl hlak hlak mai. Dominic-a chu an rawn pan sap sapa, be ṭha tu leh thawhpui duha rawn pan tu pawh an tam mai. Keimah chenin min rawn be ṭha hlawm em em lehnghâl.



A mak zâwk, zah taka biak ka tâwk ngailoa, ka tân thil thar a nilo theilo. Hei chen ka lo dam ve tawha, tumahin zah taka min biak ka hre ngailo, hmusit leh nuihsawhna nên a ni min biak ṭhin ni.



“Mr Johnson, kan in be thei angem? Thawh Patrick ray ka ni e” ka khawng nghal awt mai, ka taksa chu a in sang mar nghal bawk. Ka pa min hringtu pa duh lova min kalsan tu ngei a ni tih ka hailo, a hming erawh kan unau a kan laka a chêt dân avângin chhawm duh lovin ka nu hnam lam ṭawm kha a nia.




Mahse he hming hi ka theihnghilh ngai rêng rêng lo, Dominic-a pawh chuan ka awmdân chu a hailo tih hriat takin min rawn en vuta, chutah ka pa te lam hawi chuan min in her puiin “Tunge i nih? Ray a?” tiin ka pa chu a ena, an ni erawhin kei min hmuh rualin an meng kâwk kâwk mai.




“Nangmaw?” ka pa nupui, kan unaua hmuhsitna tinrêng lan tira min vautu ngei mai chuan meng bial kaw kaw chung hian min ena, kei erawhin khap miah lo in ka en thung. An fanu duat lai erawhin Dominic-a chu duh hmêl tak hian a lo ena, kei erawh min hmulo ang maiin a awm leh hmak tawh.



Ka pa pawhin min hmu chu mak a ti bawk a niang engmah a sawi nghâl mai lo. “Ka bialnu nên hian in lo inhria em ni? Lilia tute nge an nih? I hriat zâwng a ni em?” a rawn tihchuan ka bu nghata “Min hringtupa a nih hi” seh chilh deuh nak chuan ka ti a, thinrimna leh rilru natna in min rawn tuam leh hlup hlup mai.




Ka pa lah chuan min en tawn sek tawh “Lily nang maw? Engtin nge Mr Johnson-a nên in inhriat theih? Khawiah nge i u?” a rawn ti bah naka, ka chhâng lo. Ka nuih ringawta “Enge i sawi duh chu? Lilia hian biak che a châk vak lo a nih hmêl?” ti a min kalsawn pui a tum lai chuan ka pa chuan a rawn chelh thuaia.




“Mr Johnson nang nên hian thawh ho ka duh a, rawn hmuh che ka tum ṭhin a, mahsela i hmuh theih ngai siloa, khawngaihin in bia ang hmiang” nui sanga tiin Dominic-a chu a nuih tlawn ti tiha, ka lo ner sawk mai. Sum leh ropuina duhvanga ka nu kalsan tu chuan tûn thlengin a hlawhtlin theih dân tur a la dap ngar ngar a nih hmêl.




“I hmakhua chu i la ngai hle mai maw? I fanu leh nupui tân chuan i thih thleng pawhin i ṭang ral rak duh dâwn a nih hi a, kha i fanu rangkachaki pawhin mipa a melh leh daw daw tawh kha” ka tihruala ka pa thinrim hmêl chu ka hmuh hmaih lo.




“Lilia lo ngawi rawh, khatiangin i unaunu sawi hauh suh” a rawn ti chu ka nui haka. Unaunu a? Rapthlâk hiana, Dominic-a bula ka awm avâng bakin a sawi hauh lovang.


ZAWM BELH LEH TUR, CHHÛNAH SAWHTHING KA LING ṬHIN A, ZAN LAM KA CHAU BAWK NÊN KA MENGREI THEI MEUH LOA, KA TYPE THUI THEI ṬHIN LOVA MIN LO HRETHIAM HRÂM HRAM ULA.