SUDDEN - TAKES THE TRAIL CHAPTER 15

[HLalthazuala]

SUDDEN - TAKES THE TRAIL
AUTHOR : OLIVER STRANGE (1940)
EPISODE - 15

Zanlai a pel hret tawh a, Welcome khua chu an mu reh fel vek tawh a. Hmaituam, Sakawr chungchuang panga te chuan khaw hmawr teah an sakawr tidingin an chhuk hlawm a, sakawr pakhat an rawn kai tel bawk a. An zinga pahnihte chu sakawr lo veng turin an hnutchhiah a, midang pathumte erawh chu thawm dim em emin khuaah chuan an lut ta a. Mary Gray-i dawr kawt an thlen veleh chuan an ding khawm a, kawngkhar chu an han en chiang a, hawn mai mai chi a ni lo tih an hre nghal a. An zinga pakhat chuan, "an karchhiat mai chuan a thawm a ring viau ang," a han ti sap a.
"Javert, mi â ka ni hlei nem, He kawngkhar chahbi hi pahnih a awm a, pakhat chu ka la kawl reng a ni," Mullins-a chuan a lo ti thuai a. A ipte ațangin chahbi chu a la chhuak a, kawngka chu a hawng thei ta mai a. Thawmdim tak chungin inchhungah chuan an lut ta țhem țhem a. Mutna pindan an luh lai chuan an zinga pakhat chu a petek ta mai a, inchhung lam ațangin Hmeichhe awin, "Tunge ni?" a rawn ti nghal a. Mullins-a chu rang deuhin a zuang lut thuai a, hmeichhe hmuiah chuan a va hup nghal a, "I bengchhen chuan i tan a pawi ang. I fa hmelchhia hi la dam se i tih chuan bengchheng lovin insiam sawk sawk rawh. Pawn saw a vawt viau a nia, inthuam lum hle ang che," a han ti a.
Mary chuan, "Ka fa chu khawiah nge a awm? Engtinnge in tih?" a han ti a. Mullins-a chuan, "Ţawnglo turin ka hrilh tawh che kha, i fa chu a la dam rih a, i awmdanin a hril zel ang chu, minute nga hun i nei, insiam thuai rawh," a ti ta a. Mary chu hmanhmawh deuhin a insiam a, a fa an ti na ang tih chu a hlauh ber a ni a. In chhunga lo lut hote lah chu tutenge an nih a hre bawk si lova, a mah betu aw erawh chu tunhmain a hre tawh țhin tlatin a hre thung a. Mullins-a chuan, "I hun a ral ta," a han ti a. Mary chuan, "Khawiah nge min hruai dawn?" a han ti leh hram a. Mulins-a chuan, "I la hre chhawm mai ang," ti chauhin a chhang a. Hreh tak chungin Mary chuan misual ho chu a zui chhuak ta a.

An sakawr hnutchhiahna hmun an va thlen veleh Mary chu sakawr chungah chuan an chuan tir a, an kal tir ta nghal a. Mary chuan a fa chu hmuh mai inbeisei deuh tak chungin hnunglam a'n hawi vel a, mahse, hmuh tur a awm bawk si lo, rilru hah tak chungin misual ho chu a zui ve ta zel a. Thimtham hnuaiah Mary chu an hruai zel a, thuife an kal hnuin tuikhawthla ri Mary chuan a han hria a, Silver Mane a nih ngei a ring a. Silver mane piah lawkah chuan lui ruam an zawhpui a, rei vak lo hnuah chuan mual pangah an lawn chho leh ta a.
Mary chuan khawiah nge an hruai dawn a hriat loh avangin a mangang tak zet tawh a ni. Rukru leh misual kuta awm ni ngeia a rin avangin a chunga thil lo thleng tur chu a huphurh tak zet tawh a ni. Khawvar dawn țepin an zinga pakhat chuan, "Fimkhur hle tawh rawh, a chhengchhe lai ber kan thleng dawn," Mary hnenah chuan a ti ta a. A betu chu tunge a nih hriat tumin Mary chuan ngun deuh maiin a en ta a. Kawl a lo eng țan tawh nain chu pa lah chuan a hmai a tuam tlat bawk si a, tunge a nih chu hriat rual a ni lo. Mahse, a vanneih a siamin chutih lai chuan chu pa chuan a hmai tuamna chu a han siam țha a, a kut hnunglama ser chu Mary chuan a hmu ta a, Mullins-a a ni tih a hrechiang thei ta nghal a ni.
Reife an kal hnuin an tumna hmun chu an va thleng ta hram a. In pakhat chhawng hniha sak hi a lo awm a, a kawt zawn an va thlen veleh Mullins-a chuan, "Chhuk tawh rawh," Mary hnenah chuan a ti a, khua chu a vawh em avangin Mary chuan chet vel chu harsa a ti hle a. Mullins-a chuan sakawr a țangin a rawn hlangthla ta a, an hruai chho ta zel a. Pindan chhungah chuan khum pakhat hi a lo awm a, kawmawl pahnih a lo inphah bawk a. Mullins-a chuan, "I fin viau chuan rei i awm lovang," a han ti a, a chhuahsan ta rih a. A lo kir leh thuai a, Whisky a rawn keng a, Mary chu pek pahin, "In rawh," a han ti a.

Mary chuan a in duh dawn lo zet a, mahse, Mullins-a chuan a tihluih tlat avangin a in ve ta a. A taksate pawh chu a lo lum ve ta deuh a. Mary chuan, "Ka fa chu rawn hruai tawh rawh ule, in thu ka zawm zel si a," a ti a. Mullins-a chuan, "kan thu zawm zui zel la, i fa chu i la hmu thuai ang, i zawm zel duh dawn loh chuan zirtir i ngai tihna a ni mai, zirtir ngai khawpin han luhlul la ka ti hle zawk.... i hria em?" a ti ta a. Mary chu a beidawng țan ta hle mai a, a hmai chu a hup tlat mai a, a fa an kawl chhung chuan an thu chu a zawmlo ngam dawn lo tih a hriat avangin a rilru chu a buai tak zet a ni.
Khaw thim dawn țepin Sudden-a chuan Bentley khua chu a va thleng a. Miin hmu tam lo se a tih avangin Hotel te deuh bera a hriatah chuan a lut a. Chaw a eikham chuan a mu ta nghal mai a. A tuk zingah chuan khua ațanga melkhat vela hla, Jail chu a pan ta a. Santiri hnenah chuan tunge a nih a insawi a, reilote a nghah hnuin Jail chhunga Office-ah chuan an hruai lut ta a. Office chhungah chuan mi pakhat kum sawmnga mi vel hian, "Marshal, engnge mamawh i neih le?" tiin Sudden-a chu a lo zawt nghal thuai a. "Thil hriatchian duh ka nei a, min hrilh theih tak mialin tih thuah ka lo kal a ni," tiin Sudden-a chuan a chhang a.
Warden chuan, "Engnge i hriat duh chu?" tiin a zawt nghal a. "Tun hma kum hnih vel tawhah khan he tan inah hian mi pakhat Jesse Sark-a chu a lo tang ve tawh em?" tiin Sudden-a chuan a han zawt țan a. Warden chu a thova, Register chu lain a han keu a, "Heta hi kum hnih tang tura tih a nih hi. A thlalak pawh a awm, i en duh em?" a han ti a. Sudden-a chuan thlalak chu en pahin, "Hei hi chu a ni lo," a ti a. Warden chuan, "A tan tirh laia lak a ni a, a hming ang pu midang pawh an awm ve ngeiin ka ring," a ti a. Sudden-a chuan, "A hmel a lo danglam ta hle a nih dawn hi," a han ti a.
Warden chuan, "A ni ang. Jail-a an lo luh tawh hi chuan an hmel hi a dang viau zel ania. Hriat pawh a harsa viau thei ang. Kum hnih a ral hmain Jail-ah hian hri a leng vak mai a, Sark-a pawh a thi ta nghe nghe a sin," a ti ta a. Sudden-a chu hlawhchham hle hian a inhria a, Warden hnenah chuan, "Ka lo kal nachhan hi a thlawn hle niin ka hria. Thil pakhat chiah hriat duh ka la nei a, Sark-a hian țhian pakhat, 'Kent' ti a koh țhin a nei reng em?" tiin a zawt leh a.

Warden chuan lehkhabu pakhat a han la chhuak leh a, "A țhian i tih chu he pa hi a ni mai thei. Ezra kent, Sark-a ang bawka a ruala thil tisual ve tho, tang dun an nih hi. Kum hnih a tan hnuin a chhuak ta a nih hi. A thlalak pawh a awm nghal a lawm..., Engtizia nge ni ta, Marshal?" a han ti a. Thlalak a hmuh ațangin Sudden-a'n mak a tihzia chu a hmelah a lo lang chhuak hial a. Warden hnenah chuan, "Hepa hi alawm Jesse Sark-a emaw ka lo tih chu! An thlalak hi tihfin palhin in hai ta chu a ni thei lovang ti raw?" a han ti a.
Warden chuan, "Kan tisual lovang, kan hai palh a nih chuan Jasse Sark-a emaw i tih....," tih chungin 'Ezra Kent' tia thlalak an lo chhinchhiah chu a han entir a, "He pa hi a thi tawh tihna a ni dawn a sin," a ti ve ta a. Sudden-a chuan, "I thusawi chu ka hrethiam vek mai. Engpawh nise, thil hriat chian țul a la awm a ni. I thu min hrilh hian min pui nasa hle ang," a han ti a. Warden chuan, "Thildang tih sak theih che ka la nei em?" tiin a han zawt leh a. Sudden-a chuan Jesse Sark-a hi a thi tawh tih ziakin min pe thei la ka lawm ngawt ang, chutilo zawng dawt ka sawi emaw an ti ngeiin ka ring," nui chung hian a han ti a.
Warden chuan lehkha ziak chu a pe ta a. Sudden-a chuan lawmthu hrilh chungin lehkha chu a ak ta a. Almirah-a Register an tlar phei țeuh chu ngun fein a en a. Warden chuan, "Chanchin ngaihthlak nuam lo tak tak hlir inziahna a nih hlawm hi," a lo ti a. Sudden-a erawh chuan, "Chutiang lam chu ka ngaihtuah lo, in rem fel em a, Jail lo tang tawh reng reng an chanchin in lo chhinchhiah țha zel a ni ang maw?" a han ti a. Warden chuan, "Ni e, midang chanchin hriat duh i la nei em ni?" a lo ti thuai a. Sudden-a chuan, "Mi pahnih, Web-a leh Peterson-a te chanchin a tel ve lo maw?" tiin a zawt ta daih a.
Warden chuan, "Register chu a en leh ta a. Vawi hnih lai a keu chhuah hnu pawhin Web-a leh Peterson-a hming chu a hmu zo ta lova. Sudden-a hnenah chuan, "I țhiante pahnih chu kan zingah an la telve lo a nih dawn hi," a ti a. Sudden-a chuan, "Ka țhiante an ni chiah lo," a lo ti thuai a. Warden chuan Sudden-a hmel chu a han en a, a hriat chak loh tawpa thuk thil engemaw tak a ngaihtuah a ni tih erawh chu a hria a, chuvangin Sudden-a mi zawnte pahnih chu a awt tehchiam lo a ni. Sudden-a chuan, "Min puih avangin ka lawm e, ka pu," a ti a. Lukhum a la a, a tho ta nghal a. Warden chuan, "Pui thei dawn chea min hriat phawt chuan min la rawn hriattir leh dawn nia," a ti ve bawk a. Sudden-a chuan a chhuahsan ta a, Sakawrah chuangin Welcome khaw lam panin a kir leh ta a.

Kalkawngah Sudden-a chu a inngaihtuah nasa mai a, "Jesse Sark-a zawk chu a thi tawh a, mahse, a hming invuahin Ezra Kent-a chuan Dumb-Bell Ranch chu a nei ta niin a lang. Sark-a chu Welcome khuaah a lo kal ngai lova, Ezra Kent-a chuan a mizia a hriatchian em avangin Sark-a anga chet pawh chu a thiam hle ngeiin a rinawm. Lyman-a kha chuan he thil hi a hriat ngei a rinawm a, Dumb-Bell Ranch nei tur pawh hian a lo pui a ni phawt ang. Chuti a nih si chuan Amos Sark-a thattu chu a hriat ta vek a nih chu," Sudden-a chuan a ti rilru a. Midang pahnihte chanchin a zawh kha Sudden-a chuan a ngaihtuah kai ta zel a. Warden khan an chanchin a hre lo pawh kha mak a ti tehchiam lo. "An hming ringawt chu duh hun hunah an thlak maithei a, mahse, ka la zawng hmu tho vang," a ti rilru a, a sakawr chu kal chak deuh turin a han fuih a.
Ni chu a tla teuh tawh hle a, mahse Sudden-a chuan mel sawm lai mai kal tur a la nei a. A sakawr chu chau deuh hlek tawh a a rin avangin a tur hmanhmawh duh teh chiam lova, awih pang deuh hnimbuk tamna hmuna a kal lai chuan Sudden-a chuan a sakawr nghawng chu a'n chul sak a, chutia a kun lai tak chuan Rifle ri a hre ta a. A lukhum chu a leng nghal lawp bawk a. Sudden-a chu rang takin a sakawr ațangin sir zawngin a zuangthla nghal a. Chutihlai pawh chuan Rifle chu vawikhat a ri leh hman a. Sudden-a chu hnim buk phenah a zuang nghal vat a, a sakawr Nigger-a pawh chu a tlan nghal daih bawk a, mahse, a bo lovang tih erawh chu a hria a ni.
Hnimbuk kar ațangin silai ri lo chhuahna lam chu a han enchiang a, a awmna ațanga fit sawmnga vel, hnimbuk kara silai khu niawm tak la zam chiai chu a va hmu thei a. A awmna sir veilama mi hnimbuk chu a han sawi che lawih lawih a, a bawk phek lehnghal vat bawk a. Rifle a lo ri leh țhuai a, silai khu lo chhuahna zawn chu Sudden-a chuan a kap ve ta a, fuh inrin vanga kap phei chu a ni chiah bik lova, mahse, thinur hrikthlak a duh ve hrim hrim vang a ni zawk a. Sudden-a chu reilote a han ngawi leh rih a, tah chuan a ke in a awmna piah lawka thingbuk chu a va tlawh che leh a, a hma ang bawkin a bawk phek leh ta vat a, kap let ve mai thei turin a silai a kau sa reng bawk a.

Silai hmawr lo detna zawn veilam leh dinglam chu Sudden-a chuan indawt zatin vawihnih a kap let ve leh ta a. Khua a la thim chiah lova, an inkarah chuan bihrukna hmun remchang a awm si lova, chuvangin chet sawn ngaihna a awm lo ve ve a ni. Sudden-a chuan puakruk pahnih chu a phawi chhuak a, silai khu lo chhuahna lai vel chu inkar hnaih fe fe hian a kap ta chiam mai a. Silai ri reh fel hnuin a han ngaithla leh vang vang a, a puakruk mu pawh a thunkhat leh tawh a. Darkar chanve lai a nghah hnu pawhin thawm engmah a hre ta lo reng reng a, chuvangin khua a thim țan ta bawk a, a awmna hmun chu hnunglam ațangin a tawlh chhuahsan a, a hmelma awmna zawn thingbuk hnunglamah chuan a va chhuak a.
A han hawivel a, hnimbuk zingah chuan mihring niawm tak thim deuh bik hi a hmu ta a. "Ka tin reng che ania, che hlek suh?" ti a vau chungin Sudden-a chuan a hnaih thla ta a. A thil hmuh chu che lovin a awm ngaiin a awm reng a. Sudden-a chuan a nawalh chu a han nawt a, mihring a ni tih chu a hrechiang ta nghal bawk a. Bawkkhup zawnga tlu a nih avangin a han kuai zangthal a, Squit-a a ni tih pawh a hre ta a. Squit-a chuan "Khawngaih takin tui min han pe teh," a lo ti a. Sudden-a chuan faifukin Nigger-a chu a han ko a, Nigger-a chu a lo lang nghal thuai a, a zin sira tuithawl inkhai chu a la a, Squit-a chu a han intir a.
Sudden-a chuan engmah dang pawh sawilawk miah lovin, "Sark-a chuan engzat hlawh turin nge a rawih che?" tiin Squit-a chu a han zawt chat mai a. Squit-a pawh chuan insum hman bik miah lovin, "Dollar zanga," tiin a chhang ve mai a, a thusawi chu a han ngaihtuah chiang leh thuai a, "Eng chu nge min zawh chu le? Sark-a'n min ruai hlei nem....," a ti leh hnuhnawh a. Sudden-a chuan, "I fing tlai hret a, i ngaihtuah chhuak har deuh a ni, i tlai lutuk, khawiah nge ka kah che?" a ti ta a. Squit-a chuan, "Ka awmah min kap a ni. Ka tuar zo...... chuang...... lovang, min kalsan..... mai rawh," a han ti țawk țawk a.
Sudden-a chuan a hliam chu a han en hnuin a tuamsak ta a. "Thlaphang duh suh khaihlum theihin i la dam chhuak thovang, Welcome i thlen zawh i ring em?" a ti ta daih a. Squit-a chuan, "Ka kal duh lo," a ti a. Sudden-a chuan, "I thlang zawk a nih phei chuan puakruk mu khat sengin tah hian ka phum nghal mai thei ang che," a ti ve ta a. Sudden-a chan chu a chan tura a han dah chhinin Squit-a chuan Sudden-a chu kaphlum duh mai tur a ni ve tho tih a hriat avangin a hnial sei ngam ta lova. A sakawr thlun chu Sudden-a chuan a va kai a, Squit-a chu a chuantir a, Welcome khua chu an pan dun ta a ni.
Kalkawngah chuan Sudden-a chuan, "Mullins-a nen in inkawp tih ka lo hria asin," a han ti a. Squit-a chuan mak tiawm takin Sudden-a chu a en a. "Mullins-a chu tunge a nih ka hre hrep lo ve," a ti bung hmuk a. Sudden-a chuan, "Nangmah ang bawka daw thiamlo ve bawk a ni. Sark-a nen khawia inchhar nge in nih?" a han ti leh a. Squit-a chuan, "Thawh tur ka neih loh avangin a hnenah ka va inhlawh a ni," tiin a chhang a. Sudden-a chuan, "I inhlawh a, i va chesual lehnghal a nih hi. Mahse, lungngai suh, rilțam vang ngawt chuan i thi bik lovang," tiin a hnem ta a.

ADVERTISMEN CLICK

Mn lo click sak hian nu leh pa nei lo te i tanpui reng alo ni...Tha hnem ngai tak in mn lo click sak thin a vang in kan lawm e