My Destiny 22

[Lin kholhring88]

Sitting room a ava luh chuan Mac a hi alo awm a. Julie i lo lut chu alo hmu nghal a," Khawilam ah nge i kal a Julie? I kalbo rei lutuk a, ka rawn zawng trep che alawm," alo ti a.

"Chuti maw? Inhnung lama huan ah sawn ka kal alawm. Ka tih mangan che avangin min ngaidam dawn nia, ka tum reng vang pawh ani miah lo ania," inthiamlo tak chuan a ti a.

"Ngaihdam dil angai hleinem, ka lo hlauthawng hma deuh te pawh ani mahna. Hawh hei coffee hi lo in ve rawh!" Mac a chuan zangkai deuh zawk chuan a ti ta a.

"Ka lawm e, i in awmna hi a fuh hle mai. Ka duhzawng tak ania," hmel hlim taka thu pah chuan Julie i chuan a ti ta sar2 a.

"Nia keipawn ka hmuh tirh ber khan nalh ka tih nghal mai bakah nuam dawn hle a ka hriat vang ania ka lei. Bakah khawpawn deuh mah nise ka ngainat zawng tak anih vang ania lei luih tak," chhuan hmel tak hian alo ti ve a.

"Keipawh ni ila ka nep phal teuh lo mai. Hetiang hmun nuam leh in nalh te chu a vang em alawm," coffee in pah chuan a ti a.

"Eng hna nge i thawh thin?" Mac a chuan a ti ta daih a.

"P. A hna ka thawk thin a, mahse tunah chuan hna zawngleh hma ila ka tlin tawh lovang," a dul melh zeuh pah chuan a ti a.

"Ka clinic ah hian reception hna a ruaka i thawk duh angem?"

"Ka lo ti thin tawh tho asin, chuan ka tha viau bawk ania," inti thei tak hian a ti var a.

"Awle...ina awm reng chu i tan pawh a ninawm dawn in ka hre deuhva. Kan kal dun anga kan haw dun thei bawk anga, a tha riau dawnin ka hria a," Mac a chuan inti fuh deuh hian a ti deuh duah a.

"Nia, ka lawm ngawt ang min thawhtir tak2 dawn chuan," hmel eng phata Julie in a tih takah chuan Mac a chuan a thusawi chu a sawisual hauh lo tih a hre ta mai a.

"Nia, i duh chuan karleh atangin i tan dawn nia. Hlawh pawh a tha viau ang. I khawl anga, nakin ah awmhran i duh ta anih pawn chu2 i tan ala tangkai viau dawn ania," Mac an a tih chuan Julie i chu alo phur hle tawh ani. A rilru chuan lawmthu a sawi nghal mawlh2 a, hei baka lawmna hi a nei tawh chuang nang,a harsat ber laia tianga thiantha engkim a tanpui tu an tawng hlauh chu! Bakah a nu pawisa a thawn ziah ala ngai dawn nen, hna a hmuhloh chuan a thawn thei dawn der si lova. Thawn lova a awm reng chuan a nauten lehkha an zir thei dawnlo chu thukhat nise, engvangnge tiin anu chuan amah ai mahin Eliana i a zawt anga, ani lah chuan a awmna pawh a hriat loh thu in alo chhang ngei bawk anga. A nu chu Police ah te emaw kalin an phek zawn loh leh Robb Marshall a tan luhai thlak khawpin a awm duh ngei ang tih lah chu a hre khiau si a. Hna a neih erawh chuan pawisa a thawn zat2 thei anga, tuman an ringhlel hauh dawn lo ani.

"Ka chungah hian i tha lutuk hi ka rul seng dawn si lo che a....," mittui tling pam chuan a ti sap2 a.

"Thian kan nia, ka tihtur alawm. I dinhmun ah hian ding ta ila nangpawn i ti ve tho ang chu," a lo ti dap2 thung a.

"I tih ang zozai hi chu ka tih theih pawh ka ringlo....," tiin thudik tak chuan a chhang mai a.

"Nia a dik maithei. Nang chuan mipa hmangaih dang i nei a, kei erawh chuan hman ata tun thlengin nang chiah hmechhia ngaihven ka la nei miau alawm," a aw a na tak tuar tih hriat tak chuan Mac a chuan a ti a.

"Mac, ka....pawi ka ti tih bak sawitur ka neilo. Tin ka chunga i rilru put hmang lah ka hre ngailo reng2 bawk tih ka sawi tawh kha....,"

"Min hmangaih let turin ka phut hauh lo che! Mahse i fa hi ka hming pawh pek ka huam chuti khawp chuan tunah pawh hian ka la hmangaih che ani. I rilru chu i thu2 ani a, mahse ka rilru nawm nana ka tih theih ang2 nang leh i fa tana ka tih tum ang hi chu hnial lo hram la ka duh khawp mai. Heng zawng2 ka tih avang hian ka hahdam phahin ka rilru a nawm phah dawn a, tin ka hmangaih tan engemaw tal ka tihsak theih ve avangin damchhungin rilru nuamin ka awm phah dawn bawk ani," Mac an a tih chuan Julie i chuan a khawngaih em2 a. Hepa hi tinge alo hmangaih zawk loh le? Engvanga amah hmangaih ve hauh lo tu chu lo hmangaih nge maw anih le? Vanduai na hi chu ata liau2 alo ni anih hi, tiin a ngaihtuah vawng2 a.

"Kalna tur dang pawh ka neih chuan loh hi...! I phal phawt chuan i bulah chuan kan awm ang mahse naute a len deuh hunah chuan thil tha ber pawh ani dawn lova, kan indang ve thung ang," Julie i chuan a ti ta a.

"Ka dang lovang che....naute a len thleng pawha min hmangaih ve thei ta hlawl lo anih chuan i duh phawt chuan i kal dawn nia. Mahse min hmangaih ve thei hram la chuan ka nunah hian engmah mamawh dang ka neilo tih chu i hrethiam tho ang chu," beidawng tak hian Mac a chuan a ti chuai raih a.

"Mac....hmeichhe tha tak, keimah anga tlaktlai lo lo hi ila tawng em2 ang,"a ti ta ringawt a.

Nui hawk pah chuan," I hmangaih i tih pa chu anih leh i theihngilh tawh tihna ami?" a tiril ta ruih a.

"Aih....teuhlo mai....ka hmangaih reng ang," alo ti nghet charh a.

"Keipawh! Hmeichhia nang aia tha leh lehkhathiam pawh an tam alawm, min ngawizawng tu pawh an awm nawk alawm, mahse hmangaih te chu an dang tih i hrethiam alawm kha!" alo ti nghat2 a.

" A dik alawm, mahse keichu hmangaih tlak ka nihloh hi.... Mac" a ti deuh that a.

"Hmangaihna chuan tlak leh tlak loh a thlir ngai hleinem,"

"Oh my God! I a tawh anih hi Mac, hrilhfiah ngaihna che pawh ka hre tawh love," beidawng tak chuan a ti ta a.

"Tum lo mai rawh, Julie," alo tih chuan Mac a chu a en ta tlawk2 a. Ani pawn hmangaih a neia, a hmangaih reng bawk ang. Mac a chu a lainat hle a, ani ang hmeichhe laktlak loh alo hmangaih chu a vanduai thlak a tihpui hle bawk a ni. Hrilhfiah dantur a hre tawh lova, a khawngaih em2 tawp ani.

Mac a hi mipa sangtha tak, pian pawh nalh angreng tak, vun ngo lam ani a. A hmeltha in a hnathawh pawh a zahawm em2 bawk a, mi tena pathian tluka an en thin Doctor hna a thawk mek ani. A nun a tluanga, chhungkaw hausa pangngai tak atanga seilian ani bawk a, engtiklai mahin retheih awmzia pawh a hre ngai hek lo, hmeichhe tan chuan Mac a aia pasal atana thlan tur chuang an awm tawh bik chuang lovang. A duh chuan nula a duh2 a thing thei ngei bawk ang tih chu Julie i chuan a hrechiang hle a, chuti chunga ani mi fa pai mek alo la hmangaih duh chu a tah te a chhuak rum2 ani.

Thildang an sawi leh hma chuan Robin a chu alo lut a," Mr. Rowland, dinner kan peih tawh e," arawn ti ta a.

"Awle...kan lo kal nghal ang," tiin Mac a chuan alo chhang thuai a.

Nia zanin atan chuan an sawi zawng2 kha a tawk phian tawh ani, a nihna takah chuan a sawi tam mah2 zawk hian Julie i chuan a hre hial a. Mahse engkim hi Mac a chuan ala hre dawn thau2 a, amah tanpuitu tur a neihchhun anih bawk avang chuan thup buai lah a tum hek lo. Hna a pek chuan a hahdam huai anga, tin a fa tan pawh rilru hah lutuka a awmlo tur chu a tha hle dawnin alo hria a, a hlim veng2 ani. Mahse Mac a rilru leh a laka alo hriat ngailoh thil alo up reng avang chuan a lainat hle a, tih theih neih pawh a chak hle mai. Mahse a tan chuan Robb Marshall a lo chu mipa dang reng2 hmangaih theihloh ani rih tlat ani.

Dinner chu alo tui lehpek hle a, a ei hnem leh hle bawk ani. Hetianga a chaw ei a tui reng chuan a thau chak viau dawn ani tih chu Julie i chuan a ngaihtuah a, a nuih te pawh aza hial ani.

"Enge i thil ei ah khan nuihzat thlak a awm em ni?" Mac an a tih chuan alo nui ri ani tih a hrelo reng2 a.

"Ka tihpalh ka lo nui ri ani maw? Englo ania, ka thil ei a tui lutuk hi ka thau viau dawnin ka inhre mai2 ania," nui rah2 pah chuan a ti a.

"Enteh Julie, hmeichhe lam doctor chu ka ni miah lova, mahse maw naupai lai hian an thau tlangpui alawm hmeichhia te hi," alo ti nuah2 a.

"Nia ka hria alawm, mahse a nuihzatthlak dawn em asin kan thau tur chu, i tive lo ami?" a tih chuan Mac a chuan uluk tak hian arawn en kual vel ta a.

"Hmm....i nalh zawk daih ang," tiin Julie i rinloh zawng daih chuan arawn chhang ta a.

"Maw? Min fiam hauh suh aw," tiin alo melh ram2 a, Mac a nuihza insum thei tawhlo chu a nuih tak huk ah chuan an pahnih chuan an nuidun ta hawk2 a. Dinner an eizawh chuan coffee in turin sitting room ah chuan an thudun leh a, mahse engmah a hma a an thil sawi kha chu an chhunzawm tawh lem lova.

"Awle...mu hahdam tawh la a tha ang, naktuk ah kan inhmu leh dawn nia,"Mac an a tih takah chuan a lawm rilru hle a. Hahdam taka khuma mut veng2 chu alo chak ru hle tawh reng ani.

"Ni e, nangpawh mu hahdam rawh Mac," tiin an thova, inchung lamah chuan an inzui chho ta a. A room kawngka thleng chu Mac a chuan arawn thlah a.

"Saw2 ka room ania, zanah mamawh te i neih chuan rawn sawi hreh hauh suh ang che, tui takin i mu dawn nia," tiin Julie i chalah chuan a fawhsak zeuhva.

"Engkim avangin ka lawm e,Mac. Mangtha le...," tiin kawngka chu a hawnga, a luhsan ta a. Julie i luh hnu pawh chuan Mac a chu ala kalsawn lawk lova, a hmangaih ber alo zawn ruk fo tawh an hmu leh chu a lawm em2 a, awmdan tur pawh a hre chiahlo ani. Diktak chuan a inah tunah hian Julie i chu reitak a zawn hnu ah a awm ani tih a hriatna chuan hlimna nasa tak a pe a, mipa dang fa pai mahse ala hmangaih let ve ngei pawh beisei na liantak a nei tlat ani. Hlim tak chung chuan a room lamah a kal phei thei ta hram a.

Monday alo thlen chuan Mac a nen chuan clinic lam pan chuan an kal ta a. An thlen chuan Julie i chuan mak a ti hial zawk a, alo rin ang ani hauh lo miau alawm. Te fel et awt turah khan alo ngai kha ania, mahse a lian mah2 in a ropui hle ani. A clinic atang ringawt pawh chuan Mac a chu doctor satliah mai2 ani hauhlo ani tih chu a hrethiam nghal a, sum pawh ala lut hnem hle ang tih chu mi mawl tan lo chuan hai chi lah ani hek lo.

"Mac i clinic hi ava ropui ve," thaw hak pah chuan a ti ta nge2 a.

"Min ti zak dawn alawm, Julie. Hawh le i lut ang hmiang?" a tih chuan ngawi rengin a zui lut ve ta a.

Mac a chu a thawksa lo awm ho chuan zah takin an lo chibai sap2 a, Julie i erawh an hmuh ngailoh anih vang nge an en deuh hrek2 hian Julie i chuan a hria a. Reception counter ah chuan hmeichhe pahnih hi anlo awm sa tawh a, an va thlen chuan Mac a chu chibai anlo buk nghal vat2 a.

Mac a chuan," Hei hi Julie Rothschild ania, vawiin atangin in bulah hna arawn thawk tan dawn ani," tiin midang pahnih te nen chuan a inhmelhriattir ta nghal a.

"Ka kalsan ang che Julie. Tha tak khan i thawk dawn nia aw, lunch ah kan inhmu leh dawn nia," tiin a kalsan ta nghal a.

A tawhpui tur te chuan mak ti tak hian Mac a kal liam ta chu an melh a, hetiang hian amah in thawk thar tur tumah ala rawn hruai ngailoh avang chuan mak ti pawh nise a awm viau ani. Julie i chu an hna thawh thin dante chu an hrilhfiah ta nghal zung2 a. Alo thawh hrep tawh hnu hna anih avangin Julie i pawh chuan alo man ve nghal zung2 a, engmah thil harsa em2 alo awm lova, a hna thar chu nuam dawn hle in a hre bawk ani. Mihring Mac a hnena in entir duh an tam em avang chuan an buai tan chu ani ta nghal mai a, mihring tamzia a ngaihtuah ringawt pawh chuan Mac a chu a lar hle ang tih pawh a hrethiam nghal vek ani.

London lamah chuan Robb Marshall a chuan private agency ami Dectactive a ruai a, mahse ni hnih aral hnu pawha engmah Julie i chanchin an hriat chhuah theih tak lovah chuan a beidawng hle tawh ani. Enge a tihsuala, chutia Julie in a kalsan tak mai chu tiin a ngaihtuah awl lova, mahse a chhanna erawh amah Julie i chiahin a hria ani. Khawiah nge a awm anga, engtin nge a khawsak dawn a, engvanga kalbo nge anih tiin zawhna hrang2 chu a inzawt nawn awn2 a, mahse engmah chu a inzawt chhuak lem hlei lova. Eliana i pawhin Julie i chu a kalbo tih a hre ve tawh a, a hriat tirh phei chuan a buai chhe lo chauh ani. Robb a a hre ber tur lahin engmah a hriat siloh avang chuan ani pawh zawhna hlirin a khat hi ani tawp a. A thiantha ber ani a, engvanga a kalbo hma a engemaw tal hrilh lo nge anih, khawnge kal a tum tih tal te chu min hrilh ve awm ana tiin a phun2 a mahse engmah a sawt chuang si lo. Robb a vang ani tih erawh chu a rilru ah chuan a chiang hle a, chupawh nise hrilh ve tal sela hi ani tur ania. A nu hnenah em niang a let leh ang? Anu chu va biak mai a duh deuh ut2 a, mahse anu hnena a kal lo aloh nih vaih chuan buaina leh rilru hahna a tipung mai2 dawn si a, engpawh nise nghah rih phawt chu a tum ta a.

Robb a chuan a hna pawh chu a ngaihtuah mumal thei lova, Julie i zawng reng2 chuan kar khat dawn lai chu a phi buai tawh a, mahse engmah ala hriat belh chuang lo ani. A in entir khan thil thalo tak a thleng anga, chuvang chuan a tlanbo ani ngei ang tih te chu a ngaihtuah a, mahse engmah chutiang chu a awmin a hre silo. Zanah phei chuan zu rui hnepa a in loh chuan a mu theilo reng2 a, zu pawh Julie i vang chuan a in nasat phah hle ani.