DEAR JOHN BY MAWITEI BAWITLUNG (Completed)

[mawitei bawihtlung]

DEAR JOHN





CHAPTER 10






“Inkhaw lam chu ka vawikhat kalna a nia, anuam dawn hle mai" u John-a chuan car khalh chung chuan a ti a, ka nui sak ringawt, ni e kan thingkung awm ṭhenkhat in ang lo te pawh a awm ve nual miaua, a bikin khawchhak lam hi tlangram leh zual a nih avang hian thing pawh a chi dang a tam viau mai.






“Um boruak pawh a inang lo alâwm, kan thleng ve ṭep tawh ania, Puipuii chu a mutui hle mai" ka tihchuan rawn en zawkin a nui suka “I bula a awm chuan khawiah pawh a thla a muang tih a hriat, hei vang hi alawm ka duh em em che. Ka fanu hian a ngaina che in i duat zia ka hai hleinem" tiin hmalam chu a en leha.








Darkar chanve vel kan tlan leh tâkah chuan ka khua chu lutin ka hawi kuala “Anuam dawn hle mai a, khawiah nge in in chu" a tihchuan “Tlanzel phawt rawh" tiin kan in awmna lai zâwn vel chu ka kawka, reivak lo hnuah kan thleng ve mai bawk.







“Nu ka u te an lo thleng" ka naute chuan pâwnah min lo hmuak chu niin, nui var varin Puipuii chu ka pawm chhuaka, ka nu pawh chu kawngka ah chuan a rawn lang ve ta bawk. “Hei hi em ni kan makpa hual chu, awi i van hmelṭha em em, Mizo i ni tak tak em? Nangmah anga hmelṭha ka la hmulo" kan naupang berin a lo tihchuan ka nu chuan alo khap vata.







U John-a chu nui hawkin “Ka hmelṭha tak tak em? I u hi ka phu meuh ang maw?" a tihchuan ka naute pathum chu an lo bu nghauh nghauh hlawma, Puipuii chu ka nau chiah chuan rawn pawmin a ni pawhin a lo duh ve mai, ka nu nen chuan kan in kuah vang vanga.








“In lo thleng thei chu a lawmawm hle mai, ti'ru inchhungah lut ang u" tiin kan bungraw hawn ve chu kan khai lût hlawma,Puipuii pawhin nuam a tih hmêl viau, u John-a chuan kan in chu a en vang vanga, ni e ka pa a thih hma avângin in ṭha tak pawh kan la nei thei lova, ani in ropui zet nen kha chuan tehkhin chi pawh a nilo, keimah ka insit rum rum mai.






“A nuam dawn hle mai, thing inah ka la chêng ngai miah lova, ka vawikhatna tur ania a nuam dawn tih ka chiang, lut ang hmiang" a tih takah chuan ka thaw huai mai, inchhung kan luh rual chuan ka naute chuan min ngaih tawh zia leh thil dang dang chu an sawi kuala, ka duh dân angin washing machine pawh an lo lei tawh a nih hmêl.








“Ka awm loh chhûngin in lo fel em? Ka nu in lo pui ṭha em?" ka tihchuan an aw rang hle, nui hakin an chrismas kawr tur kan leisak chu ka pe hlawma, u John-a leisak a nih thu ka sawi chuan lâwmthu an hrilh ve sap sapa, a ni pawhin a lo nuih let ve var var bawk.






Ka nu chu a kawrlum tur chu ka pe a, a ni pawh a hlim ve hle mai. Kum dangah kha chuan kan retheih em avâng khan mas kawr pawh kan nei ngailo kha a nia, tûn aṭang chuan ka theih tawpin an tan ka bei ve tawh ang chu, u John-a zârah tunah rih chuan kan nei ta phawt chu a nia.








Chaw ei min siamsak zung zungin kan pathum chuan kan eia, Puipuii erawhin a ei rei lem lo, ka nute ho chuan an lâwm bawk nen an lo pawma, an inchhaih nui hak hak reng mai. U John-a pawh a ngaih a ṭha hle tih a hriat, chaw eikham chuan ka chêt ngailovin ka naute chu an che sawk sawka, tihluih ka tum pawhin an phal der lo.








“Heta i awm chhûng chuan chêt tum suh, kan awm hi kan awl thei che a lawm. Naute saw lo va buaipui zawk rawh" ka bengbulah chuan “I pasal tur rilru hmin theih dân ṭha ber chu a fa i enkawl dân ah a ni" ka nau chiahin a rawn tihsar sar chuan rum zet hian ka lo melha.







Ka nu bulah chuan va ṭhuin Puipuii chu ka pawm chhawka, a ni erawh u John-a nen chuan na titi mawlh mawlh thung. Hna lam vêl bakah kan chhungkaw chanchinte a zawh belha, ka lo en reng mai, thutak zet leh puitling taka ka nu bula a ṭawng chuan mak min tih tîr deuh, ka bula a awmdan nen chuan a inpersan hlak a ni, hepa hi chu a fing a ni e.









Ka nu pawhin a en danah a nel nghal hle tih ka hre thei mai, u John-a pawh a hun taka a mizia siam rem dân athiam riau mai. Lehkhathiam a ni bawka, awmdan tûr tâwk a thiam lutuk tlat.








Kan motor chuang chau nen muturin kan in tintuah zuia, u John-a erawh chhuatah a mut mai angai dâwn a nih hmel, a huphurh loh thu sawi ve mahse hrehawm a ti viau in ka ring, inah kha chuan khum dup nuam takah hlir khân a mu ṭhin sia, engmah a sawi buai hauh lova, a mu zui ve mai bawk.









Kei erawh Puipuii hnute hnek tur chu siam hmasa-in a hma a ka room ṭhin lamah chuan ka lut a, a ni pawh a mut a chhuak tih hriat takin a hâm zui bai bai mai.








Reiloteah a muhil zui ta thuaia, tûnah chuan bialpa neiin kan inah hial ka hruai ve ta mai chu ania, chutah mi narân mai mai a nilo lehnghâl! Khaw miten engtin tak rawn ngai ang maw?








Zingah chuan thawm bengchheng tak avâng chuan Puipuii nên chuan harhin ka thawh chhuah pui zuia, kan ṭhenawm te ho an rawn lêng chu niin,u John-a chu an lo en uluk nasa mai.







“Feli bialpa maw i nih?" tih vêl te chu an lo zâwt zut lehnghala, hahthlâk hian. Khawpumin an hre lehnghâl dâwn a nih hi, pathlawi ka ngaizawng tih nen lam. “Ni e, kha bâk sawi theih vak ka neilo, helaiah hian Christmas rawn hman tuma rawn kal ve mai ka ni e, thil dang a awm lo, Felfeli nupuia dil tura rawn kal ka ni bawk" a tihchuan ka lo nui saka.








Ka nu pawh a ngaih a ṭhat hmel viau mai, chutia kan tho chhuak a lo hmuh chuan u John-a chuan min rawn en in a kiai suka, ṭhenawm ho pawh kan lam an rawn hawi nghal ṭhap mai. “Ehe naute elo? Feli pathlawi i ngaizawng a nimaw? Mahse a hmelṭha sia hnar phal chi a nilo reng a ni? Tiru haw tawh ang u, kan hmuh tawh tho hi" tiin an in en hrek hreka, ka hlauhthâwn ang ngeiin khuaah kan thang leh dawn a nih hi.







Pawi ka ti em em pawh nilovin thu dik piahlamah thubelh hi an nei leh ṭhin si a, chutiang avanga buai vêl chu ka huphurh ani. An chhuah tâk dialah chuan ka nu chuan min rawn koin a bula ṭhu tur chuan min ti a, u John-a pawh a rawn kal hnai ve bawk.









“Awmdan tâwk hria ang cheu, kha ṭhenawm te khan an sawi darh leh ngei dawna, mi hma a awmdan mawi in zawng hrâm hrâm dawn ania" a tihchuan ka bu nghat nghat ringawt.







“Thing kan va ek tawh ange, i naute pawh pâwn lamah an awm kha, khawi naute chu ka lo hruai chhuak ange, rawng lo bâwl rawh" a tihchuan ka hnial bik lo, Puipuii chu ka pe zuia, chutih lai chuan“Keimahin ka lo ek ange, lo châwl rawh khawnge Hrei in dah?" u John-a chuan a lo ti a, a thusawi avâng chuan phawk zetin ka nu nen chuan kan en thung.










“I ek thiam ve dâwn em ni?" ka lo tihchuan a ber naka “Thiam lutuk, lo kal rawh le ka pi" tiin pâwnlam chu hrei nen chuan a pana, ka nu pawh chuan Puipuii pawm chung chuan a zui ve bawk, Lalpa! A va chêt sual loh hrâm ka beisei, rawngbawl chu chhunzawmin ka che rak raka, chutih pah chuan pâwnlam thawm chu ka ngaithla pah bawk.








“Ti tawh lo mai rawh, i thiam lo anih kha" tih rik karah ka naute ho nui vak vak ri te nen lam ka hria a, engtin tak u John-a chuan thing chu ek nimaw? Chutih lai chuan ka nu chu a rawn luta “I ṭhianpa saw va ko lût teh, kan tual zawng zawng a cheh phut hma sâwn, sawtiang te chuan tual lei a chek phut vek dâwn a lawm, makpa interview a duh pawhin thil dangin tirawh se" ka nu in a rawn tihchuan ka nuih za chu ka insum ve ṭang ṭanga, mahse a har lam mah chu ani e.









Pawnah chuan chhuak vatin u John-a chu ka ena, ka nui ve hak lo theilo. Thing chu a lo eh ṭhelh nasa viau chu niin, a sir vel lei char chu a lo chek phut dup tak taka, a thing eh alah chu a lo ek ther sung mai, chu chu ka naute chuan an lo nuih char char chu niin.








“U John duhtawk rawh, ka naute kha eh tir rawh, kha i ek ther fur alâwm, thing i ek chhe zo mai ang" nuihza insum tak chuan ka ti a, a rawn hawi chhuak nghal vut mai “Eh dik a va har em em ve, a awl hmêl tehlul nen" a tihchuan ka nuih hak haka.








Ni e, thing eh hi chu keini ang ek ṭhang tân pawh hian eh nalh hi a har lutuk tlat. Mi ṭhenkhat hian awlsam lutuk angin an han ngai ngawta, mahse tih tak tak hi chuan eh nalh a har ṭalh zêl mai a ni, “Tirawh tui lo chawi zâwk rawh" ka tihchuan a rawn kal ve maia.






Ka nau chuan a hrei chu a laksak vat bawk, tuikhaina tur kan pan lai chuan a bengbulah “Ka nu in makpa interview hmasa ber i fail chian thu a sawi ania" tiin ka nuih leh hak haka, a ner nasa mai “A har em a nihkha, thildang chu ka thiam tawh awm emai" tiin kan ṭin lian ve tak, rawng dahna ṭin lianpui chu ala a.








“Kha chu la suh, a rit lutuk khai a har i ti dâwn a nia, a te kha la rawh" ka tihchuan a lu a thing nghuta. Huiham, hetiang ṭin hi chu tui nen phei chuan mipa tan pawh a rit a nia, a ni tui chawi ṭhang lo chu a chêt sual leh mawlh mai ka hlau, mahse a ti lui miau si a ka dang duh lo.








“A nihchuan bathroom lam pawh chawi angai ania," tiin in chhûngah chuan ka luhsana, chutah le reilote hnuah chuan a rawn ri ta leh rum rum mai, ka nu nen chuan rang takin kan tlanchhuak a, kan thil hmuh avâng chuan ka nu meuh pawh a nui chhuak ve hawk mai.







U John-a chu a tui khai nen lo tlu in a bawk zuara, a tui khai sa chu a baw vek bawk. Chu chu ka naute lah chuan an lo nuih kiah kiah mai bawk, ani lah a zak nge a hawi chhuak duh tawh der lo, ka khawngaih bawk si, ka nuih za bawk si chu nui pat pat in a bulah chuan ṭhu in ka kai tho va.








“Lo awm mai mai tawh rawh, keimahniin kan ti mai ang, a rit ka tih ka tih kha" ka tihlai chuan tuala lungpawng chu kawkin “He thil vang vek hi" a tih bung nghuta, ka naute leh ka nu in an nuih nasa bawk nen a zak ve hle tih ka hre thei.








Inchhûng lamah chuan luh puiin ka mitmeiin ka chhûngte ho chu ka khapa, ka room-ah chuan ka luhpui vat bawk. “I nu khân nêp min ti viau ang tiraw?" a tih chuan ka lu ka thing nak naka “I tih ṭhan loh vang mai mai a nih kha, nidangah chuan ti tawh suh aw, engmah i tih a ngai reng reng lo, keimahni in kan ti thei ania, a hma a ka thusawi kha ka fiamna che mai mai a nih kha, hna i thiam na in a tlin ang ngei i thawka, a ropui lutuk, helam chu tih tum lo mahla kan hrethiam em em che a nia, mitin hian thiam bik kan nei vek, nangmah in thlahrun phah nan hmang suh, i thiam ang kha kan thiam bik lo ania" ka tihchuan min rawn kuaha.









A thaw chhuak suai suai bawk, a hnungah chuan ka bensak thek theka “I thiam loh thil chu zah nan hmang suh, hetiang i ti ngailo tih kan hre vek a lawm, ka nu pawh khân hetiang ti lo mahla a pawm lutuk che a nia, a ni chuan a lang a paua rinngama awm tum ai chuan chhungril aṭanga a rintlak zia fiah ṭhin mi a duha, chutiang mi chu i nih ngei ka beisei" tiin ka phun sap sapa.








A thaw huai mai, “Zahthlak hle mai, mothar chesual chu keimah hi ka ang" a tihchuan ka nui hawk hawka, ani pawh a nui ve suk mai. Pâwn lamah kan chhuah leh lai chuan ka nu chuan a zah loh nan a lo be bawrh bawrha, ka naute nuihza insum sen ṭul mai chu ka khap bawk. An ni pawh an nui tawh lem lo, Puipuii chu a pa lamah rawn kalin an pafa chuan an inpawma.







Keipawh chuan ka rawngbawl chu ka chhunzawm ve ta leha, u John-a pawh engmah tih a tum tawh lem lo, chêt chhiat leh a hlau te pawh aniang, Puipuii chhaih chuan kan bulah chuan an awm ve ta renga.





Chaw eikham lamah chuan ṭhenawm naupang ho pawh u John-a car en leh amah en in an rawn lêng hlawma, car bul velah chuan an infiam bawk nen an bengchheng duh ngei mai, khaw mipui ṭhenkhat chu min hmuak pah nisi u John-a hmel hmuh tumin an rawn leng zuta, nula lah bang lo. U John-a an hmuh ruala hmelṭha an tihzia lo lang ṭhin chu ka hmuh hmaih hauh lo bawk.







A ni lahin tumah a ngaihsak lem lo a, ka nu nen an titi mawlh mawlh reng thung. Chu chuan ka ngaih a ti ṭha viau bawk, dik tak chuan a hmelṭha in a pian a nalha, a sâng ṭha hle bawk. Kei lah heti te mai hmel leh pianah chhuan tur ka neilo va, kan in leh kan chhungkaw dinhmunah lah heti te lek mai kan nihna avâng hian ka hlaurhawng lo thei ṭhin lo, Mahse u John-a lakah erawh chuan rinhlehna ka la nei ngai lo.










Chu ai chuan min ngaihsak em em reng zawk, “Feli chu bialpa i thur ṭha hle mai" nula ṭhenkhat min fiamna chu chhâng lem lo in ka nui ringawta, chhan dân tûr vak ka hre hek lo.







Nilengin inah kan awma, ka la chau bawk nen kei phei chu Puipuii mutpuiin room lamah ka muhil leh daih ringawt, mahni inlum thlen phei chuan thlâ te hi a muang vea, nau te rin tur an awm ta bawk nen thawk a veng hawk lo theilo.







U John-a erawh a thiam zawng in vel chu a thawm ṭha a, tui hmun vel a siam chu ka nute chuan an lo pui paha, kei erawh awl zetin ka mu har har chu a nia.



ZAWMNA.





“U kan mâkpa tur chu a famkim tawp, hausa si hmelṭha bawk, thiam ngah bawk si. A tuichawi leh thing ek kha chu sawi lo ta ila, keichu pathlawi mah nise ka iai hauh lo, a hmelṭhat zia hi khawpumah an sawi leh tawh a nia aw, kan vah kualna lam apiangah min lo zâwt ziah lehnghâl. Dâk vah chungin ka chhâng zêl, ka intihtheih phah ania aw, kan khaw nula ho pawhin an lo star leh tawh lutuk" kan naupang ber dawt chuan a rawn ti a, ka lo nuih hak mai.









“In â lutuk, chutianga awm loh tur, chapona hi min tichhe tu a ni a, chapo reng reng loh tur;tumahin kan hma hun kan hrelova, chapo nghal ngawt loh tur, khâng te kha dinhmun a pheh palh chuan mite min nuihsawhna leh huatna bul a ni thei a nia" tiin ka hrilh dap dapa, khuaa haw tâkah chuan Puipuii pawh ka nauten an la zêl bawk nen ka leh âwl phian mai.









U John-a lah chuan palai tirh phet a tum bawk si, engtin nge kan khaw parawn leh fel lutuk te a lo hriat leh hman ni, ka nu nen an lo in be fel tawh a nih te ka ring rum rum mai. An nupa inṭhen aṭanga kum êm pawh ala liam loh avang erawh chuan ka tîm lo theilo, mi dem kan hlawh lutuk palh ang tih te ka hlaua.








Mahse a niin min chhânna erawh chuan min ti awm nuam sawng sawng thung, a lehlamah chuan tûnlai khawvelah kan ṭhenrual leh chhûngkhat te bak min hre chiang leh sawi tûr vak hria an awm dâwn lova, chu chu a lehlamah ngaihtuah loh theih lah a ni hek lo. Ni e, khawpuiah phei chuan mi chanchin an in ngaihven lem lova, kan chhûngte leh hmelhriatte hi animai kan ngaihtuah tur chu.









“I va in ngaihtuah mûk ve" u John-a chu ka bulah a rawn ṭhu thla a, “Engmah ka ngaihtuah lo, taka i tuihmun siam chu i zo tawh em ni? Helaia ka hruai che chu ka tifuh ta riauin ka hria" tiin ka nui hak haka, bu nghatin ka lu ah chuan a rawn chula, “Tun aṭang chuan rethei lutuka in awm ka phal tawh hauh lovang, i chhûngte chu ka chhûngte an ni a, chutiang chiahin nangpawhin ka chhungte lakah rilru i put ka beisei bawk, ka nu leh pa ka be tawh a" a tihchuan amah chu ka en vata.









“An thinrim em?" ka tihchuan a lu a thing nur nur mai “Teuhlo monu atana an duh ber i ni hial ang chu, kuthnathawh i thiama, inchhûng chet i thiam em em bawka. Chu aia pawimawh a awm hleinem, khawpui nula ka iai lam nilo in, khawpuiah chuan sualna hrang hrang a tamin natna ṭha lo, ruihtheih thil lam thlengin a tama, hmelhriat loh mutpui emaw hnaih mai mai emaw chi a ni tawh lo,i hre tho ang. Nula chenin an bâng tawh lova, chulai kâra nang engmah ti lo, a fa ni miahlo pawh hmangaih taka enkawl thei hmeichhia chu tu in nge hnar phal ang" a tihchuan lai zetin ka nui ringawta.








A kiangah hi chuan sawi tûr ka vân riau zêl “Ka nu erawh chuan ka ṭhen leh mai mai tur leh a hma anga awm lo tur thlang tur erawh chuan min hrilh uluk viau thung. Chu zawng ai chuan an thlah, an tunu hi hmangaih taka enkawl thei tur mi an duha, an thu chu zawm ngei pawh ka tum bawk. Nangmah ah erawh sawisel tur an hre lem lo a nih hmel" a tihchuan “Nang teh in engangin nge min ngaiha, min hmuh?" tih zawhna chu ka pe khauha.








Ka hre châk hle bawk “Nang chu ka hmeichhia, ka hmangaih, ka nupui tur, thawh hreh neilo, thiam thil ngah em em in ka hmu che" a tihduah chuan ka nui haka “Lehkha ka thiamlo tih i sawi tello" ka lo tih chuan a nui maia “Ka ngai pawimawhlo, lehkhathiam tam takin an neih vek loh i nei a lawm,lehkha i thiam kher angailo, lehkhathiamte theih ang chu ka tan chuan i ti thei vek ani, i chhungkua i châwm thei bawka, chu ai ropui a awm lo, lehkhathiam mahse hnathawh nachâng a hriatlohva, a chhûngkua hmangaihna châng a hriat loh chuan engmah lo mai a ni" a thusawi zawh rual chuan ka kuah vang vanga.









“Ka lawm e, ka nihna ang anga min pawm thei dâwn a nihchuan keipawhin i tan leh i fanu tân hian theihtawp ka chhuah zêl ang" ka tihchuan min kuai dakin ka mitah tak chuan a en rana “Kan fanu ti rawh, nakin lawkah a nu ila ni thuai dâwn a lawm, Pathian zara dama nakum kan chuangkai thei a nihchuan kan haw veleh kan innei ang" tiin ka hmuiah chuan a rawn fawp zauha.








Ka chhungten min hmuh ka hlau bawk nen ka hawikuala, tumah an lo awm lo hlauh. “Khatiangin hun lo deuhah ti tawh suh, min hmu mai anga sin, khawi maw i chhûn ei tur ka lo siam ang" tiin ka tho chhuaka, a rilru ka hre chianga, kan in emaw ka chhûngte emaw a lakah ka zahpui hauh lo, a mah pawhin min hmusit zâwng emaw nuam lo ti hmêl pawh nise a ti lang ngailo, hei tak hi ka duh na tizual tu pawh ani.






(MUTTUI U,NEXT AH RAWN TIH THUI TUM ANG)