CHAPTER 22
BY MAWITEI BAWITLUNG
Ur lâwk zân a rawn thlen chuan phur zetin ka insiam malh malha, Sama te inah tlaivâr ve kan tum bawk nen kawrlum phiar chu ha in kekawr chhunglum ka mal phuar ṭang chu ka ha bawka, ka hmai chu ka chei ve bawk.
“Nu Chhing, tlaivâr ve ka tuma ka chhuak dawn a nia aw, zanin chu ka lo haw lo ang" tiin pawnlam ka pana, Huni erawh kan sâwm ve nangin a hnial ta kha ania, nuam a tihkha ka ring lo sa hrim hrima, keilahin Samuela hi chân ka tum tawh der lo. Ka tân chuan ka engkim a ni tawh miaua, a ni rilru erawh ka hre lo thung.
“Sam" an in bul ka thlen rual chuan ka au nghal lâng lâng a, a rawn chhuak nghal vat mai. Ka lamah rawn kal hnaiin min kuah nghal hluna “A vawt iti ang, tirawh i lût ang hmiang" a tihchuan ngawi reng chuan ka zui luta, Rengpuia te ho pawh an lo awm vek tawha, ar hmul an lo pawt mawlh mawlh mai.
“I va rawn tlai em em ve? In chei chiam a ngai hleinem, bialpa te hmuha nalh loh hi i hlau thei lutuk, kha midangin thawmhnaw pângngai kan hak laiin a rawn inchei leh vur tawh kha" Valpuia chuan a rawn tinghal zata, hepa ṭawngthei lutuk hi chu aw.
“Mi hi hmu theilo viau suh, inchei silo ngatinge hnathawh thawmhnaw i hak loh? Nangpawhin Siamtei laka tlaktlum loh i hlauh vâng em ni?" tiin ka chhâng ve a, a ner nasa em em lehnghâl, midang chu an lo nui dar dar thunga. Sama chuan alama min pawt hnaiin “Ka bialnu hi a hmelṭha ema, an awt che a nih hi, bialnu nei ve mahse nang an tluk lo miau chea" a tihchuan Manuni te ho chu an rawn pawr nasa mai.
Tumah erawhin huatah an la lo thung, kan inhrechiang hlawm bawka, in fiam bawrh bawrh an hrat bawk nen tumahin engtianga na pawhin infiam mahse an thinrim duh ngai hauhlo, an rilru taka sawi an nilo tih an inhriatsak miaua.
“Kha ar hi lo puah rawh u, a mît kha in ti keh hlauh ange, a kha dawn teh ania, nalh zurh mah ula in chêt ve loh chuan in eilo ang" tiin an ar rawh sa chu kan puah tur chuan an rawn chhawpa, engmah sawi tawh lem lo chuan kan puah dun nghal mial miala, Sama chuan a puah ti ila a dik mah zawk, kei erawhin a khât tawkin ka lo pui tih loh chu ka lo en tawp ringawt.
Kan zawh rual chuan midang chuan buaipui lehin keini erawh tualah meichhem turin kan chhuak, reivak lo hnuah chhêm alhin thing chu kan vur hluah bawk, ṭhutthleng sei chu dah in inchhûng lamah kan lût leh riha, kawr lum ha mah ila thlasik meuh zawng a vawt vin tuk mai.
“Kan lo vil ang, pâwn lamah khân va zai rawh u" Kimbawiha te chuan tiin midang pawhin kan hnial lem lo, a bialnu nen chuan awm ranin kan chhuahsan hlawma, Sama pi te erawh an mu lût daih tawh thung, an in thar pawh nakum February vêlah chuan luah theih a an peih tawh ka ring, avaiin complete hman lo mahsela luah hman erawh a mistiri lam te khân an in ring kha a nia.
A inkawp te te chuan ṭhu hlawmin Saman guitar a perha, kan zai ṭhap ṭhap mai “Kumpui sûl a lo vei châng hian, lunglên a tho leh ṭhin" tihchu thu tak ran chuan kan sa hlawma, a hla a nalh bawka. Lung a lêng ve vawng vawng mai, keimah ni chang lo pawh hmun tin deuh thaw ah zai ri leh ṭhianho a intihlim ri chu a ri nuka, a khât tawkin halpuah hâl ri a awm reng bawk.
Vân lam ka en chho a, arsi leh thla te, thlasik kawng te chu a lang paw ruiha, eng emaw ti tak hian lung a lêng riau, khawpui angin in a tam ve lo va, chuvang te pawh chu nge mawni thla eng mawi zia chu a lang chiang bik lutuk tlat, khaw hual chhuaka thing te chu thla eng zet chuan a chhun paw raiha, ral khata tlang leh myanmar lam tlâng dung thlengin a lang ruak mai.
Chûngte chuan eng emaw ti tak hian zûn aneia, chu thlasik boruak leh Lal pian hun thleng chho mek chuan lunglen rûk na leh eng emaw riau hian min siam ka timai, ka hlim tho bawk si. Sama chu ka ngheng hnai ṭalh ṭalha, thingtlâng boruak hi a nuam takzet, ka vawikhat Christmas hmanna tur a ni bawk nen duhthusam a khûm chiang khawp mai.
Ka chhungte rawn hman ve na atân pawh ka awt khawp mai, “Le tûnah chuan Kum sul liam hnu ve thung aw" tiin a hla chu an la nghal zata, he hlaah meuh chuan Sama pawh a cool raih mai, ni e a hla ah hian chhûngte kim tawhloa, chhungkaw kima hunpui hmang ve thei tawh lo te tana lunglên vawng vawng na tur hla thu a tam miaua.
Sama chuan a guitar chu midang pe in Valpuia chuan a perh ve ta thunga, a kutah chuan ka chelh saka, ka nuih var var mai. Mei enga a hmel lang sen deuh chuan a ti cool zualin a hmelṭha zet chu thlir nin a har lam mah a ni e, hepa hi engtin nge a tirah khân ka lo vei em em loh theih zawk ni? Ka lo â tak zet.
Hetiang khawpa zûn ngah leh cool, a mawi tâwk leh mit la tawka awm thiam, thinlung kuai tâwk leka ṭawng dan tawk thiam bawk si hi veiloh theihloh a lo nih ber mai hi.
Daduhi SIKNI ÊNG tihchu sa leh ṭhap ṭhap in keipawhin ka duh bawk nen ka sa uar ve nasa mai, ka kut chu bengin Samuela chu ka nek zauh zauha “A va han nuam tak, hei aia nuam tih ka la neilo, ka Christmas hman tawh zawng zawngah a la nuam ber" tiin Samuela chu ka kuaha, ka nui ver ver bawk.
Min nuih sukin min rawn kuah leta, ka dara khabe nghatin a thaw chhuak suai suai bawk. Reivak lo hnuah Kimbawiha ten arsa chu a ei theih tawh thu an rawn sawi avângin inchhûng lamah lutin thei tui nen chuan kan hmeh hlawma, hetia kan in kawm ngheh tâk hnu hian zu pawh an in ta meuhlova, Sama hi chuan a hma pawh khân a in ngai lo hrim hrima.
Arbawp chu keih hmarh hmarhin Cola chu ka in nghal khalha, a va han tui tak. “Ka lei ka lem tel dâwn in ka hria, a nuam e. Kumhlui thlah zan pawh hmang leh ang u aw" tiin ka ṭawng siam siama, midang pawh chu an lo phur hlawm viau mai.
Kum tharah chuan Sama a awm tawh dâwn silova, helaia a awm lai tal hi chuan a tam thei ang ber hun hman dun ka duh, ar kan ei zawh meuh chuan 11 a ri der tawh mai, kan halmawi chu keng chhuakin pâwnlamah kan chhuaka, halpuah anga thawm nei lutuk anilo bawk nên kan in thlahrung duh lemlo, helamah chuan an khap ve tho nangin hunpui neih chhunah meuh hi chuan inhriatthiamna an nei liana, a pawng ataka inhauh an tum lem lo.
A dik ve tho mai, kumkhat ah vawikhat chiah hetiang tihna hun hi kan neia, kan intihhlimna neih ve chhun a nihna anga a nuam thei ang bera hman ve te hi a ngai miaua, mi ram keini Mizoram aia lian leh hausa pui pui mahin an football stadiumah te an hmang ve tho a lâwm e.
Lighter chuan halin a rawn alh zuai zuai lai chuan vai kualin Samuela nen chuan kan in um kuala, kan nui dun hak hak mai. Midang bul aṭang chuan kal fal deuhin thlaêng ringin an in sak thar a ban leh a chhuat ṭhenkhat an chhûn tawhah chuan ṭhu dunin kan in nghêng chiala, thla a êng fiah bawk nen a inhmuh chian theih viau mai.
Hmêl erawh a lang lutuk lo thung, “Vawt viau mahse a nuamin zanin hi a mawi zual takzet" tiin ka phun sapa, ka hnunglam aṭanga min kuah runin vanlam hawi chuan a dâk ve vauh vauh mai. Arsi thlawk leh ṭhinte chu enin ka nui leh var var ṭhin, mihring hian hlimna tawn thar meuh hi chuan inthup reng theih hi a lo nilo, chhûngril aṭanga hlimna hi chuan kan pâwnlam lan dân thlengin a thlak thei chu anih hi.
“Khing zawng zawng ai khian i mawi zawk, ka mitah chuan nang hi i mawi ber" a rawn ti thum supa, ka nui leh hak mai. “Ka mawi ber tak tak maw? A tlai ve ta hle mai, Christmas a ni ṭêp e" tiin sana chu enin Sama chu ka nghêng hnai zata.
“Mawi ka tihchuan i mawi a nimai, ka hmangaih aibaka mawi ka mitah an awm theih i ring em ni" tisapin mitchhing tur chuan min ti zuia, eng tak chu tih tum chu nimaw? Engmah zâwt lo chuan ka mit chu ka chhing ve mai bawka.
Ka nghâwng rawn vawt deuh thlarah chuan mengchhuakin ka nghâwnga thla in a chhun zawnga tle sar sar ka hmuh chuan Sama lam hawi zâwng chuan ka inhera “Merry Christmas ka hmangaih" a rawn tihchuan ka kuah nghal thlawp mai. A ṭhi min pêk chu chiang takin hmu theilo mah ila rangkachak hmanga siam a ni tih ka hria.
“Merry Christmas le, i thil tur pawh ka kawl tak a sin, bagah a la awm thunga" ka tihchuan min rawn kuah letin ka nghâwngah chuan a fawp zauha, ka nute pawisa thawnin sana leh kutkawr bakah lukhum phiar ka inthawn tir kha a nia, chu erawh nakinah ka pe mai ang chu.
“Ka lâwm e aw Sam, ka beisei piahlam a ni" tiin a biangah chuan ka fawh saka, ka hâm zui bai bai bawk. “Ka tlaivâr ve thei dâwn lo in ka hria, ka mut hi a chhuak lutuk" ka tihchuan min pawm tho nawlhin an insak aṭang chuan min chhuhpuia, in lam chu min panpui nghal zat bawk.
“Roomah kan awm dâwn ania, rawn bengchheng vak lo ula, kan mut a chhuak tawh a nih hi" a tihchuan midang lah chuan min lo fiam leh tawh, an ngeiawm ve thlawt a ni.
A room-a kan luh dâwn chuan ka bag chu la in ka zui nghala, a tâna ka lei ho chu phawrhin keimah chuan sana chu ka bun tîr nghal bawk, lukhum phiar pawh chu khum tirin a kutkawr erawh a bike khalha a bun tura ka lei a ni a, kan dah rih thung.
“Mu ila" a tihchuan ka en ha a “Mu hrang la" ka tihchuan rang lutuk hian a lu thingin min pawt mu nghal zat mai. “Kan pahnihin kan mu ang, ṭawng tawh lo la, mut na hun kan ngah tawh loh hi, muhil vat zawk rawh" a tihchuan hnial tawh bik lo chuan amah kuah chung chuan ka mu ṭha a, dik tak chuan khua a vawt bawk nen mahni a mut chu a hrehawm lam mah tawh nen engmah kan tih miau loh avangin ka pawiti duh ta lo mai zawk a ni.
Kan inneih hma chu invawng turin kan intiam ve ve a, a ni pawh hian bawhpelh a tum biklo, thaw chhuak ham hamin ka mit chu ka chhing zui riai riaia, pâwnlama midang zaithawm te chuan min awi pah ka timai, mut an ti chhuak zual hle bawk nen reiloah Samuela kuah chung chuan ka mu hil ta thuaia.
Ka mutui viau lehnghâl, zingah min rawn kaihthawh tâkah chuan mit nuai chat chatin ka ṭhu chhuaka, khabe dawm meuha min lo en tu chu en letin ka nuihsak mai “Morning" ka tihchuan min rawn wish lêt ve supa.
“I mutui em?" dam dup leh tham deuh chuan rawn tiin a ṭhu chhuak zuia, keipawh chu ka bu nghat nghat mai. Ka mutui tih piahlam a ni, a pangtilum ka ngheng reng avang te pawh khân ania'ng, a nuam ka ti bawk.
Room aṭanga kan chhuah chuan midang pawh chu ṭhutthleng vêlah chuan puan sinin an lo ṭhu mu hlawma, an muttui hmêl viau tho mai. An harh hma a haw ka duhthu sawiin Sama chuan pâwn thleng min thlaha, inkhâwm min rawn sâwm tur thu a sawi chu bûk pui nghatin in lam pan chuan ka kal nghal hlawk hlawka, ka mut lah chu a la chhuak em em lehnghâl, vawiin chu kan ni lûk dâwn a nih hi.
MUTTUI ULE.