KA HMANGAIH THINGTLANGPA BY MAWITEI BAWITLUNG (Completed)

[mawitei bawihtlung]

KA HMANGAIH THINGTLANGPA







CHAPTER 35







“Sir vawiin i rawn kal lo a, tinge?" kan haw lam chu kha Mary kha kan tâwk nawlha, ka mood-a ti off nghal vek. Kan buai laia Saman ka laka hmanrua a a hman nu a nih avang hrim hrim pawhin ka ngeih lo, bakah a awm danah hian Sam hi a duh tih ka hre chiang hle bawk, Sama kuah chung chuan bike aṭanga chhuk pawh tum lo chuan ka ṭhu ngara.






“Hei Duati hi a rawn zin sia ka lênpui a nih hi, kan kal phawt ange" Sama chuan tiin bike chu a tlanchhuah tir zuia, Mary-ina thik hmel taka min en chu ka hmuh hmaih lo.






In kan thlen rual chuan chhuk vatin ka intuai mâm thuak thuaka, “Khanu nena in thawk dûn hi ka ning, ninawm engmah ka sawi leh peihlo ka chau" tiin in chu hawngin ka lût zuia, ka inthlak peih lo chuan room chu panin khumah chuan ka mu thla hnawka.






Khawpui hi chu mihring kan tam leh lutuka, thawm bengchheng lutuk vâng ringawt pawh hian ka lu a na hlui mai. Hmun reh ah ka awm rei ve tak vang te pawh a niang, a boruak hi ka zo lo lek lek tawh mai. Bâkah ka motor chuang chau nen châwl hman lek lo in kan awm bawk sia ka chau zual.





Ka bulah chuan rawn mu ve hnawkin min rawn kuaha “Awi kal teh, ninawm ka chau ania" tiin mit chhing chung chuan ka kut chuan ka vai hlaka, a rawn nui hak mai. “Ka lo duat ang che" tiin a ṭhu chhuaka, ka lu chu rawn la kangin amalah chuan a nghata, a chûl nghal hliau hliau mai.






Insiam remin a dul zâwnah chuan ka bei thana “Sam ka hmangaih che min kalsan miah suh se" mutchhuak aw zet chuan tiin ka kuah nghet sauha “Hahdam rawh, min chan ngai lovang, min hrechiang a ni lo'm ni? Nang lo an awm ngai lovang ka tih kha" tiin ka hnute chu a rawn hum chata, a hmet nghal nak nak bawk. Mipa hi chuan hnute an lawm hi a reh ngai pawhin ka ring lo, hnute hi an buaipui ber mai chu anih hi.







Hau duh bik lo chuan ka thaw zui sak saka, ka muhil zui ta thuaia.




Tlai lamah chuan min kai tho in rawng a lo bawl vek tawh a nih hmel, a biangah chuan ka chuk sak zauha. A lâwm tawk a tling leh em em tawh mai, kan pahnih chuan chaw chu ei dunin kan titi pah mawlh mawlha “Duati zanin chu i nute va hmu ang hmiang?" ka chaw ei lai chu tâwp in ka en a, a thu rawn sawi chuan ka nui lai a ti tawp chat mai.






“Mahse Sam, min hmu duh dâwn em ni?" tiin ka chaw ei lai chu ka tâwp riha. “I nu kha ka hmu a, ani pawhin angai viau che tih ka hria alâwm, nang pawhin i chhûngte chu i ngai a ni lo'm ni? Ka lakah in thup suh, i thisen zawmpuite an ni a, i thlakhlel tih pawh ka hria, i pa rilru ber hi kan hmin angai a nimai, a ṭul leh a hmaah kan bawkkhup mai ang chu" tiin fiamthu chu a zep tela, ka nui hak mai.








A rûk tak chuan hmuh ka chak rualin ka hreh bawk. Ni e, ka nu pawh ka ngaia, mahse min tui thlar thu an sawi aṭang kha chuan ka be leh tawh ngai lo anih kha. Engtin nge min lo tih anga, engin nge min lo hmuak dawn ka hrelo, ka zâm ru takzet. Chutih rual erawhin Sama anga mi hrethiam tu ka nei chu ka vânnei ka inti bawk.







Chaw eikham chuan insiamin kan in lam chu kan pan duna, ka zâm lutuk chu ka thaw leh hak ṭhin.Ka mal chung a ka kut dah chu ka insual tîr thul, Sama chuan a hrethiam nge ka kut chu rawn vuanin min thlamuana, ka nui sak mai.







Kan in zâwnah chuan dingin ka en vang vanga “Lut ang le, zâm hauh suh. Hlauh tur i neilo; vêng tûr che in i bulah ka awm reng a nia" tisupin min kaiin kawngka chu a kik zuia, ka nu aw ngeiin a lo chhawn tâkah chuan min hruai lûtin amah chuan hma a hruaia.







“Bawihi" ka nu chuan min rawn panin min kuaha, ka lo kuah lêt ve nghal vata. Ka mittui a hnam sawk bawk “I nu leh pa hian thil kan tisual a ni, i hlimna turah ngaiin mipa i hmangaih miah loh neih tir kan lo tum che kha kan tisual a ni, min ngaidam rawh aw" a rawn tisap sapa.






“Nu" thildang ka sawi thei lo, ka ṭah khuma, dik tak chuan Sama nen kan in neih hlim kha chuan ka kianga awm tur khân amah bak beisei ka neilo “Pa a, lo chhuak teh. Bawihtei a lo haw asin" ka nu au rual chuan ka naute ho pawh chu an rawn chhuaka, ka pa erawh meng thim khap chungin a rawn chhuak thung.







Thinphu dep depa kan lo en lai chuan Sama hmaah tak chuan a rawn dinga “Ila rawn kal ngam amaw? Kan fanu ngei kan hnêna ṭangin i la hrang tawha, chuti chung chuan he in hi i la rawn rap ngam a maw?" a tihchuan hlauthâwng takin ka lo ena, ka nu pawh chuan a lo khap vat mai.







“Ni e, ka nupui tâna a chhungkaw neih chhun in nih avângin ka rawn kal a ni, tin in fanu hi in lak aṭangin ka lasawn lova, ka nupui ni turin ka hruai mai zawk a ni. Ka hmangaiha, MLA fapa chu ka tluk ve kher lo maithei; mahse in fanu hi rethei taka awm tur chuan ka siam ngai lovang. Ni e, kei chuan chhûngkua pek tur ka nei lova, ka nu leh pa thlengin ka chân tawh bawk, keimah bâk hi pek tur ka neilo, mahsela mi nupuite awt turin ka siam ngai lovang a, a mittui pawh ka tlak tîr hek lovang. Enkawl ka duha, ka kianga awm reng turin ka duh, sum tam tak chu ka thawk chhuak lo ani thei; mahsela ka fate nena rual awt reng renga awm turin ka siam ngai lovang" tiin ka pa chu a melh lêt rana.









Ka nu nen chuan kan lo en reng thung, min hmangaihzia a sawi chhuahna chuan min hneh takzet bawk. “I phatsanin i iai leh mai lovang maw? Hmeichhe dang lakah i kalsan leh si ange" a tihchuan Sama chu a khi saka, “I fanu hi thu mai mai in ka hmangaih lova, a rawn lan hma khân duh chu ni ila nupui chu ka nei tawh ang. Mahsela in fanu hi ka thinlung leh taksa, ka rilru zawng zawngin ka hmangaiha, ka phatsan ngai lovang, ka thusawi hi ka sawi liam mai mai lova, ka hlen ngei bawk ang. A fiahnana ka nun hlan angai a nih pawhin ka hlan mai ang" inringtawk tak chuan a ti leha.








Ka pa chu a ngawi vung vung mai, engtin nge a chhan ang tiin ngawi reng chuan kan lo nghâk ṭhapa “A ṭha e, kha thu kha a ni ka hriat duh chu ni. Kan fanu hi nangmah avangin a ṭap tawha, tûn hnuah chuan a mittui ti tla leh tawh suh ang che. Hre reng rawh, a mipa hmangaih hmasak ber a nu leh pa bulah hial a ṭah chhan i ni tih hre reng la, khatianga ṭap chunga rawn haw turin siam nawn tawh suh ang che. Tûnah chuan thlamuang takin awm tawh rawh u" a tihchuan ka nu leh ka naute ho nen chuan ka pa chu kan kuah khawma.







Ka ṭap chhuak hlap hlap mai, ka beisei loh lutuka thil kaltluang ta si chuan min ti ṭap lo theilo “Ṭap reng reng suh, i ṭah chuan i pasal hi i zui haw tawh lovang" a rawn tihchuan nui hakin Sama lam chu ka pana, min lo nuih ve suk mai. A kutah vuanin ka pa in ṭhu tura min tih avâng chuan sofa ah chuan kan ṭhu hlawma, thil hrang hrang sawiin Sama pawhin a kaisan thute chu a sawi vea.








Mipa ho inkâwm khawmin hmeichhe ho chu kan inkâwm hrang ve bawka “A hmangaih zia che ka hmuh sak thei a ni, i pa nen pawh kan inthiam lo teh a sin. Mahse rilru na zeta rawn haw tir tu che a nihna avâng khân kan hlauhthâwn pui che a, MLA fapa lah khân a duh lutuk che a kan hriat avang khan i tân neih mai a ṭhat zâwk kha kan ringa, i pa nên hian kan dampui reng dâwn lo che a. I naute zawng zawng pawh hi kan ngaihtuah lo theilo, kan awm loh hnua hrehawm taka in awm hi kan hlauh vang ania kan nawr luih fo cheu ni" a tih dap dap chuan ka lo bu nghata.








“Nu, Sama chu a danglam bîk asin, keilo hmeichhe dang a be ngailova. A chhaih pawh a chhaih ngailo, engtik laiin nge ka hmangaih ka hre bik lova, mahse awlsam taka min tih nat theih rualin awlsam tak bawkin ka ngaidam leh zung zunga. Keimah pawh hi ka inhrethiam tawh bik lo, a tir kha chuan ṭhian ang bak kha chuan ka en thei miah lova, mahse zawi zawiin ka hmangaih chho a, tûnah chuan ka kalsan theih tawh pawh ka ring lo" tiin ka rilru dik tak chu ka nu ka hrilha.







A ni pawhin ka kut chu beng thek thekin min nuih var vara “I pa lakah pawh ka awm dân chiah alawm, a leh lamah chuan mipate hi chuan hmangaih an neih pawhin tihlan mai hi an hreha, an in lâk pa na anih ve avâng hian hmeichhe tân chuan awmdân thiam hi a har fo a sin. Ṭul lovah rilru a hah phah nek zêl lehnghâl, an rilru hi sawi chhuah an hreh tlat zelna hian a châng chuan inṭhenna a chawk chhuak fo reng a sin" tiin ka pate lam chu a en pheia.







Ka naute ho pawh eng lo sawi lo chuan an ngawi ṭhap mai, “Kan haw tawh dâwn ange, a tlai ta riau mai" tiin Sama chu a rawn ding chhuaka, ka pa chuan “Zanin chu riak rawh u, Nunui room kha a âwl reng a lawm, zîngah chaw te kan eikhâwm ang chu. A haw leh phei chuan kan inhmu leh mai mai tawh nâng, kan fanu hi in khuaah a tlei ropui mai sia" tiin a nui hak haka.






Sama pawhin a hnial duh lêm lo, ṭhu lehin kan inkâwm khawma, ka naute erawh an mu lût ta thunga. “Hetiang te kan nih takah chuan thuam chhawm te pawh hâwn nghal sela a ṭha ang" ka pa in a tihchuan Sama chuan a lo hnial vata, “Bungrua kan ngah sa lutuka, a buaithlâk. Bâkah hei amah hian a hlawhin a leia, ama rawn ken sa nen heta awm hi chu amah in fanu anihna anga in kawlah awm rawh se, a haw hunah ka haw ve thei dâwn silova, a buai lutuk palh ang" tiin keichu min rawn ena.







Ka ngaih dan ve tho a ni, ka thawmhnaw tam zâwk ka keng tho bawk nen ka bungraw lei belh nên chuan kan room a hnawk dâwn lutuk tlat. Ka pa te chuan lungsi zân lo chuan an pawm ta tho a, rei meng tawh lêm lo chuan ka room-ah chuan kan inzui luta.






“Hei hi a nih hi ka room ve chu" tiin ka room chhûng zau ve tâwk tak chu ka en tira, a ni pawh a hawi kual vauh vauh mai. Banga ka school kal lai vêl in tar chu a enkual dan dana, ka high school kal lai thlalak a en lai chuan a nui vur vur mai.






“I inhmeh hle mai, i biang a la puar peng lehnghâl" tiin a nui huk huka, high school ka nihlai kha chuan ka thau ve thei bawk nen mi tih luih kha ka hlawh nasa viau zel.






“Ka thau a lawm, mu tawh ang. Naktuk hna kal i ngai tawh dâwn si a, ka nute inah hian ka lo awm tlang dawn emawni" ka tihchuan a rem ti vak lo a nih hmel.





“I rawn zin ve vang vanga, kan pahniha hun hman ka duh" tiin khumah chuan min mutpuia, chuveleh amah chu kuahin “Ka lâwm e aw, nangmah avângin ka chhûngte nen kan in biak leh theih phaha" tiin a awmah chuan ka bei thana.






“I tan chuan engpawh ka ti zel ang, ka hmangaih che a, i hlimna tur zel ka zawng dâwn a lawm. Fa kan neih hunah pi leh pu an la mamawh ngei dâwn si a, baihvai taka an awma, nang khawhar taka i awm ka phal bik hleinem" tiin ka chalah chuan a fawpa, ka nui seih mai.





Ka tan hian a lo va han hlu tak em, kan in tawn ṭan dan aṭang rêngin engkim hi Pathian ruat lawk a ang ka ti. Kan hmangaihte kan tawn theih nân mi dang dang min tawn tîr hrep hnuah zirlai ṭha tak tak zir tur min chhawp chhuah sak ṭhina.



NAKTUK ZANAH LAST KAN TUM ANG, TIN KA NEXT STORY TUR KA LALPA TIH HI LIKE LEH CONMENT A ZIRIN STORYFB BIKAH CHUAN KA POST ANGA, TÛNLAIAH LIKE LEH COMMENT HMUH ṬHAT A HAR TAWH SIA MIN LO PUI HRAM HRAM DAWN ANIA, CHAWLH TUM KHA KA NIA, MAHSE YOUTUBE DAH HMA IN HEI CHU KAN DAH LEH MAI DAWN NIA AW.