LET's LOVE AGAIN BY Ziki_nu (Completed)

[ngaia]

LET's LOVE AGAIN



By Ziki nu


Chapter-24



Zankhua in ka muhil ta miahlo a, zinga U Mama lo thawh lai chuan eirawng ka lo bawl mek a, nizan thil thleng chu sawi chhuak tawh rihlo mah ila kan rilruah erawh kan pai ru reng tih chu kan inhre tawn tho in ka ring.



"I va tho hma âwm ve" a tih chuan ka lo nuih mai a, a thingpui tur ka thlitsak laiin a lo inphih fai ve mek bawk a, kan boruak chu a nuam vaklo.



Thingpui ka pek lai chuan vawiin lama a chhuahna turte min hrilh a, bazar tak chu keimah nen a duh avangin chhungteho a tlawh kual ve dawn a, tunkar chhung hun a awm bawk nen a hmanhmawh vak biklo niin ka hria.



"U Dintei te chu.. " ka ti dek dek chu "Keiman ka buaipui mai ang" a lo tih vang chuan sawi zawm lovin ka ngawi dak a, "Chaw ei lo siam la, ka han chhuak chho ve lawk ange" tiin pawnah a chhuak zui nghal mai bawk.




A chhuah rual chuan thawk ka la vak ringawt a, ka lungphu rang nghal dut dut chu duh lovin ka kawrchhanah ka âwm chu ka dawm vang vang a, mahse ka hlauhthawnna te chuan min la kiansan thei meuhlo a ni.



Rintea hnen atangin morning wishes leh engnge ka an tih message ka dawng a, ka that thu bak chu han chhan let vak ngaihna pawh ka hrelo.


"Tlaiah kan inah chaw lo ei nghal ta che, zanah i tlang ve nghal anga" a tih chuan U Mama vangin ka hnial a, a rawn zin ve laia hmun danga chaw han ei san daih chu thil tih chi pawh a ni lo ang.



"Anih chuan zanah ka rawn hruai mai ang che, i u pawh lo hrilh lawk la" a tih leh takah chuan aw ka lo pawh ve thuai a, chaw ei ka siam zawh hnuah pawh ka u Mama chu a rawn chhuk mai loh avangin ko turin ka han chhuak chho ve a, U Dintei te in chu tala lian puiin a lo inkalh a, kawngpui ka chhuah chuan U Mama leh kan in luah neitu nu te lo dingdun chu ka hmuh a, an ni pawhin min rawn en ve chiah bawk.



Thu pawimawh an sawi tih hriat takin min en phawk dun ang reng viau a, ka inthlahrung leh deuh chuan "Chaw ei ka peih tawh" tiin ka let San leh mai a, rilru ah erawh a awm ve reng mai.



Chaw ka ei laiin a rawn let a, silhmunah a kut sil mawlh mawlhin dawhkan chu a rawn kil ve mai bawk a, engmah a sawi hmasak siloh chuan ka zawt hreh ve riau a, nuamlo ka ti tlat.



"Mazari nen pawh kan inbia a, Dintei chu a nu ten an rawn hruai dawn a, kan khaw lamah a awm ang, a nu leh pate bulah awm se a tha ber, a tir atang khan dah zalen lovin khuahkhirh nghal se tha mai tur ania" a ti nuah nuah a, "Anih chuan a tha mai alawm, helamah pawh U Mazari tan a buaithlak mai mai a, buaipui loh tak tak theih a ni silo a" ka lo tih ve chuan a bu nghut nghut a.


"Anih leh mipa kha" ka tih leh chuan min en chian em avangin ka tim leh deuh a, ka thleng chu ka en zui ngawt ngawt mai.


"Nizan khan veng hruaituten an kawm zui tih zawng kan hriatdan a ni mai, jail chu a tang em lo anga, mahse a tibuai ngam tawhlo ang che" a ti a, ka beisei aia a tawngkam dam thlup vang chuan ka awm a nuam huai huai thei bawk.



"Thleng chu ka sil turah dah mai rawh" a tih vangin ka tlai deuh tawh bawk nen ka insiam zui nghal a, school ka thlen chuan tan hun chiah chiah vel a ni.



Kan thawhpui thenkhatten chawlh an lak hmasak nual avangin kan indaih vaklo a, nilengin class kan la a tih theih ang.


Chhun chawlh bak hun awl kan nei thei meuhlo a, canteen lama thil ei tura kan kal laiin Aruata chuan "Bhabhi a rai kha in hre ve em?" a lo ti phawng a, Riny nen kan hawi rual zawt nghe nghe.


"A rai maw?" ka thiannu chuan a ti hlut a, "Rai ang chu, a hun ve tawh alawm" pakhatin lo ti mai mah se zawhna kan la nei tho.


"Mahse Nunpuia khan a duh vaklo emaw ka tia, an inneih rei pawh kan ring hleinem?" Riny chuan a ti ta chiah reng a, "Aw,, an inhmangaih chawp ve a ni mai alawm, hmanlai pawn arrange marriage deuh vekin anih kha kan pi leh pite an inneih thin" pakhatin a lo ti ve bawk a, an sawi tui dun khawp mai.



"Neih pawh an la innei pangngai lo a ni lawm ni, engnge a hmeichhe chhungte lam chanchin hi ni reng reng a?" ka lo tih ve chuan min ner khum nangin "Chanchin an nei tawh lo, an fanu chu an tuithlar hmak tawh, i nei duhlo vel a Nunpuia te chu puitling deuh asin, tihian duh vaklo chung pawhin a la nei lui hram hram a" a tia, a thianpa hi chu a tan ve ngawt mai.



"A puitlin loh vang anih hi hetiang dinhmuna a din, puitling ni se vai nu a rawn ru haw ringawt nang" tiin Riny'n min lo tan ve thung a, mi nupa chungchang sawiin kan inhnial kan inhnial ringawt a, a zialo lam deuh chu a ni.



Tlaia ka haw chuan U Mama'n eirawng a lo bawl mek a, U Hlimi nen video call a an lo inbiak avangin be buai duh lem lovin pindanah ka lut tlang a, ka inthlak zawha ka chhuah leh chuan naupangho nen kan han inbe ve leh nawk nawk a, kan nui ho ve dar dar mai.



Zanriah ei laiin Rintea te nena jam kan tum thu chu ka hrilh ve ta chauh a, nizan lawkah khatiang thil duhawm lo kha ka tawng bawk Nen a remti chiah lo a, mahse Rintea te jam room a nih thu leh kan thiante nen kan nih dawn thu ka sawi chuan a phal hram a, haw har lo tur in min ti thung.



Dar 7 velah Rintea'n min rawn hruai a, zan lama ei tur eng eng emaw kan lei kawi bawk a, kan thlen ve meuh chuan midangho an lo awm kim viau tawh.



Richarda chuan min lo hui sawk sawkin a bulah thutna awlah chuan min pawt thu a, midangin Rintea an lo ko ve sek bawk nen kan thlen hlim atangin kan la inbe mumal leh ta miahlo.



Richarda tih loh midang chu an school kalpui thinte an nih hlawm avangin ka hre ve vaklo a, han biak nel dan tur pawh ka hre chiahlo.


Hmeichhe pakhat a awm ve a, min biak loh vangin ka be biklo bawk a, an thawm a that viau laiin keichu a sirah ka lo thu ve mai mai a ni ber.


"Lo zai ve rawh" tia Rintea'n min rawn hui zauh chuan lu ka lo thinsan mai a, dik tak chuan nuam ka ti chiah tawhlo a ni.


"Nuam i ti vak nange" ka bula rawn thut paha a tih leh chuan "Ti lo chuanglo e, mahse haw har thei ka nilo a" ka tih chuan a lo bu ve nghut nghut a, "Ka thlah vat dawn che nia, i rilte a tam chuan ei tur a awm saw" tiin kan thil lei ho kan dahna lam chu a melh zawk a, lu ka buk nghat takah chuan mawi deuha min nuih sukin ka sam a rawn tuai zauh a, a thiante awmna lam panin a kal leh mai bawk.



Dar 9 a rik chuan riltam an sawi sap sap tawh a, an zinga hmeichhia ber khan min rawn en in "I zai ve peihloh chuan ei tur kha lo siam la" a lo ti reuh a, kei ai chuan a upat ka ringlo, hnial lem lovin ka siam ve mai bawk a, thil te kan ei ho tak ah chuan an nui ho dar dar reng a, keipawh ka nui ka nui ve mai.


"Haw I duh hunah sawi tawp rawh aw" a tih chuan "Tunah pawh a pawi tawhlo" tiin sana chu ka en zawk a, dar 10 a lo pel leh tawh tlat.



"Imm ka va thlah ang che" a tih takah chuan keipawh ka thutna atangin ka tho ve vat a, a helmet la pahin a thiante chu a hrilh zui bawk Nen keichu pawnah ka lo chhuak fel der tawh a, thli thaw vuk vuk chuan min tiharh ve sawng sawng mai.



Ka kutah min kaiin a bike dahna hmun thleng chuan min kai phei a, a bike hnunga ka lawn tur chu kan dinna piah deuha tlangval ruih hmel tak tak pathum te chuan min lo chhaih pek a, kan kal mai dawn emaw ka tih laiin ka bul ami chu a che phut a, ka inrin ve hma hauh in chumi te awmna lam pan chuan a phei hmawk hmawk mai.



"E... Thianpa thinrima sawi pawh kan nih loh kha mawle" an zinga te berin a tih chuan a kawr âwmah a tham zui rawk rawk a, ka pan hnai ve rang viau a ni.


"Kal san ang, hetiangte chu khin tlak pawh an nih loh hi" tiin a banah chuan ka vuan ve tung a, mahse awmzia a awm vaklo.



"A mawng khal kha kan lo melhtai ve mai mawle thiana" A ti leh chiah chu a hmai a ri zui siah a, a tlu zui rawk rawk bawk.


A thiante an rawn pawr ve ta zel bawk Nen ka hlauthawng chu ka au chul a, anni zurui mai mai chu Rintea chuan a hnehsawh viau tho na in hetianga kutthawhna lam chi hi chu ti lo tawp thei se ka duh.



Reilo te ah chungho chu an thal phengphung a, phun hluk hluk chungin an vaksawn ta hlawm bawk.



"I na em?" ka tih chuan a lu thingin helmet chu a khum tha mawlh mawlh a, "Kal ang" a ti hmuk chu han biak zawm zel chi pawh ni chiahin ka hrelo.



Ngawi rengin kan inphur a, kawng tluan chuan kan inbe leh ta miahlo bawk.




Kan in bul kan thlen chuan a ni pawh a rawn chhuk ve leh rih a, a helmet a la thla chiah chu a kamsir thi ser ser leh a mit bul duk deuh chu ka hmu ve chauh a, engtik laiin nge khangho khan an lo khawih ve hman ka hrelo.



"A na em?" ka tih chuan a lu a thing mai a, mahse a then leh chak chak thin vang chuan dawt a sawi tih ka hrethiam ve bawk.


"Lo lut lawk la, damdawi ka hnawihsak ang che" ka tih pawh chuan lu a thing tlat a, in lamah amah a inenkawl dawnlo tih ka hriat chian avangin ka tilui ta tho.


"Tah hian lo awm rawh, damdawi ka lo la ang" tih leh tlan thlak ka rual a, inchhung chu a lo la êng ut tak na in ka u chu a mu tawh a niang thawm a awm lo a, dimdeuha pindan kawngkhar ka hawn chuan a lo muhil tawh tih ka hre chawp chilh a, tih harh loh law law chu tha in ka hre bawk.




Ka first aid box chu la in ka chhuak leh nghal a, a ni chu stepah ngawi rengin a lo thu a, a bulah thu in a pem chu damdawi ka hnawih sak a, mit a chhing leh sawk sawk thin chu "A na em ni?" ka ti leh hluai zel a, pem te reuh te mah ni se a thip ve zêk a nih hmel.



"I Haw velah vur in i mit hi i dep dawn nia aw, a zialo thei emai insual hi chu a tha lo asin" ti niah niahin dimte in ka chhemsak a, chutih laia chiang leh thûk zeta min lo en vang chuan ka thiltih lai ka tawp hmak bawk.




"Tinge a?" tiin ka biang chu ka dawm ringawt a, min endan vang chuan ka lai titih ringawt leh nghal.



"Mipa dangin ka en dan ang chea an lo en ve che hi ka duhlo" a tih chuan nui chungin "Min en dan angin tumahin min en ve ngai hleinem, nang chuan min hmangaih a ni lawm ni" ka ti chu a lo kiai ve suk a, "Imm ka hmangaih lutuk che" tih paha a kun daih chuan ka awm a tinuam chiahlo a, eng emaw sawi duh nei, sawi hreh deuh si a ang tlat a ni.



"Tinge? Ka lakah lungawi lohna i nei em ni?" tia ka zawh chuan min en vang vangin "Neilo e" a ti sup a, mahse zep a nei tlatin ka hria.


"Sawi rawh, engmah zep a ngailo" ka tih leh takah chuan thawk la vang vangin "Mipa dang laka ka veng zolo thin che hi pawi ka ti" a ti chhuak sup a, engahnge maw chutiangte a lo la ngaihtuah le..



"I thiamlph a nih loh kha, khatiang zurui vang mai mai khan hrehawm ti suh" ka tih chuan a lu lo thingin "Ka hmeichhia chu ka venghim tur a lawm" a ti leh a, han chhan vak ngaihna pawh ka hre tawh lo.



A hmuiah chuan dimte in ka fawp zauh a, "Min venghim reng thin alawm, inthiamlo duhlo la, keichu i ta chauh ka nih hi" tiin ka nuih var var a, a ni pawh a nui ve ta suk mai.



"I thiante khan Haw an la tum hmel siloh a" ka tih chuan dar chhin akin "Ka thlen phei chuan Haw a hun tawh ang, mut vat ka duh" a ti ve sup a, ka kawng a rawn kuah lai chuan ka lo melh vat a, a lama min pawh hnaih rualin keipawh ka lo tawlh rem ve sawt sawt bawk.



"Ka hmui hi a na ania" a ti thum dut chu ka lo nuih hak thung a, beisei nei zeta min en vang chuan dimte hian ka han chhem sak leh a, "A ai hnaiah chhem rawh" a lo t leh thin chu ka nuihpui mai a, mahse a duhtawk thei ngang lo aniang chu min rawn fawp leh thut a, a ka lah chu a âng tha ngam mang silo a, a duhthawh ve bawk si chu dim thei ang berin ka han fawp a, kan awmna hmun a thim tawh bawk Nen midang mitmei pawh kan veng lem lo.




Rei ang reng tak kan thut hnuah a ni pawh a Haw ve leh a, a hman velah min lo biak tur thu a sawi avangin keipawh naktuka ka paper pek turte enfelin ka la mu lawk biklo.


Ngaihtuahna ah eng eng emaw a rawn lut zung zung reng a, nizan thil thleng leh zanin thilte te ka han ngaihtuah chuan mipa ina an chhaih nawmnah mai mai turin ka khawsa em tihte ka inzawt a, mahse chutianga ka awm âwm ka hre silo.



Ka thawmhnaw hak duhzawng pawh taksa lang tamlo chi, thuamhnaw pangngai a ni mai a, midang aiin ka hmeltha vul chûk lemlo bawk a, engvanga mizo mipa te hian hmeichhiate chhaih hi chak tlat thin nge an nih ka hrethiam theilo.


Hetiang thil a thlen chang hian mi thenkhat chuan hmeichhe thiam loh ah an puh mai zel a, 'mipa in a chhaih nawmnah a nih chuan hmeichhia in a zirlo a ni mai' tih rilru pu hi an awm ve leh thin. Mahse a dik vek biklo, hmeichhiate zahawmna hi mipate an ni a, kan mizo mipaten hetianga zahpah lo leh mawihnailo taka min chhaih thin vang hian Mizo hmeichhaite pawh hi kan zam ve thin a, hnam dang pasal neite kan dem viau lai hian Mizo mipa te awmdan leh nunphungte pawh hi kan zirchian ve tho a tul in ka hria.



Rintea message ka dawn meuh chuan zing dar 1 a ri thuak tawh a, a thiante an Haw har thu leh a nu in a hmai pem vel a buaipuisak thute a rawn sawi a, a tlai tawh bawk Nen rei pawh inbe lovin kan inmangtha a,ka mu har bawka zingah pawh thawh ka hai chiang ngang mai.




U Mama'n min rawn kaitho a, hmanhmawh deuha ka insiam laiin ka phone lah chu a lo ri ve sek a, beisei loh deuhin U Mazari a lo ni a, tun ang huna min rawn bia chu mak ka ti deuh.



Ka chhan rual chuan "I kal tawh em?" a lo ti nghal vat a, ka insiam mek thu sawiin min lo biak chhante chu ka zawt nghal a,
"Message ah khan ka rawn sawi vek a, lo en mai rawh" a ti ringawt chu hrethiam lovin "Eng lam nge a?" ka la ti talh a, "I hman hunah lo en rawh, kan inbe leh dawn nia" tiin ka chhan letna pawh ngaichang tawhlo chuan a dah zui hmiah a, message chu ka hawng nghal vat bawk.



U Mazari message chu ka beisei loh lam daih a nih vangin han chhan let mai ngaihna pawh ka hre lo a, a thil rawn sawi chu vawi khat mah ka la ngaihtuah loh lam thil a nih vangin dawnsawn dan pawh ka thiam meuhlo a ni.



Ka message dawn chu ka chhiar a, ka chhiar nawn leh thin.
U Mazari chuan keimah vanga thil thleng vek a nih thu sawi dawt lo mah se min puh fai kelh chu a ni ber a, engtinnge maw hetiang ngaihdante hi ka lakah a neih theih zawk chu ni.
A ni chuan "Dintei thianpa khan i melh dan leh awmdan te a hmu ve vek a, hmeichhe dang tam tak zingah eng vanga nang kher khatianga khawih che nge a nih kha tupawn an hrethiam ang, tunah chuan ka nau in mualphona zawng zawng a chang vek a, mahse nangpawh i thiam vek biklo ania aw, diktak chuan ka laizawnnu ang maiin ka ngai ve che a, hetianga min thungrul hi chu i lakah pawh ka lungawilo khawp mai, pawisawi lo hmel taka i lanna phenah hian i lo za ru ve zêk a nih dawn hi" tiin message min rawn thawn a, ka tah rawn chhuak nghal tet tet chu ka duhlo.



U Mazari ngaihdanah chuan keiman ka melh hmasak vanga khatianga ka chunga thleng turah khan a ngai a, mahse a diklo. Kha misual kha vawi khat mah mawilo zawngin mitmei ka hmuh ngai lo va, a tana îtawm tur zawng pawhin ka awm ngailo. Chutiang chu midang daihin min ngaihdan ni se chuan mak pawh ka ti lutuk lo anga, mahse U Mazari berin min rawn dem ta lutuk chu ka la na a ni ber mai.



Phone ka hum ngawt ngawt laia U Mama rawn lut chuan "I la inpeih nange?" a rawn ti hlut a, hrilh ve tur nge pawh ka la chiang theilo.


"Ka hman a ni mai" tih pahin ka che ve sawk sawk a, hrilh lovin ka kal ta rih phawt chu a nia.

School ka thlen hnuah message chu thawn letin "Thil i hriatsual vang a ni U Mazar, vawi khat mah mitmei ka hmuh ngailo a, thil thleng palh a nih kha, khatiang mipa kha chu U Dintei tan pawh neih tlak a nilo, a himlo emai" ka ti a, engtiang takin lo ngai ang maw.



Chawhma chauh kan kal avangin hrilh lawk lem lovin Rintea studio lamah ka kal a, ka thlen lai chuan tumah midang an lo awm ve lo hlauh a, min hmu chu mak a tih hmel hle bawk.


"In bang tawh em ni?" tih paha min lo banin a malchungah min pawt thu a, ka ngaihtuahna hriat vek tum ni awm takin chiang deuhin min en bawk.


"Imm bang tawh, ka ngai deuh che a ka lo kal mai mai" ka tih chuan awih hmel a pu chiahlo a, "Thil thleng a awm em?" a tih chuan ka ngawi ran mai.



Hrilh ve mai tur em mawni ka tih laiin mahia chinfel mai theih a nih ka ring tho bawk si a, a theih chinah chuan keimaha chinfel ka duh a ni.


"Aih" tih paha lu thingin a nghawngah chuan nghet deuhin ka kuah a, min lo kuah bet ve hlu hlu in dim te hian ka hnung chu a beng dat dat a, hei vang hi ania ka pan chhan, a kianga ka awm hi chuan ka hahdam huai huaiin ka hre thin.



"I buai viau em?" in lak hran tuma ka che chu min lo pawm nghet sauh sauh a, "Buai lo" a tih laia min en dan chu ka hre thiam ngang mai.


"Buailo takzet maw?" ka tih leh pawh chuan a bu nghut ringawt a, nui sen senin a hmuiah chuan ka fawp zauh a, a zawngchhang khawp mai.



Ka thutdan chu siamremin ka bawp pahnih chu a lamah a pawt hnai salh a, duhthawh lutuka ami fawhna chu han hnar phal chi pawh a ni lo.

A nghawngah kuah in ka thiam ang tawiin ka chhang let ve zel a, ka kawng a chelhna a tihngheh salh rual chuan thawk a la zui leh halh thin bawk a, kan duhthawh dun ngang mai.


Ka nghawng chu a fawp kual dan dan a, a thaw lak rang zet leh thaw sa ham ham vang chuan keipawh ka inthunun thei meuh lo chu a ni.


Ka kawr chhung a zen luh laia a phone rawn ri chu hrelo ang hmakin a awm a, mahse a rik tak chhenah chuan phun hluk chungin dawhkana a phone chu a va ban a, number hlang ni maiin ka hria.


"Hello" ti nghutin a ngaithla zui vung vung a, "Tunah chuan ka buai rih lutuk, zanah ka lo en dawn nia" tiin lehlam ami chhan hun pawh ngaichang tawhlo chuan a dah zui hmiah a, chhunzawm leh mai a tum chu ka lo hnial tawh thung.


A mal chung atanga ka chhuk lai chuan nur nang hian min lo en a, eng nge a beisei hre mah ila kan in thunun a ngai tih ka hria.



"Tunge a?" ka tih chuan "Ka hrelo" a ti hmuk a, lehlam a hawi nghal daih chu "Sawi tha rawh" ka ti leh a, hepa hi a titau em mawni.


"Rinte.. "
Min la chhang duh chuanglo, "Nupui virgin i duhlo em ni?" ka tih leh takah chuan a rawn hawi vut a, min en vung vung hnuah engmah sawi lo bawkin min hawisan leh a, a hahthlak thin ania.



"I tih tauh chuan ka haw daih dawn ania" tia ka fiam leh takah chuan a nui ve ta suk a, a thil khawih lai te chu min hrilh ve in rei fe chu ka leng a, tlai lamah kan haw rual bawk.


In ka thlen chuan U Mama a lo awm lo a, eirawng a bawl vek tawh avangin a leng chhuak ve anih ringin ka inbual nghal a, U Mazari khan min lo la chhang leh ta miahlo.



Ka inbual zawh hnuah pawh ka u chu a la rawn let loh avangin ka call ta ngawt a, a phone lah chu inah a awm lawi si a, thenawm hnai khawiah emaw a kal lawk a nih ka ring.



U Mazari chuan ka message chu a chhiar tawh ngei a, mahse min reply tak miahloh avangin keipawhin ngaihtuah zui loh hram hram ka tum a, Pathianin engkim a hria a, tihsual ka neih miau loh chuan hlauh tur ka nei lo tiin ka intipaukhauh ve tlat bawk.




Khaw thim dawnah ka u chu a rawn let chauh a, "Kawmthlang lamah khuan ka kal a, ka tum aiin ka rei alawm mawle" a ti mai a, zanriah ei laiin bazar hun turte kan sawi a, naktuk pawh chawhma chiah class a awm dawn a, chawhnu lamah chauh ka period a awm avangin ka chawl thri dawn hlauh a, naktuk lama bazar mai chu kan tum ta bawk.




Zan lamah ka vahte ho nen kan inbe leh a, naupang na na na chu duh leh awh an ngah khawp a, bazar huna lei tur kan inchah nasa khawp mai.





Rintea a hna thila a buai deuh vangin a rawn leng lo a, keipawh ka mu hma khawp mai.


Mut hmunah ka phone chu ka tuai let sek a, U Mazari reh zui ta vang vang chuan ka awm a tinuam chiah lo na in min be lo chunga han biak luih sek chu tul ka ti chuanglo a, a ngaihdan diklo lutuk kha a put reng loh ka beisei bawk.



Zingah hma deuhah ka tho a, bazar lamah mi an tam tawh avangin thil tih leh chet zung zung a harsa tawh riau a, keini pawh chu chhuah hma kan tum khawp mai.




Naupang thuamhnaw tur kan en hmasa a, a man peksak ka tum chuan a phal leh tlat lo a, ka tilui thei derlo.

An pheikhawk man erawh ka tum ve thung a, kamiz thar ka leisak ve bawk. U Hlimi chu puan ka leisak ve a, naupangho lawmah tiin in cheina tur decoration light kan lei tel bawk.


Ka nu leh pate thlan cheina tur thil kan lei nual bawk a, naupang lawm thenkhat nen kan in lei fel meuh chuan kan bawr tawh ngang mai.


"Taxi la mai ang" ka tih chuan min hniallo a, taxi ah ka u chu thawn haw in an hnungah ka zui ve thung a, mipui an tam bawk nen in kan thlen meuh chuan a chauhthlak khawp a, U Mama pawh a thu ngawi hle hle mai.




...
Zir tawp zanah Rintea te thiandun an rawn leng leh a, a tuk maia kan khaw lama kan haw tawh dawn avangin zanin chu len rei tum sa in an rawn kal a, U Mama pawhin min hrethiam aniang chu an rawn len hnu lawkah pindan lamah min luhsan a, Richarda pawh a thingpui no nen bathlarah a chhuak leh daih tawh bawk.


"I châm rei angem?" tia min zawh chuan school luh hma chu ka châm ka rin thu ka sawi a, a huphurh ve ngang a ni ang vawi engzat nge ka châm hun chhung tur hi min zawh tawh pawh ka hre lo.


"Kumthar hmang turin lo zin ula" ka tih chuan a ngawi vung vung a, hman a in tih ka rin chiahloh laiin "Kan lo tum dawn nia" a lo ti ve mai a, Richarda nena an rawn kal theih chuan ama tan pawh a zahthlak lutuk lo anga, an lo kal duh anih phawt chuan lo kal a pawina ka hrelo, ka chhungte pawhin an remtih mai ka ring.



Ka kut chu ngawi rengin a khalh neuh neuh a, Richarda rawm lut leh chuan "Cigarette ka han lei lawk teh ang" tih pahin a lighter chu a talh alh zui kher a, a chhuah dawnah min rawn ko lehin mit min la siai khum zui a, a inla zei thei khawp mai heipawh hi.



Kan pahnih chauha kan awm leh takah chuan engmah sawi lovin min rawn fawp nghal thawr a, pindan lehlamah ka u a awm ve reng avangin thawm din a ngai bawk nen kan awmdan chu a lai ru riau a, ami fawhna lah chu dam ruih siin a duhthawh em em a, thawk a chham lo chauh a ni.


Bathlarah inzui chhuakin arsi kan thlir dun a, thla a êng lo a, hmun hla taka arsi de ve ve pawh chu hmuh tur a tamlo.

Khât deu deuhin pali vel a awm ve a ni mai a, mahse chu chauh pawh chuan ka lunglen a hril em em tho.


Hun rei tak kan awm hran hnuah bul tan tha lehin hetiang dinhmun hi kan thleng leh a, han awm hrana inhmu phak lo va han awm leh rih chuan Tu ve ve mahin kan phurlo a, kan sawi chhuaklo na in kan hma lawka hunpui lo thleng tur chuan kan lunglen a tizual dawn hle tih erawh kan hre ve ve ang.




"Dam deuhin rawn let leh ang che"A tih chuan ka lo nuih sen sen a, "Nangpawh hrisel deuhin lo awm la, hna lo thawk rim lutuk suh" tiin ka chah ve bawk a, kan inhmuh tawp berna tur a ni hlen dawn emaw tih mai theih tur khawpa kan han inthlah chu ka duh vaklo.


Richarda rawn let leh meuh chaun dar 11 a lo ri der tawh a, "Lawmtei te inah ka va kal a, tukverhah ka tla teuh lutuk" a ti chu kan lo nuihpui hak hak a, "A pa in min hmu teuh lutuk alawm, a pi phone atang khan kan inbe thin tih a hre chhuak a, den tak a ni den tak" tiin tui a in zui khawlh khawlh a, a hah hmel ngang mai.



"I rawn tlanchhia em ni a?" ka lo tih chuan ner nangin "Tlanchhia chu a nih ber hi, exam an zo tep tawh bawk a, an zawh velah ka ru hmak ang" a tia, a ngam tak tak âwm tawp silo.


Thingpui te kan inho leh te te hnuah an haw tur chu kawngpui thlengin ka zui chhuak leh a, "Tluang deuhin in haw dawn nia aw, min lo be dawn nia" tia ka chhip rawn fawp zauhin an tlan liam a, ka thlir zui vawng vawng mai.



Ina ka let leh hnu chuan kan thuamhnaw pack fel tawhte chu ka en fel leh thuak thuak a, ka mut hman ve meuh chuan a tlai leh viau tawh.



Zing hma deuhah tho in counter ah kan bungrua te chu kan thiar chho a, kan chuanna tur driver leh U Mama te an inhre tha bawka kan bungruate pawh a chhung lamah min dahsak a, passenger kan innghahkhawm chhung a rei deuh bawk nen dar 7 velah kan chhuak theih chauh a ni.




Chaw ei tura kan ding bak chu chawl lovin kan tlan zel a, ngaihtuahnaah lah chuan thil tam tak a rawn lut zut zut a, ka nu telloa Christmas kan hmanna hmasa ber tur a nih vangte pawh a ni mai thei, hlimna ni mah ni se ka lunghnur thar riau a, kumin christmas zet chu lunglen a zual dawn hle in ka hria.



Tlai lam dar 3 velah kan khua chu kan lut a, veng sang lama awm tihtakah midang zawng a thlah hnuah keini unau chu min thlah ve chauh a, kan kawtzawla kan han tlan lut chu naupangho an lo phur ngang mai a, Bawiha te unau bakah an thiante nen an lo awm nual a, kan ri le lu a, chauh pawh a sawi theih meuhlo.



Naupang kilkawi kan ngah thin tih ka hriat avangin ka thil hawnte chu an insem dan dan thei a, U Hlimi'n min lo be sawm vatin thingpuite min lo thlitsak zung zung bawk a, mahni in na na na chu hah a dam sawng sawng mai.



He ina ka haw hnuhnun ber chu ka nu boral kha a ni mai a, inchhunga naupangho thawm ri laih laih kara ka nu hmel hmuh tur awm ve ta lo chuan rilru a tina a, ka pa pawh a thar ve reng mai. Ngawi rengin tapchhakah lo thu ve mai mai se la, a awm ve tih hriatna chauh pawh khan min thlamuan hle tih zawng a nih kha maw...

Inchhung chu ka han hawi kual a, bang khawilaiah pawh chuan mitthi te an pek thin pangpar a intar fur a, chungte hlei hlei chuan lung a ti chhe zual bawk nen ka insum thei dawnlo takngiala ka hriat avangin bual in lamah ka tlan lut a, rei fe chu ka va tap nghe nghe.




Ka intihfai zawha phone ka en chuan Rintea call leh message a lo awm nual hman a, sumo a kan chuan lai khan motor ruih ka chin avangin phone ka en ngamlo a, in kan thlen lahin naupangho nen kan ni nak nak a, phone en nachang ka lo hre miah lo a ni.



Kan thlen tluan thu sawiin zanriah kan ei dawn chiah thute ka va hrilh ve thuai a, a lo en rang khawp mai.
Rei lo te ah a phone call a rawn lut nghal a,
"I chau em?"Thum duta a rawn tih chuan ka chauhloh thu in ka chhang mai a,
" I awmlo chu a reh lutuk" a rawn ti nghal ngawt chu kei ka lo nui hak a, zan khat em pawh a la liam hmaa a thil sawi chu a ti ve mah mah deuh a ni.



Zana ka biak tur thu oa hrilh hnuah rei pawh inbe tawh lovin phone chu kan dah a, chhungte nena han inhmuh leh takah chuan thla a muang a, ka mallo a ni tih ka hre nawn leh bawk a, lungngaihna leh hlimna te chu a inpawlh nawk nawk a ni ber mai.




Christmas urlawk ni ah chuan ka nu leh pate thlan tifaiin kan chhungin kan kal a, thlan cheina tura ka leite chu hmangin kan thiam ang tawk mawiin kan chei ve a, an tana kan tihtheih tlem ta lutuk erawh chuan mittui a titla leh thin.

Pathian zarah tluang takin Christmas chu kan hmang liam a, Rintea te chu kum thar hmanga rawn zin hman an tum viau laiin Nu Nutei damdawiin ah a lut leh thut si a, an tum ang pawhin an awm thei ta lo.


Ka châm chhung zawngin in chhung sek rek khawihin ka buai nitin ve thin a, ka awm chuan U Hlimi'n ka kutah naupang a dah tawp a, buai nak nak reng chuan lunglen pawh a sawi hman meuhlo a, kawng lehlamah chuan a tha phian mai.




Nu Zovi te chuan ka u te nupa bulah U Dintei te vanga ka chunga an lungawi loh thu chu an lo sawi ta ngei a, mahse U Mama'n a lo khak let hrep tih U Hlimi hnen atangin ka hre ve a, ka bulah tak phei chuan engmah a sawilo.
Chuta tang chuan keini chhungkaw hnihte chu a hma angin kan inti tha thei meuh tawhlo a, mahse thiamlohna ka neih miau loh avangin ngaihdam dil emaw, a tlawm zawka tan chu ka tum biklo.