DARK DESIRES BY MAWITEI BAWITLUNG (Completed)

[mawitei bawihtlung]

DARK DESIRES



CHAPTER 7




Ka hnung lam aṭanga min rawn kuahin min pawt her lawpa “Zaninah hian tu ta nge i nih tih ka fiah nawn leh dâwn khawp, Lilia alfero, mipa dang i khawih ka hmuh leh chuan a hma ang khân ka hote tân ka dah tawh ang che. Min nawr lui hauh suh ka tih kha, ka dang tawh dâwn hauh lo che a nia, an duh duha an mutpui theihin ka dah ang che” a ti tâk hrawkah chuan engmah ka sawi ngam tawhlo.




Ka khûr leh nghal der dera, hepa hian a thutiam chu a ti leh ngei dawn tih ka hria, ka hlauthâwng bawk nên ka khur dat dat mai. Chu chu a hria nge min en vung vunga “Mipa dang i hmu leh dâwn em?” a tihchuan ka lu ka thing nawk nawk mai.




“A ṭha e, ka ta i nih hi hre reng rawh. Khawiah mah i kal ka phal hleinem, ka ta chiah i nih hi, mipa dang i hmu leh a nih chuan ka that ngei ang tih hria ang che. Tûn chu in pahnihin ka ngaidam hrâm ang che u” tiin ka hmuiah chuan a rawn fâwp nghala, ka rui a la reh lo bawk nên ka hnial ngam tawh lo.




Reh pawh nisela khâng mite kuta min pêk kha ka duh lo hrim hrim, ka hlau tlat tawh. An mitmenga mi an it na kha ka hmuh hmaih bik silo, Dominic-a tih ang ang chuan ka awm tawpa, hnial emaw lo chhan lêt emaw pawh ka tum chuang lo.




“Hmeichhe dang i thik viau a nihchuan ka hmu tawh lovang, ka tiam tawh tak tak ang che. Tu hmeichhia mah an awm leh tawh lovang” a zawh hnuah min kuah pah chuan a sawi sup supa, ka chhâng chuang lo.



A ti leh tak tak pawhin ka ring lo,a hma pawhin min lo tiam tawh a nih kha. Chhâng duh lo chuan ka mit chhingin a mah hnungchhawn zâwng chuan ka mu ta daiha, a rum nghal nghut mai.



Zîngah a thawh hma a tho in ka intifaia, inhnuai lamah chhukin pâwn lam ka pan zuia. Boruak thianghlim chu dawn tumin ka mit ka chhing vang vanga, ka hahdam sawng sawngin ka hria.



Ṭhutthlengah chuan ṭhu thla in ka in ngaihtuah neuh neuha, ka nun hlimna reng reng neilo hi ka ti tâwp mai dawn nge tih te chenin ka ngaihtuah tawh. Hetianga hrehawm taka awm reng tur chuan thihna nên enge a danglamna vak ni ang tihte chu ka ngaihtuah tel lo theilo.



Dominic-a bula ka awm chhûng hi chuan hlimna tak tak ka chhar ngaiin ka ringlo, a duh hun hunah min thinrim khumin a duh hunah min ngaihsak in min duat leh em em a. Hetiang a mipa hriatthiam har lutuk bula chêng reng tur chuan ka tlin in ka inring lo, chubâkah hetiang a nihchuan a fa ka pai thuai dawn.



Ka unaupa leh ka ṭhianṭha ber that tu fa pai chu ka duh teuh silo, rilru hah zet chuan ka thaw leh hak ṭhin. “Nu, ka u, min hmu em? Ka nun hi tinge hrehawmna hlir hian an hmuah mai le, nu nang tal chu la awm la hetiang hian kan awm kher a ngai lo tur. Min kalsan hma mah mah a ni, puitling taka khawvêl hmachhawn thei tur hian ka la in ring tawk lo, nu nang tal chu rawn kîr leh la ka ti. Ka hrehawmna hi ka tuar chhuak thei angem pawh ka hre tawh silo” tiin ka phun sep sepa.



Keimah hi ka ipik ngawih ngawiha, thawk thleng hian a harsa nimaiin ka hria. “Chhungte la nei ve ila chuan hetiang em em hian a hrehawm loh tur, ka pa lahin keichu a fanu ah min pawm lova, a sâwn mai mai pawmin keiai a dah pawimawh em em chu ani si a, nu rawn kîr leh thei la ka ti. Tinge hetianga khawpa hrehawm tur hian min hnutchhiah bik?” tiin ka rilru na lutuk chu ka ṭap chhuak hlawp hlawpa.




Zah pawh ka hre tawh lo a ni ber, a hrehawm êm a ni. Chutia ka lo ṭah lai chuan ka sirah rawn ding an awm tih hriat takin thla hlim ka hmu a, ka mittui chu ka tuai fai nghal nawk nawk mai. Ka en chhoh nâk chuan Dominic-a chuan min lo en leh kur tawh mai.



Ka hawisawn vata “Ṭap ziah suh, hmeichhe dang ka kawp tawh lovang ka tih kha, ka tân inhawn tum ang che” tiin ka bulah chuan a rawn ṭhu thla a, ka ner nghal sawk mai.



“Engvangin nge ka rin ang che? A hma pawhin i sawia, a tûkah hmeichhe dang i rawn hruai lehnghâl a nih kha. Chuti chung chuan ka ring ang che maw? Teuhlo mai, i lerh i sim thei tak tak lo ang, khatiang thu sawi ve tawh suh” ka tih lai chuan ka kut rawn humin alamah min pawt hnaia.




“Ka sawi tawh kha, khatiang a thleng tawh lovang. Tin, i mittui hi hmuh fo ka duh lo, ka thlêm thiam hel lo che. Chuvang chuan ṭah loh hrâm i tum dawn a nia, i ṭah hian ka thaw i tipik” a rawn ti leh hluka, hetiang em em a han ngeiawm mai chu.




“Ka ṭap ri hriat phâk lohnaah awm mai ta che, ngaithla rawh pawh ka ti lo che a, engvangin nge i lo ngaihthlâk ni. Ka rilru a na a ka ṭap a nimai, nangpawhin ṭap lo tur chuan min tilui thei lovang, kei chhuan tur neilo, chhûngkhat pawh nei tawh lo hian engmah dam chhan tur ka nei tawh hleinem. Thi ila ka tân pawh a nuam zâwk ang” ka tih lai chuan ka kut chu a rawn hmer na salha.




“Kha thu kha sawi tawh hauh suh, thihna hi uanpui chi a nilo. Tin, mi beidawng hma leh ngaihtuahna tawi tak nei te hi mi chaklo ber an ni, an ding chhuak ngailo, chhûngte kan nei tawh lo ve ve. Mahsela min en rawh, ka chhiat phah em? A teuhlo mai, hmalam ka pan theih chuan nangpawhin i pan thei tur a ni” a rawn ti nghut nghuta.




Ka ngei takzet, amah avângin engkim ka châna, chutiang thu a la sawi thei chu mak ka ti zâwk. “Ka chhûngkua i that a sin” ka ti deuh ṭhat chu a rawn nui haka “Nangpawhin i that loh bik em ni? Kan unaupa te kan chân ve ve, mahsela nang chuan chhûngkua neilo tawp chu i nilo, pa ila nei tal a. I pa lahin hmangaihna che a neilo mai pawha, mahse pa chu ila nei chiang a lawm, keichuan nu emaw pa emaw, unau dang reng reng ka nei tawh lo” a tihchuan ka chhâng mai lo.




Ka pa a rawn sawi chhuah leh avâng chuan rilru ana thar, kan naupan lai kha chuan min duat ve ṭhin in nitin parkah te min lênpui ṭhin a, ka u nên pawh kan ngaina in chhûngkaw hlim tak kan ni ṭhin. Mahsela tûna a nupui rawn lan chinah erawh engkim a tâwp a, kan lak aṭangin a la hrang ta hmiah anih kha.




“Ka unaupa khân tihsual a neilo a sin, keimah kha min that mai la chuan hetiang hrehawmna te hi a awm reng lo tur. I nau avânga min haw hle si khân engvanga min mutpui? Min that mai la chuan engkim hi a fel mai tur” ka sawi zawh hma chuan a âwmah chuan min kuah bet vata.




Ka ṭap leh nghal hlap hlap mai, a âwmah chuan hmai phûmin ka chum dat dat bawk. “Ka hua che Dominic, ka haw tak zet che. Ka nunah lo lang miah lo ula chuan ka chhûngkua ka la nei tur, engkim hi i thiamloh vek a ni” tiin ka insût zui hlap hlapa.




Engmah sawi lovin ka lu ah chuan a chûl heuh heuh ringawta, keipawhin engmah tih ka châk lo. Ka tha a zawi nguai mai “Ka that ngai dâwn lo che, that tur che pawhin min ti ngai suh. Ka ti ngai dâwn lo, ka sawi tawh kha. Ka hmeichhia i nih hi, engvang mahin ka that ngai lovang che” tiin ka hmuiah chuan a rawn fâwp vang vanga.




Engmah ka sawi tawh lo, ka thaw halh halha. Ka taksa chu a chau takzet bawk, Dominic-a pawhin engmah a sawi tawh lo, reife chu kan ngawi dûn a, ka pum a rawn rik tâkah chuan a rawn nui deuh hawk mai.



“I ril a ṭâm tawh a nih kha, tirawh lût ila i inhnawh puar vat ang. I pum an au nasa tawh lutuk a nih kha” a tihchuan ka nui ve saka, in chhûng lamah chuan ngawi rengin kan in zui lût a, choka kan luh rual chuan maid ho chu ei siam turin a ti zuia.




Kei erawh chairah ka ṭhu fel then tawh mai, ka ṭah chhuak pawh a reh tawh bawk nên engmah sawi tawh lo chuan ei tur an rawn chhawp chu ka ei zui mawlh mawlha. Dominic-a erawhin a ei tam lo leh pek viau mai, maid ho pawh kan bulah an ding ṭhapa, kan rualin chaw an ei ngai lova.



Kan eina an seng fel vek hnuah an ei chauh zel, ka lu rawn hai thut avâng chuan ka in dawm nghal vata, ka fian ken lai pawh chu ka keng nghet thei tawh lo.



“Engtin nge i awm? Lilia i ṭha em?” Dominic-a chuan min rawn hnaih nghal ruaka, ka lo dawm vata. “Dom, ka lu a hai lutuk” ti ringawtin amah chu ka nghêng titiha, chuveleh min rawn pawm kâng nghal lawpin room lam chu min panpuia.




Khuma min mut tir rual chuan ka mit ka chhing vang vanga, “Doctor ka ko dâwn em ni?” a tihchuan ka lo hnial vata “Ka ṭha leh mai ang, hahchawlh ka mamawh a nimahna. Tûnah chuan engmah ka ti peih rihlo” tiin ka mit pawh chu ka la meng chuang lo.




A hlauthâwng nge a ni lahin Doctor koh ringawt chu a sawi bawk nên ka hau leh ṭhin. “Ka ṭha ka tihkha, Doctor koh a ngailo, ka hahchawl duh, engmah ka ti phûr rih lo” tiin ka phun leh sapa.



Ka mit te chu a na urh mai lehnghâl, engvanga hetianga awm thut nge ka nih tih pawh ka hre biklo. Dominic-a chu ka bulah rawn mu in min kuaha, “Hna kal i tum lo em ni?” tiin peih lo zeta meng chhuakin ka ena, a lu a thing nghal nur nur mai.



“I dam loh hi, khawiah mah ka kal san lovang che, mu mai mai rawh” tiin a ngawi zui ta daiha. Keipawhin engmah ka sawi belh tawh lo, mutthilh tum chuan ka beia, mahse a har mah. Ka lu chu a na deuh deuh te hian ka hria.



Muhil thei lo chuan ka mengchhuak leh ṭhin, ka luak rawn chhuak lutuk avâng chuan toilet lamah la tlân lût a, Dominic-a pawhin min ûmzui vat bawk. Ka luak lah chu a dum veka, mak ti zetin ka en reng ringawt.



Kei hian ei sual ka nei em ni? Nge ni a, hrai ka ni zâwk ang tih te chu ka ngaihtuaha. Ka pum na te, ka lu hai nên zawng zawng chuan hlauthâwng zetin toilet aṭang chuan ka chhuaka.



Thui pawh ka pên thei tawh lo, Dominic-a chu ka bawh rawka, engmah ka hre zui tawh lo.


“Mr Johnson tûr a hrai a nih hi, hei ai rawn tlai ula chuan a nunna kan chhan zo hauh lovang” ti ri ka hriat rualin “Tûra, hrep hian. Ka that dâwn khawp, ka hmeichhia thah tum tu chuan dam reng a phulo, Frederick maid ho kha lo phuar hlawm vek ang che” tih rik hrawk rual chuan ka meng chhuak vata.



Ka khuh nghal kharh kharh bawk, chuveleh Dominic-a chuan min rawn en vata “I ṭha em? I lo harh thei maw? Lilia, min tih hlauhthâwn zia i hria em?” a ti nghal mawlh mawlha, hetiang khawpa hmêl chi ai hian ka la hmu ngai hauh lo.


ZAWMNA


“Tinge tianga ka awm?” ka tihchuan a hmêl chu a rawn thlâk leh hlawka “Turin an hrai che a nih chu, ka zawng chhuak har lovang. Thah tum tu che chu ka that zâwk ang” tihrawkin Doctor lam chu a melha “A dinhmun a ṭha ngei em ka hre duh” a tihrual chuan doctor chuan min rawn check zung zunga.




Kei hi tûrin min lo hrai amaw? Tunge ni ang? Tunge min thah duh tu chu? Ka bo map mai, ka awm lah chu ala nuam chiah lo bawk nên ka zawi nguai mai, “Tur chu kan la chhuak vek tawha, a ṭha zêl tûrah chuan ka ngai, ni eng emaw ti chhûng chu hahchawl sela a ṭha leh mai ang, an tûr hman kha a chak lutuk lo hlauha, in vannei hle mai” a tihchuan keipawh ka thaw huai lo theilo.




Chutia nunna derthawnga ka awm tâkah chiah chuan thih ka la in huam loh zia ka hre chiang hle bawk. Doctor chhuah hnu chuan Dominic-a chuan min rawn kuah vang vanga, engmah sawi lo mahse min ngaihtuah hle tih ka hria. Tinge min haw viau si a min ngaihtuah êm êm?



“I ṭha tiraw? Engah nge ka nunna i chhan? Engvanga hlauthâwng em em nge i nih? Thi tur khan min duha, mahse engvanga kei min thah tum tu chu hrem tum leh si nge i nih?” tiin ka zâwt sapa.



Ka tha a la zawi bawk nên ka ṭawng ring thei vak lo “I thih duh ni ila chuan ka that tawh ang che, thildang min zâwt ṭhin suh ka tih kha. Frederick-an engkim a lo chingfel ang, maid zawng zawng pawh a ṭul chuan ka that ang” a ti chang leh hrawka.



A thinrimna tur lo sawi belh chi pawh a nilo, “Ka ṭha a lawm, an vai chuan an sual lovang. An vaia an tih ka ring lo, tu emaw ber in a telh a nimai. Dom, tinge ka nunna i chhan ka tih chu?” tiin ka zâwt nawn leh ngata.




Awmsawn deuhin a mit a chhing sawka, “A chhan chu ka hmangaih che a vângin” a tihchuan ka meng kâwk mai, in hmangaih tir kha ka tum sa mah nise chutia ka hre thut chuan mak min tih tir lo theilo.



“Engmaw i sawi” ka thil tum ka hlawhtling ta chêng a, mahse hlimna ka nei chuang hauh lo “Ka hmangaih che Lilia” a rawn ti nawn leh saka, ka kut chu a hum vang vang bawk.



Chhân mai dân tur ka hrelo, ka ngawi renga. Ka khabea rawn dawm chunga min kawih dah salh rual chuan a mitmeng pâwl ram nên chuan kan in melh fuh ta chata “Dom” a kut chuan ngawi rih tura min ti in amah chuan sawi duh a nei tih hriat takin thawk a la ham ham a.



Keiin a thusawi tur ngaichangin ka en ran bawk, a zâm ve nge mawni. Hetianga a awm hi ka la hmu ngai hauh lo “Lilia, ka nau avângin ka hua che a. Ka nau thihna avâng khân i chungah ka nunrawng hle tih ka hria, a tir phei kha chuan nawmchenna atân bâk loh che kawl che kha ka tum lo hrim hrima, ka rinloh lutukin ilo la thianghlim leh zela, ka nau khân dâwt min hrilh tih ka hre chhuaka, nang chu hmeichhe lep lerh leh duh duhin an mutpui theih ang khân a sâwi ṭhin che a” a tihchuan ka ner sawka.


Alfred chuan chutiang chuan maw min lo sawi ṭhin a, thawk la kawkin ka rum haka. “A tîrah khân keipawhin chutiang tur chuan ka ngai che, mahsela ka han mutpui tâkah che kha chuan ka rinloh lutukin ilo thianghlim ta si a, khami hnu aṭang phei kha chuan i taksa tawk lo khân ka awm thei tawh lova, ka tum loh deuhin ka mutpui leh ṭhin chea,  mahse in itna satliah ah ka la ngai maia, ka duh theih che kha ka ring ngai lo hrim hrim, huatna nên ka en che emaw ka tihlaiin i dinhmun a derthawng chuan ka hlauthâwng leh em em thunga, duhna mai nilo vin ka hmangaih che tih ka hriatchhuah phah a sin” tiin a châwl leh data.




Tûnah hi chuan misual leh ṭawngkam vin ṭhin em em kha a ang tawhlo, mithar hlak ang mai ani. “Ka tum loh deuhin ka hmangaih ta che a, i tân erawh huat awm ber chan ka chang ang tih pawh ka hailo, i unaupa ka thah sak miau che a, i nun hremhmuna dah tu hi min duh lêt ve ka ring hek lo” amah vêk chuan a rawn ti leha.




Ni e tûnah chuan duh lêt chu sawi loh huatna in a ni ka la khah ni, ka chhûngkaw neih chhun min lâksak tu a ni miaua. “I pa khân nangmah ka neih duh che chuan ka thawhpui a ngai tih a sawia” tiin a ṭhen suka, chu thu a sawi erawh chuan min ti thinrim êm êm thung.




“Thawhpui hauh suh, a ni fa kha ka ni tawh love, vawikhat tê mah min enkawl nân a la inseng hleinem, keimah avânga hman ṭangkai che a tum chu a zak lo ta hle mai. I thawhpui tur a nilo, a ni thuhnuaiah ka awm hek lo, rapthlâk hian ka pa chu nilo se ka that tawh ang” tiin ka inhum ruh ṭalh ṭalh a.



Ka kut chu rawn hûm leh salhin “Ka hria a lawm, chuvang rêngin a ni ka thawhpui duh loh ni. I huatzia kha ka hai bik hleinem, Lilia min haw viau tihchu ka hria a. Mahsela khawiah mah ka hmangaih avâng che ringawt hian kal tir che emaw thlah zalen che emaw ka tum chuang lo ania, ka bula awm reng turin ka duh che” tiin ka hmuiah chuan a rawn fâwp vang vanga.




Keipawhin chutiang ka duh hauhlo, a kiangah ka him ber dawn tih ka hria. Tûnah phei chuan ka pa laka phuba ka lak theih nân mi pawimawh ber a ni tlat, a ni a awm chuan ka pa khân engtin mah min ti ngam hauh dâwn lova, Dominic-a thil tih theihna hmang ṭangkai hian ka tichhe ve ngei ang.



“Kalsan che ka tum hleinem, i kiangah awm reng ka duh. Kalna tur dang ka nei tawh chuang lo, ka pa lakah phuba min lâksak turin ka duh che” ka tihchuan min rawn en vata, enge ka sawi awmzia a hriat loh hmêl êm avâng chuan nui sakin ka tum dân zawng zawng chu ka hrilh ta veka.




A ni pawh a bu nghat nghat mai “Damdawiina awm reng pawh hi ka duhlo, haw vat ka duha. Min thah tum tu hi ka mit ngeiin ka hmu ve duh” ka tih tâk nghatah chuan amahin engkim a buaipui tur thu sawiin a chhuak zuia.



Rei a nilo, a rawn lêt leh meuh chuan in lama in enkawl turin nurse pakhatin min zui haw dâwna. Dominic-an ka dam chian hma loh min enkawl turin a ti miau sia, keipawhin ka hnial duh lo. Ka dam hma poh leh ka tân a ṭha a nimai.



In kan thlen rualin nurse chu kan in piah cottage ah chuan an awm tira, Frederick-a te ho pawhinin lo hmuak leh ṭhap tawh mai. Zah tak hian chibai min lo bûk leh sap sapa “In la khung em?” Dominic-a chuan Frederick-a en chung chuan a zâwta.



Fresher-a zâwk chuan a rawn chhâng nghal vata, an la khung a nih hmêl. Dominic-a chuan chulam pan chuan min hruai zuia, ka hmuh duh ve miau avângin rem ti vak lo chungin maid ho an khungkhawmna lamah chuan min kal puia.




Inhnuai room-a maid ho chaira an lo thlun hovin min hmuh chuan an hlauhthâwn hmêl ngei mai. Dominic-a chuan a pan phei chhet chheta “A tu a ber hian nge Lilia tûr pe che u” tiin a silai a phawrh zuia, an hlauh hmêl em em lehnghâl.



“Mr Johnson keichu ka nilo” an ti sap sapa, chutih lai chuan Fresher chu rawn hnaiin Dominic-a beng bulah chuan eng emaw hi a hrilha, chutah maid zînga a mize zawiawi bera ka ngaih chu silaiin a tin ta vâng mai.


“Tu tih tir che nge? Sawi vat rawh, chuti a nih loh chuan i chhûngte chawpin ka that ang” a tihchuan chunu chuan hlauhthâwn hmêl lutuk hian a ena, “Mr Johnson ka tihpalh, miss Rosie-in min vau vang a ni, ka tilo a nih chuan min thah tur thu a sawia, chumai nilo vin ka hna aṭanga min bân tir tur thu a sawia, i bialnu a ni tih a sawi bawk nên ka hlauthâwng em a ni” a rawn tihchuan ka mit ka chhing sawk mai.




“Thudik a ni em?” a ti leh hrawka, chunu chu thah a châk hmêl takzet bawk. “Dawt ka sawilo, miss khawngaihin min pui rawh. Hrai che kha ka duh miahlo, mahse min vau tlat si a, i ei tura a tih pawh kha ka telh zo duh lova, kan chungah i ṭha êm si a, mahse a mah pawh kha ka hnial ngamlo a ni, Mr Johnson-a nên an in zui tam hle si a, khawngaihin min ngaidam rawh” tiin keichu min rawn ena.




A mitmengah chuan dâwt a sawi lo tih ka hria “Dom, kal tir rawh. Tûn hnuah chuan a ti leh tawh lovang, hre vek rawh u, kan nunna lâk in tum leh a nihchuan a tu a te pawh hi in thla vâng ka hauh tawh lovang. Tûna a pawimawh ber chu Rosie-i a ni” ka tih tâkah chuan Dominic-a chuan la lungawi lo tih hriat tak hian a melh rûn hlawma.




“Ka chau tawh, hahchawlh ka duh. Engtin mah ti suh ka tih kha aw, an thiam loh a awm lo ania aw, i bialnu hlui vâng vek a nih kha. Khawngaihin min mutpui rawh, keimah chuan ka mu duh rih lo” tiin a âwmah chuan ka beia.



“Miss kan lâwm e, khatiang thil kha kan tileh tawh lovang, khawngaih takin ka hna aṭang hian min bân suh u aw” tiin tûr a min hrai tunu ngei chuan mittui tla zawih zawihin min ngên a, hei erawh keichuan sawi vak ka tum tawh lo.



Dominic-a hian ṭha a tih ang chuan a timai ang “Frederick Rosie-i chu lo buaipui ang che u, ka hmaah in rawn hruai tur a ni ang” tihmukin min pawm kâng nawlha. Inhnuai room aṭang chuan min chhuahpuiin ama room zâwk lam pan chuan min hruaia.



“Ka room-ah i awm ve tawh ang, khawiah mah ka hlatah hian i awm tawh tur a nilo” tiin a khumah chuan dimte hian min muta, ka nui sak ringawt. Ka luak chhuak lah chu a la reh mai thei lova, Doctor damdawi min chawh khân min chhâwk lo phei se chuan ka luak ṭeuhin ka ring.



Ka bulah chuan rawn mu ve in min kuah zuia, ka thaw nghal ham ham mai. “Rosie chu engtia tihnge i tum?” tiin ka en chhoa, chunglam a lo melh ran mai. A bialnu ṭhin a ni a a tihnat phal chu ka ring chiah lo, chubâkah keimah avânga midang thah a duhin ka ring lo bawk.



Mahsela ka rin loh lutuk thu rawn sawiin Rosie-i chu thah a tum thu a rawn sawi hluka “Ka hmangaih nunna lâk a tuma, dam reng a phulo. Ka that ang” a tihchuan a hmui chu ka hup sak vata “Chutiang sawi suh, tualthahna hi ka ngaina lo. Hremna chu pe la ka duh; mahsela mi nunna lâksak tur erawh chuan ka duh lo che, nunna lâk hian engmah kawngro a sulo ka tih tawh kha. That pawh nila ka hlim phah dâwn lo, chuvâng chuan keimah avângin tualthat suh, dân hnuaiah chuan engtiang pawha thil ti thei nimahla man theih i ni ve tho tih hre reng rawh” tiin a kut chu ka hûm sak vang vanga.





“Mahse thah che a tum a lawm” a tih leh chuan ka nui saka “Ka hria a lawm, mahse ka thih loh hi. Na deuh takin warning zâwk rawh, a nunna êm chu lâksak suh, hmeichhia a nih kha. A duh luatah che a insûm zo lo pawh animahna” tiin a hnungah chuan ka chûl sak hliau hliaua.