TRAITOR BY Ziki nu (Completed

[ngaia]

TRAITOR


Chapter-2




Emergency a awm loh avangin zan lam chu kan buai ta vak lo a, zing lamah erawh damlo na zual an awm avangin kan ri nak nak reng a, ni a chhuah meuh chuan kan harh tha hlawm tawh viau a ni.




"I haw nghal dawn em ni Awmawm?" common room rawn luh pahin Dr. Ramkima chuan min rawn melh a, "Aw, ka nau ka call anga, Tluangpuii a rawn thlen chuan ka haw nghal deuh mai ang" ka lo ti vat a.


"I la biak loh chuan ka rual pawhin a haw theih asin, vawiin chu ka thu dawn lo a" min ngaichang deuh chunga a tih leh chuan ka chhan hma hmain kan thawhpui dangten "A remchang alawm, haw dun rawh u" an lo ti nak nak a, Jaydena tan vanneihna a ni mai.



"Anih chuan ka'n inthlak lawk ang aw, Tluangpuii pawh a rawn kal mek a" tiin inthlak turin ka luhsan zui a.

Dr. Ramkima nen hian kan veng a inhlat lutuk lova, eng emaw chang hi chuan kan inphur haw ve leh zauh thin.




Tlangval a la ni a, kan doctor te zingah amah chiah hi kawppui neilo a nih avangin fiam pawh a hlawh ve nasa a, nupui nei turte pawhin han fiam ve zuk zik mah ila tuman ngaihzawng a neih âwm kan hre ngai lo.




Kei ai chuan a upa hret a, mizo tlangvalah chuan sang pawl tak leh sa tha deuh mai, hmel pawh chhe lemlo tak a ni.
A nelawmin a bula awm a hahdamthlak a, buaithlak deuh erawh kan pahnih hian midangin awmze nei deuha min fiam hi an ching a, kawppui neilo ve ve kan lo ni bawk nen hmehbel kan awl deuhte pawh a ni mai thei.
Kan inkarah erawh a hranpa takin thildang a awm lem lo a, hetianga hnathawhna lama tlangnel taka kan inbiak bak hi phone ah pawh kan inbe ngai hran lo.




Ka inthlak zo ka chhuah rual cuuan min thlaktu tur Tluangpuii a rawn thleng ve chiah a, a ni pawh mut a la kham loh hmel khawp mai.




"I hman chuan kan kal nghal mai dawn em ni?" Dr. Ramkima'n a tih chuan rawn thleng thar ber Tluangpuii chu a lo nui duai a, "Doctor pa nen in haw dawn vang a ni maw I lo hmanhmawh em em" tih pahin a mitko chu min san khum ralh ralh a, ka ngei reuh zia chu aw...



A lo chhuah tawh leh tawh loh ka zawt ringawt kha a nia, chutianga ka hmanhmawh vak pawh ka hre lo.


Midangho pawh chuan min fiam zui lat lat a, kan pahnih chuan tinngaihna hre lo deuha inen in kan nui leh ringawt thin.



"I thawhpuite ho hi chu an la nau deuh a ni, an lawm zawng a la ho em mai" damdawi in kan chhuahsan rual chuan a ti halh a, a la nui reng.


"Min fiam hi nuam an ti ve hrim hrim a niang, an tawngthei hlawm sia chhan let ngaihna pawh ka hre lo thin" ka tih chuan a ri meuh hian a lo nui leh a, sawi zawm tawh lovin a motor dahna lam a pan nghal a, kawngsirah a rawn tlan chhuah hun ka lo nghak thung.



Ka bula a rawn din rualin ka thu lut ve vat a, kan tlan chhuak chu a hmanhmawh deuh nge maw ni nidang aiin a tlan chak riau in ka hria.



"I hmanhmawh em ni?" tia ka zawh chuan Lengpui lama a u te chhungkua a hruai tur thu min hrilh a, "Ka nau pawh ka be thei tho si a, I sawi mai lo a nih chu" ka tih chuan lo nuiin "A harsa hleinem" a ti mai a, kan inthleng min thlah dawn chuan pen thui ve deuh a la ngai si a, ka inthlahrung chuan kan veng pen chhoh dawnah chuan ka chhuk lui ta tho a, kan in vailiam hnu chuan muangchangin ka kal a, a la hma bawka mi kawng kal hmuh tur an la tam loh bakah motor pawh a la tam lo a, dawr inhawng pawh a la awm meuh lo.




Chutia muangchanga ka kal chu chak deuh mai hian bike in min rawn tlan pel a, pakhat mai a ni lo, a hnung lawkah bike dang pathum lai hian an rawn zui ve bawk a, kawng kawia an liam hma chiah chuan bike rawn tlan hmasa ber kha an tiding a, midang pahnihin a bike atanga an phih thla lawp ka hmuh rual chuan ka pen tawp ve chawp mai.



Khawlaiah, khaw ên lai lehnghala an chetdan chu mak ka ti, eng buaina pawh lo nei se midang hmaite chu han zah ve deuh âwm pawh ni in ka hria.




Ka pen zel avangin ka hnaih ve hret hret a, chutih laia bike atanga pawt thla ve lotu berin an ûm pa hmaia a hnek chu ka hmu chiang leh pek.



An bul lawka hmeichhe tleirawl la naupan hmel tak kal mek pawh chu a phu zawk a, hlauh hmel deuhin chungho chu a rawn kalpel hlawk hlawk bawk a.



Chung tlangval rualho aia mak ka la tih zawk chu khawlaia kal velten ennawm thlir taka an thlir leh thelh an tum miahlo chu a ni.



An bul hnai ka va thlen chuan an sawisak rawn pa kha a hmai a lo thi hnuang tawh a, thawh pawh tho thei tawh lovin leiah chuan a mu hlawm ngawt ngawt tawp.




"In mawl em ni a? Khawih tawh suh u" pakhatin a pet leh tur chiah chu ka thil lo sawi vang chuan a tawp leh chawt a, helmet full face a khum avangin a hmel chu ka hmu thei lo.




Mahse a helmet visor a tih chhoh rual a mitmeng ka hmu chiah chu ka ip chawih a, han tawng leh mai ka tum pawh chu ka thei mai lo.


Hmanni lawka a mithnuai duk kual raih pawh kha a la awm a, awm tawh lo pawh ni se a mitmeng thip lutuk atang ringawt pawh chuan a mah a ni tih ka hre nghal tho ang.



Eng emaw sawi leh tuma ka âng zuau chu an zinga pakhat chuan min lo nam kat dawrh a, chutihruala misualpa lo che ve phat chu ka hmu hman hram bawk.




Kan piah lawka dawr nghaktu putar pakhat in a rawn khak ve takah chuan an insaseng ta hram a, an tlan chhuah leh dawn thlengin khapa khan ka lak atangin mit a la sawn lo, min en satliah pawh ni in ka hre lo, a mitmeng hmang khan min vau zâm a tum ni ber hian ka hria.




Ka mumang ka ngaihtuah chhuah rual chuan lu thingin an kalsan tak pa chu ka pan hnai ve thuai a, a ka leh hnar atanga thisen a chhuah nasat avangin ka tissue ken ang ang chuan ka han hru fai a, putarin taxi kohsak a tum chu a duh tlat lo.




"Damdawi ina i kal vat loh chuan a tha lo ang" ka lo tih ve pawhin a duh lova, chil chhak thawt thawtin thei leh thei lo hian a rawn tho chhuak a, lawmthu te a sawi hnuah muangchangin a bike chu a dahtha a, midangin an lo pui ve ta bawk nen keipawhin ka kalsan a, ka duh vang ni hauh lovin kha mihring maksak zet kha ka ngaihtuah zui leh rauh rauh thin a, kha pa nen khan eng buaina nge an neih tihte pawh ka hre chak.





Kan in ka thlen dawn tepah ka nu hnen atangin call ka dawng a, ka chhan rualin "I lo thleng tawh dawn em?" a lo ti vat a, ka thlen tep thu ka sawi chuan bawnghnute leh chini lei kawi turin min chah a, kan inbul dawrah leiin rei lo teah ka thleng zui a, dar 8 a lo ri tep tawh.




"Tukin chu i va tlai ang reng ve, i nau kha a hman chuan chaw kan ei nghal law law dawn nia" ka nu'n a tih avangin thutthlengah zawi deuhin ka thu a, ka phone ka en chuan Dr. Ramkima message a lo awm ve vang mai.


"I thleng tawh em?" tih zawng hi a ni a, ka thlen chiah thu ka hrilh chuan min chhan letna pawh ngaichang tawh lem lovin ka nu chu chaw ei ka siampui a, kan kil thap tawh hnuah pawh ka naua chu a la rawn chhuk leh pek lo.




"Lawmawm" tia ka nu in a koh pawh chuan a reh vang vang mai a, "Ka han ko ange" tih pahin ka tho nghal vat bawk.



Kawngkhar ka hawn chuan khumah zangthal zawnga lo mu duaiin phone ah tu emaw hi a lo bia a, min hmuh rual chuan a phone hman lai chu a hmet tawp zui hmak bawk.




"Kik ve ta che" tih hmuk pahin a pheikhawk chu a bun tha mawlh mawlh a, "Koh hre thei heklo che, bialnu i nei a ni maw" ka tih chuan rum deuh hian min melh ringawt a, "Sangkimi kha em ni?" ka tih leh chuan vin deuh hian "I hriat ve pawh a ngai lo, i upa tawh si nangmah chiah kha inngaihtuah rawh" tiin min chhuahsan hmak a,, vei tak hian a, ngaihzawng neilo mah ila pasal neihte chu ka la tum ve ngar ngar tho.





Thawhlehni chu nileng deuh thaw in ka mu a, Dr. Ramkima message pawh tlai dar 3 velah ka hmuh leh chauh a ni.



"Thei i ngaina em?" tih chu "A awm chhung chu ka ei thei" tiin ka chhang a, nui lem ka dah tel bawk.



"I duty dawnah lo sawi la, ka lo kensak dawn che nia, ka u ten an rawn hawn teuh a" a rawn ti leh duah a, nui var var chungin khum chu ka thawhsan a, choka ah ka nu chu eirawngbawlin a lo buai leh tawh khawp mai.



"I lo tho chhuak thei maw? I mu nghet lutuk a, I pa phei chu a ngaih a tha lo lek lek alawm, kha, bai khan han chawk teh, ka indaih lo lutuka I chet ve zung zung a ngai" tih sawk sawk pahin a hmarcha rawt chu plate ah a suak chhuak zung zung a,
"Chaw ei tur kan nei em ni a? I va siam hnem em em" tih pahin chawhneh dangho chu ka en kual a, bawngsa phei chu tam tak a ni, thleng sil ka peih lo lawk sa.




"Pastor te chhungin an rawn ei dawn anih kha, zanin kohhran hmeichhe inkhawm min rawn telpui dawn a" a tih chuan ka thaw hak mai.



Tuna kan pastor hian kum 3 dawn chu min bial ve tawh a, fa naupang te te pahnih, mipa leh hmeichhia an nei a, an fapa nung tha zet chu kan kohhranah chuan a chanchin hre lo kan awm lo a tih theih ang, a harh dan chu turu tak a ni tawp, pastor meuh pawhin a en liam tawp chang a awm thin.




Ka nu in chawhmeh siam a duhthawh deuh avangin Jaydena school bang pawh chu min pui turin ka nu'n a ti ve nghal a, zinga ka zawhna vang kha nge mawni, melh pawh min melh duh lovin ka biak hlauh hmel deuh hian a kal kual sek a, ka la zawt chhuak dawn khawp mai, a zep rei thei teuh lo.



"Nu, Lawmawma hian bialnu a nei ania" ka tih chuan chu phawk deuh hian min rawn en ve ve a, ka nu zawkin "Tu maw?" a tih hu laiin ka naua chuan rum deihin min melh leh tawh a,ngeiawm deuha melh let pahin "An school ami chu a ni ngei mai a" ka ti leh a, "I nei ve tak tak em ni Bawiha?" ka nu lah chuan a ti sek sek a, a nui pah bawk.



"In ninawm" tih pahin a pindan lamah a tlan chho ta daih a, ka nu'n min zawh chian leh takah chuan ka hriat chian bik loh thu chauh ka hrilh thung.
Bialnu neih kan phallo a ni lo a, lo nei pawh ni se kan hau hauh lo ang, mahse a lo nei ve a nih chuan eng emaw hrilh duh ka nei a, mipa leplerh tak ni lo bawk se ka duh.




Pastorte chu an rawn thleng hma viau a, an fapa kum 5 mi vel tur chu an rawn thlen hlim atang khan a la awm mai mai lo reng reng, tih tur leh khawih tur a hre lutuk chu ka nu pawhin a nuih tawp ringawt.




A u hmeichhia erawh a zia a zawih hmel ngang mai thung a, an rawn thlen tirh atangin a a nu bulah ngawt a tap thung.



Ka pa leh pastorte chu an ti ti malh malh a, ka nu te pawh naupang chungchang sawiin an tawng ve bawrh bawrh mai.


Bathroom atanga ka chhuak chiah chu mipa naupang tap ri kan hre nghal a, rang deuha choka lam kan pan chu kan thil hmuh vang chuan kan ding leh dat hlawm mai.




Kan filter atang chuan tui a lo dir zung zung a, a hnuai chhuatah sawp nuaia thuin an fapa tê kha a lo tap pur bawk a, a kekawrte chu a huh vek tawh.

Pan hnai vatin tui chu ka herh tawp a, a tap satliah emaw kan ti kha filter no chhungah a kut a lo titang hi a lo nia, kan no hman lah chu plastic a ni si a, a hip bet tlat a, ka pa in a beih ngial hnuan a la chhuak thei hram a, a tap hliam hliam chu ka khawngaih reuh tak tak.




Kan pastor nupui lah chuan "A na vak lo ang, a harh lutuk a buai lohna turan hian kan buai zing ania, hmanni ah pawh cooker chhungah a lu a titang a, kan buai nasa alawm" a ti a, kan vai chuan kan han nui leh rih.


Chaw ei naahte chuan an tui hawp chu a ngen tlat zel a, a nu leh pate'n khap an han tum ve viau na in an ti hleithei meuh lo chu a ni.



Ka pate chuan a duh duha awm tir mai mai turin an ti a, vawi khat antam hui hang a nu in a han hawp tir chu patling hawp ti ang mai hian a ri hruih a, "Apu tih dan" a la ti zui.




Chaw ei lai pawh sawi lovin ka pa meuh pawh a nui chhuak hawk hawk a, kan pastor nupui erawh a zah hmel ngang mai thung.




Thleng seng leh sil chu ka naua nen kan ti vek a, ka awm hi chuan a inthlahdah deuh thin nain zanin tlai chu mikhualte kan nei si a, dawhkan pawh aman a tifel vek.



Ka nu hoa injhawm tura an kal liam ta chu ka pa'n "Naupang sual ai chuan naupang harh enkawl hi a harsa daih zawk âwm asin, an ni chhung phei chu mi pangngai chunglam an ni si a, an zak ve fo dawn a nih kha" a ti zui ve vawng vawng mai.




Ka thleng sil zo pindana chhoh mai ka tum chu ka pa chuan min lo ko peng leh a, a bula ka thut ve rual chuan ka darah lo beng thak thakin "Engtikah nge maw Tu mawng te hi kan ben ve ang le" muang charh hian a han ti zui a, "Pa.. " ner nanga ka ti chu min lo enin,
"Hmeichhe tan pasl neih har lutuk hi a tha lo ania, kohhranah tlangval fel tak tak an tam a, I thianpa Michaela nen pawh.. " a tih leh lai chuan lo pawt chatin "Michaela ti ve ziah suh, a bulahte I lo sawi ringawt ang e, thiantha bak kan ni lo ka tih tawh kha" ka ti a, ka pa hi chu a heti leh tlat zel.




"In thawhpuite zingahte hian an awm lo em mawni le, nang lag hian I ngaihven loh hmel ang reng si a, tlangval fel leh innghahna tlak, kan kohhran mi ngeiah pawh hian an tam ania" a ti zui leh hram a, "Chuti ngawtin hmuh tur an awm bik lo alawm, I hmanhmawh leh lutuk a nih kha, a hunah chuan Pathianin min la pe ve mai ang" ka tih pawhin "Ngaihven ve deuh rawh" a ti leh hram tho a, thawhsan pah chuan "Khawmpui kal leh hmasak berah ka lo zawng ang" ka ti liam puat a, a phun zui nuah nuah pawh chu ka chhang let duh tawh lem lo.




Khumah mu in phone ka en a, Gracy thlalak min lo thawn chu ka hawng vat bawk.




"Dr. Ramkima'n thei min lo kensak teuh mai, I ta tur pawh a dah hrang thlap a, an sawi duh teh mai che u ania" a rawn ti a, a va han zia lo thin mai mai tak.




Ka thiannu nen chuan rei deuh kan inbia a, nizan lama an hun hman dante a sawi tih loh ah chuan doctor pa nena kan chanchin ngawt chu a sawi a, "Kan room ami te ho chuan a duh che anih kan ring vek tawh, I awm tih a hriat chuan a rawn kal ziah hi" a tih chuan "In ngai kawi laklawh mai mai a nih kha" ka lo ti mai a, rilru ah erawh a awm ve reng tho mai.





Chhun lama ka mut nasat em avangin ka muhil thei lawk lo va, ngaihtuahna lakpen tuma movie ka en ngial pawhin rilru ah kan doctor pa chu a awm reng ringawt a, min fiam nasat lutuk vang em mawni, hetiang tak hian ka la ngaihtuah zui ngai lo.



Ka pasal ni tura ka han zeldin kualte chuan amahah han iaiawm leh duh lohna tur chhan vak ka hre lo a, mahse buaina lian tak ka nei thung.


Ka pa hian kan kohhran mi ni lo chu pasal atan neih a remti ngai dawn lova, keipawhin kan kohhran mi leh sa ngei chu neih ka duh ve bawk e.
Kohhran hrang tam tak zingah kan kohhran hi chuan dem leh fiam kan tawk nasa bik a, naupan laia thianten min chhaih changte khan ka rilru a va han na thin tak.




Kan kohhran kha ka zahpui a, ka nu leh pate bulah pawh zawhna ka ngah viau thin.

Mahse ka pa chuan heti hian min hrilh a, "Kohhran hi Krista din a ni a, eng kohhran mah hi hniam leh sang a awm chuang lo, Isua ringtute vek kan ni a, kan tum ber chu vanram kai a ni, kohhran hrang hrang ni mah ila kan theihtawk theuhah chanchintha kan hrilh a, chu chu chunglam hmuhah chuan a mawi em em a ni" tiin.




Khata tang khan eng kohhran mi pawh ni ila Pathian fa ka nihna a bo lova, min thlahtute atanga kan kohhran leh thurin lo pawm ve mai chu ka tihtur niin ka hre ta a, ka vui lova, ka zak tawh bawk hek lo.

Khawi kohhran mah demin ka sawisel ngai lova, midang nundan hi ka va buaipui hman tehchiam lo bawk.




Dar 11 vela ka message dawn chu number hlang atangin a ni a, a thlalak leh hming engmah hmuh tur a awm lo.


"Huaisen lutuk suh aw, nurse hmeltha" tihte mai hi a ni a, Tu hnen atanga ka dawn nge tih chu rindan pawh ka nei thiam lo.

Jaydena thianten min rawn bawl kual an tum ni turah ka ngai mai a, chhang let lova thildang ka tihsan leh chu message dang rawn thlen belh lehin "Kan inhmuh leh hunah chuan buaina a awm tawh loh ka beisei" a rawn ti leh a, "Tunge I nih?" tia ka zawt let chu "I bialpa tur" a rawn ti hem mai.



Ka ner nawk a, tupawh chu lo ni se la hetianga min chhai thluk theih hi a in ring reng reng em mawni, kum 30 ral kai tawh tan chuan a ho tham mah mah.





Cont...
Ads click kha min ngaihpawimawhsak la, I ngaihdante lo comment ve rawh aw☺
Show post links
Top