LOVE HURTS BY Tochhong Ruata

[ngaia]

LOVE HURTS.

Love is like a flame, it burns you when it's hot

Love hurts, Ooo-oo love hurts

- Boudleaux Bryant ( February 13, 1920 – June 25, 1987).....

CHAPTER ONE.

"Mimi hei hi ka u a nih hi, ka Pu Khama kha i hria em? khami fapa kha"
"a ni maw? ka hmuh hnu i ang e?" a nui hawk hawk a, "Midang chu khawiah nge?" Matei ( ka nau) chuan a ti hlut a, "anlo thleng tep tawh ang ,Rd-a an nghak a"Mimii a tih chuan a lo ti vat a, "ninawm nghah ngai ziah mai, Ridikluliana zet hi chu?" Matei chuan ti a an nui dun hawk hawk a, Kei chu Bike ah ngawi rengin ka thu a, an chezai chu ka lo thlir reng thung a.

Ka Ni fanu neihchhun nen hian kum 7 dawnin kan inthlau nangin kan Inkawmngeih vei phian a, ka chawlh hmang Aizawla ka chawlh dek tawh hi chuan kan inzui deuh chawt thin a, B.A zir mek a ni a, thian kawm a thiam in thiantha pawh a nei nual nghe nghe. Tunah pawh a thiante nen '10 SPOT GARDEN' ah Picnic turin kal an tum a, kei ka awmve takah chuan kalpui tura min ngen tlat vangin ka kalpui dawn reng bawk a ni. A thiante ho hi keipawn ka hre ve nual hlawm a, Mahse tuna kan bula awm erawh hi chu ka la hmelhriat ngai hauhlo a, Ka vawikhat hmuhna a ni nangin ka ngainat zawng tak a ni reuh thung.

Mimii chu vun ngo var sar mai, sam sei lutuklo, a dar thleng awrh tur dum hlap aia dumlo deuh, ngil sang mai a ni a, Khabe dawh lek lek mahse duhawm tawk leka dawh an tih ang hi ni berin ka hria. Mitmeng buang lam lek lek meng mawi zet mai a ni reuh a, a ha leh hmui inchawih dan chu sawiin a siak lo zawk.. Mizo nula vangtlang tiat vel ve tho, pian thiam zet mai a ni reuh a, a tawk vel chiah a khal a ni nghe nghe. A tawng duh siam siam hle tih minute 3 vel a bula ka awm chhung lek pawn ka hre nghal, a ti ti pah chuan min rawn en leh zak zak thin a, kei lah Sunglass bunin ka lo thu vung zel si a a hawi san rang thei hle. Minute 5 vel zet kan awm hnuah an thian dangte chu an rawn thleng ta tak tak a, Kan Innghahkhawmna kawn atang chuan phur takin 10 Spot Garden lam pan chuan kan tlan ta dam dam a. Bike 2, Scooty 2 leh Bolero var pakhat lirthei kan inzui a, Keini chu a hmasa berah kan tlan a, Matei ka phur a, kan hnung chiah ah chuan Mimii leh Zopuia bike in an inphur a, kan hnung ah Scooty 2 in mipa leh hmeichhe pair khat ve ve an rawn inzui ve bawk a, Bolero chhung ah chuan Mipa 2 leh Hmeichhe 3 an chuang ve bawk a ni. Kan vaiin Mipa 6 leh hmeichhia 7 kan ni tihna a nih chu. Kan Picnic na tir hmun kan thleng a, Keimahni chauhlo pawh midang an lo awm laih laih tawh hlawm a, Thenkhat chu family anga Picnic te an nih hmel hlawm, Kan awmna tur booked sa 'THE EDEN" an tih lam pan chuan kan bungraw ken nen kan inzawn liam ve par par hlawm a, Lo kalhmasa tawhte chu an bengchheng tawh hlawm hle, Nuam an ti tlang hle tawh hlawm.

'10 Spot Garden' an tih mai hi, Aizawl kawtchhuah lam a awm a ni a , Aizawl atangin KM 20 chuang zeta hla a ni thung. Kawng a nuamin a zau tha em em a, A panna kawng tur ngawr ngawr a siam a nih bawk vangin Main road atang kalpen chinah phei chuan nuam tak a ni ringawt mai a ni. He huan hi Mimal ram a ni a, Picnic spot atan a buatsaih a ni a, a hming an vuah chhan ang ngei hian he Picnic Spot ah hian huan nalh tak tak 10 zet a awm a, Chung huan hrang hrangte chu man chawia picnic theihna tura siam vek an ni. Blossom Garden, Eden Garden, A Cascade ( Tuikhawhthla awmna hmun), The Wood Cabin, The Beach, Ice Age Garden, Water World ( Tui hmanga intih hlimna hrang hrang, tawlpanal etc awmna hmun), Spring Garden leh The Palace tih te an ni hlawm. Heng huan hrang hrangte hi hmun zau hek hawk tak an ni vek a, an hming ang takin an cheibawl vek bawk. He hmuna picnic hi awlai lo tak a ni reng bawk a, Huan in book thuah theihloh hrim hrim a ni, Main Gate ah kan lut a, Parking Zone an siamah motor etc kan dah vek a, Chutah Reception Counter ah kan in Check In leh te te a, chumi hnuah kan huan lo biakfel sa tawh lam pan chuan kan kal ta chauh thin a ni. Reception Counter kal pelh hnu chiah ah Bazarpui an tih mai Dawr lian tak mai an hawng a, Kan mamawh tur ang Khawpui atanga lei lawk ngailo turin an lo kawl deuh vek ta thin a. Zu atanga Sweet hiar thlengin a kim deuh vek ani ber. Naupang tan a nuam a, nula tlangval tan a nuam bawk a, chhungkaw tan a nuam hlei hlei a ni. Kan awmna tur hmun hi Eden Garden a ni a, Thing nalh leh mawi tak tak tawi leih lawih an awm deuh thluah a, phul hmun a nih bakah kawrte tui fim a luang dem dem a, Li thuk leh lian lutuk lemlo, Mi 10 rual zet chen na tham a awm a, chu hmun timawi tur chuan Sazuk nupa, Varak leh Vatawk etc an awm ve bawk. An ngam em em a, Sava dang pawh an tla sap sap bawk a, Ei tur pek phal an nih rualin an tana pawi pek erawh phal an nilo thung. Ei leh in buatsaih duh tan buatsaih theihna tur In liam lutuk lo, Mi 20 vel thut khawm theihna tur dawhkan leh thuthleng an dah a, Choka lian ve tawktak a awm bawk a, Mahni eiin Insiam duh tan a insiam theih a, duhlo tan eisiam rawih tur an nei tel bawk nghe nghe. He hmun hi a tlangpuiin nula tlangval thian ho bikin an hmang nasa bik hle.

Kan Inbuatsaih nak nak a, Thenkhat tui cheng tawk an awm a, țthenkhat sazuk thlalakpui, Varak leh vatawk thau mam nalh zet zet mai chaw lo pe tawk an awm bawk a, Mahni rik rik in kan ri nak nak hlawm a, Kei chu ei siam in ka buai a, Matei thiante mi zinga mi 4 bak chu ka hmelhriat sa tawh vek an nih avangin ka inthlahrung lutuk lemlo.. Ka tel dawn tih an hriatsa avangin Kelsa an order nghe nghe, ka kelsa siam tui an ti tlang hlawm hle a, Chuvang chuan ei siamsak tura an hruai ka ni deuhber zawk. Ka eisiam chu minpui turin ka nau Matei leh a thianpa chu an awm ve bawk a, an niin Chaw an lo chhum thung a, kan buai ve nak nak hle.

" Hey, Nangni 2 kha ei siam turin em ni hetah in kal, an lam an lam tawh che u a nia, Khawi keiman ka lo pui ang?" Mimii chuan nui hak hak pah chuan a thiante chu a rawn fiam a, "keini chhungkua chu hetiang lam hi kan tuina zawng a nia" Matei chuan a lo ti khauh a, "I van zamlo ve chiang tak" Mimi chuan a ti a kan nui hak hak hlawm a. Ka bulah chuan a rawn phei a, " I u chu eisiam a thiam hmel tak tak hle mai...avan rimtui em em" a ti ham ham a, Dawhkan kil chuan a thu ve sauh sauh a, a theih ang ang ti chuan minpui ve ta bawrh bawrh a. Midang chu an awmna hmun theuhah an ri tengtung hlawm a. "Kan bawl zawh hunah ei siam chu midang ka tih tir ve tawh ang" Mimi chuan a ti nang nang a, "oh.. ka bula awm nuam i ti vak nange?" inthiamlo deuh chuan ka lo ti vat a, "aih chutiang lam a nilo, An phakar hlawm em a" nui chung chuan a ti a, Bai tur thlai a buatsaih pah mawlh mawlh bawk a "I rawn tive dek dek a, midang phut nghal ngawt suh, Lalrinsiam i zak lawmni?" Puia Matei thianpa chuan a lo ti hlak a, "awiii Nangkha ngawi hmaks rawh, Ka Thiani hi awmlo se hetah i awmlo tawp ang" a lo ti let ve khauh a... Kan ri ham ham reng a, An ti ti a, an in kap pah reng bawk a, A zualpui kan zawh fel deuh hnuah eisiam vil pah a card den an rawt a, Kan thiante dang pawh an mahni tui tuiin an tui a, khawnge an awm kan hrelo, an reh deuh thap hlawm a... Mimii nen kan tang a, Matei leh Puia an tang a, Kan indawl chuh ta a. Kan fet tlangin ka hlim phian mai, Rs 50 /- kan board a, a chaklo zawk zawk in an chawi zel thin. ka nau chu ti ngai vaklo a ni bawk a, kan man deuh reng nghe nghe ka tanpui chuan nuam a tiin a hlim kher mai, Pawisa chu a keng a ka nau hmai bulah te a va zap thaw vel a, Kan nui tluk tluk hlawm a. Chutia kan lo rik dar dar lai chuan Zova chuan Puia leh Matei chu a rawn ko va, Mimi nen cchauh chuan kan thu dun ta ran a, Tihtur awm tawh heklo ka tho lawka ka bag atang chuan Whisky Bottle pakhat ka va phawrh a, "Hei hi i duh ve nge, Beer i duh zawk" "Aih.. Beer bak ka ti ngailo, Beer chu ka lo dawm ve ang chu" a lo ti vat a, Beer chu ka hawn saka kan 2 chuan kan thiante chetla vel thlir chung chuan kan lem dun ta a.

" I hming pawh ka ka hrelo, engtin nge ka koh dawn che a? inzawt phawng mai ang?"
" Saikapa" " ka awih lo e a" " enge i awihlohna, Saikaplianthanga ka ni maithei a sin" " i nilo chiang lutuk" a nui hawk hawk a, " Tak tak ah Unionthanga ka ni e" ka ti ta nge nge a... " tak tak maw? ava mak teh daih ve mawle, Enge i hming put chhan ni a?" a ti hehaw a, " Engdang lah nilo e, Ka pu hi Union ruh lutuk a ni a, Chumi vanga phuah an ni awm e" ka ti ve mai a, "Mak i va ti awmve?" ka ti a, "aih tilo e, Mahse I inhmehlo tawp" a ti a, a nui sen sen a. "Ka inhmeh ber a lawm le, nang vele" ka ti a, "Oh nia, Zosangzuali ka ni e" ati veta nge nge a "Mimi an ti bawk si che a?" ka ti leh kher a, "Nia.. ka u chiah hi ka pian hlim hian Kum 2 lek a la ni a, ka hming a tel miahlo 'Mimi' tiin min ko tlat a ni awm e, Chuvang mai mai chu mawle, mi hian ka sap hming emaw an ti chawk thin reng a ni." a ti a nui pah var var bawk a, Boruak a nuamin thlifim a thaw heuh cheuh reng bawk a, Tudang kan ngaihsak hlawm em em lem lo. Midangte pawh an rawn inlar ve tan nak nak tawh a, "Hey U Tete leh Lalmimi hi an lo ck chiang khawp"an rawn ti thlazen lehnghal, kan lo 'um e' liam vel mai mai a, Midang an rawn thlen khawm takah chuan Mimi pawh midangte nen an ti ti ho ta rih a. Kei ka eisiam ka peih fel tawh avangin Whisky bottle chu kengin Dil ah inchiah dai turin ka chhuak veta thung a.

Tuiah ka cheng vel chu min rawn fiam zui sap sap hlawm reng bawk a, Bladder pakhat lo awmah chuan ka thu a, Zu no ka dawm pah bawk a, Ka eirawngbawlna lum ti lutuk pawh a zia sawng sawng a, " Hey, Saikap tinge min sawm veloh" Mimi chuan a rawn ti a, ka hnung chhawn lama awm a nih vangin ka hmulo a lo ni a, ka inher a, ka hnung lamah chuan Mimii chu nui var var chung hian a lo ding a, Boxer sahthlau pawdal raih a ha a, Tawnzau vutbuak rawng a ha thung a, a lian lemlo nangin a nalh tawk tiuteu reuh hle, a awm zawna naute chawbawm chu a lian lemlo nangin a nalhtawk chauhin a bial pawng ve thar bawk a. A thuamhnaw inbel leh a vun rawng var paw phak mai chu a inrem thlep thlawp hle baawk. A sam chu a tukhumah a kilh tawm kual vel mai mai a, a hnawk deuh niaih nangin a hmelchu a ti langchiang hle thung. Chutia ka tumloh daih dana ka hmuh takah chuan ka lu a kai ve deuh tawh vang pawh ni chuanglovin a hmelthatna chu ka hmu chhuak thar ta tlat mai le. Ka en danah nuamlo a ti deuh nge nur nang chung hian min en a, " enge khatia min en reng, i mit chawngkawr kha lasawnvat rawh, min ti lai dawn a lawm le" a ti vei khar khar a, "khawi bladder pakhat kha minlo pe teh, khami tello chuan ka hleuh thiam hauhlo a nia" a ti zawm zat a. "Tuichen thiam lo chu a thalo, thih hnuah ruh a mawih duh" ti chungin bladder chu a lamah ka nawr phei sak a, A rawn dai lut a, Baldder nen chuan ka awmna lam pan chuan a rawn hleuh phei a. "Tuichen min zirtir ve teh, ka thiante khian min nuihsawh bik ziah lehnghal" a ti bai bai a, "Nia, kan la inzirtir dawn nia, Tution fee erawh a sang viau thung" tiin ka lo fiam let a, a nui hawk hawk a, "kan pek ve ngei chu a ngai dawn a ni mai a, Tak tak ah ka uang miahlo a nia, ka thiam ve chak tak tak a ni.... awii Roluliana khian thla min rawn lak vel a nih chu" a ti nawk nawk a,A hma ang bawkin a ti ti ka ngaithla leh dawn niin ka hria. "Hawh U Saikap tui chen chu min zirtir teh" a ti ta sek a, Ka zu in chu ka thawkkhat pawp a, "I duh athu a ni mai a lawm" tiin Ka chhuk a, "tikhan motorke kha dawm la, i nawr kal ang a, i ke i chhek dawn nia" tiin a thil dawm chu ka vawn sak a, "awle" a ti awlsam et a, Tichuan kan inzirtir chho tan ta a, Midang chuan min rawn fiam nak nak hlawm a, Engahmah ka ngai duh lemlo, Motorke chu ka nawr sawn tial tial a, a dul nep thep ah ah chuan ka chawi pah bawk a, "tikhan i kut pakhat zawk kha tui chhungah khan hai rawh" ka ti a, a tive zel a, "min thlah suh aw" a ti a, Motor ke chu ka laksak a, a inhai ri barh barh a, a dul a ka dawmna chu ka thlah hret hret bawk a, "I thiante lah chuan min rawn en thap mai si a, ka kut hi an hmu lo ngei ang a, i hleuh thiam tawh tak tak emaw an ti ngei ang" nui chungin ka ti a, a nui hak a, "Hetiang hi a ni mai a, chu zawng chu a ni" tiin ka be sawm zel a, ka kut dawmna chu ka lasawn tih reng a hrelo, a hleuh kual deuh pap pap reng a, a bulah chuan ka zui ve zel bawk a, "I kut i la sawn elaw" tih leh Pil burh a rual nghal a, a thuklo lai kan thleng tawh bawk nen a ding chhuak ta hlawl a, thaw hlawp hlawp chung chuan "i van sual tak min thlah a nih kha, min thlah suh ka tih ka tih kha" nui chung chuan a ti a, a thiante ho chu an lo nui uar uar hlawm a, "Reilote bak ka dawmlo che, nangmahin a lawm i hleuh le, i thiam lutuk tawh" ka ti awlsam et a, " tak tak maw?" a ti hehaw a, "hmmm" ka ti nghut a.. "Kan tileh chhin" tih leh tuia bawh phei chu a rual a, a invai buan buan a, "aaaaa ka hleuh...birh birh" a ti hman chauh a, a pil bawrh a, Kan nui dun ta kiah kiah a.

"Nangni 2 kha in phur haw ve tawh ang che u, Unau inphurh kan awih tawhlo ang" Zova chuan a ti a, min fiam nak nak hlawm a, Enge chu ka hrethiam chiahlo mahse Mimi awmdan chu a danglam deuh tlat nia hriatna ka nei deuh a, Mahse engmah hrelo ang maiin ka awm mai mai thung. Tichuan tumah kalfal bik awm tawhloin Kan inkawm khawm a, Kan ti ti a, athen an zai a, a then an inchei mawlh mawlh bawk a, mipa ho chuan no kan dawm far thung. khua a tlailam tak zel avang leh kan huntiam chhung a zawh tawh dawn avangin Chaw kan ei a, haw turin kan inbuatsaih ta a. An tifiam mai mai emaw ka ti a, Mahse an lo ti mai mailo nasa niin Ka bulah Mimi chu an chuan luih tir ta tlat a, Tichuan kan inzui haw leh ta thliah thliah a. Aizawl kan luh meuh chuan zan dar 8 a ri hnai thuak tawh a, Kan chhuak tlai chu thuhran kan ding ngunin kan chawl zing hle a, Kan Chawlh deuh hlek tawh chuan Tape playin an lam a ni deuh zel thin. Chungah te chuan amah Mimii bawk nuam ti hmel ber a ni leh a, a lam deuh thei ziah a, an nuih tlawr tlawr hlawm a, Ka lo chik ru reng a, Hmeichhe hlim thei tak, mi pawisawi ngailo, Thian ngaina tak niin ka hria, A ruk tak chuan kei ngei pawn ka ngainaru deuh riau tawh a ni. An In kan thleng a "Lo lenglut la, Thingpui ka lum dawn che nia" a ti a, ka hmanhmawh deuh thu in ka hnial a, "anih chuan kan la inkawm leh dawn nia" tiin kan In mangtha ta a. Ka haw kawngah te chuan Mimii hlim sarak vel leh fiamthu thawh vel chu ka mitthlaah a rawn lang nawn zut zut a, Keimah chuan ka kiai suk suk a, Chik taka minlo thlirtu awmse chuan 'hepa hi a kim zanlo em ni dawn le, Bike khalh chungin a khi vur vur mai si a" minti maithei a ni.

In ka thlen chuan Matei chu a lo inbual zo chiah a, Kei pawh engmah sawi lemlo chuan ka mutna room lam ka pan nghal a, Jonathan-a kan nau Kum 12 mi chuan room ah Games a lo khel niap niap a, "Hey, Thianpa i va buai awmve a?" ka ti a, a ngawi reng a, Min ngainat thin tehlul nen diklo a awm em ni aw ka ti a, "i score sang vaklo a ni maw," tiin a bulah ka thu a, ka rin ang ngeiin 5-0 laiin a lo chaklo leh pek a, "hmm khawi kan chhawk ang che, a goal hnem ngawt ang" tiin a pad chu ka laksak a.. Minute 10 a liam leh meuh chuan kan nui dun lehin kan Yes ring leh ta viau a, Ka Inbual hun tur tlai thak khawpin kan inkhel dun ta nge nge a... "Awle tikhan ka inbual san dawn che a nia" tiin ka luhsan ta rih a. Jonathana hian min ngaisang em em a, an in a ka thlen tawh reng rengin ka bulah a awm chawt a, ka bulmah a riak bawk a, nuam a ti thin hle, Keiin ka lo chhawnchhaih peih bawk nen, kan in ngaina dun hle a ni. Ka inbual zo ka chhuak chu Kekawrte nen chauh ka chhuak ngawt pek a, Jonathana chauh awm tura ka ngaih laiin Mimii chu a lo thu ve reng a, "Hey, tinge?" ka ti a, ka towel bah lai chu ka veng nghal sawk sawk a, " Enge, enge chu?" a lo ti awlsam et a, "Enge i rawn tih dawn a?" ka ti kual ta vel mai mai a, " Ka chhungte Dinthar vengah Mitthi in ah an kal vek a, Ka nau nen chiah kan awm dawn si a, Matei min riahpui turin ka rawn sawm mawle" a ti a, Min ngaihsak lo hmel zet chuan Jonathana games khel lai chu a thlirpui dauh dauh a.. Ka inthlak sawk sawk a, an bulah chuan ka va ding hnai ve a, Mimi chuan minlo en kar a, "i sweetshirt hma a inziak chu a nalh reuh kha" minlo ti a, ka in en vat a, a hmaah chuan 'The Union' tih hi awmze nei deuhin a lo inziak a, "enge i sawi awmzia?" ka ti hram a, "aw i hming a tel kha mawle" a ti a, a nui hak hak a... "Mimi kan phei hman tawh e" Matei chuan a rawn tih takah chuan a tho nalh a, " Rawn leng phei ve la, Card den ka lo zirtir ang che" tiin min nawk hraih chuan a kalsawn ta a.

"U Tete, Mimii nen khan In inngaizawng em ni?" Jonnathan chuan a rawn ti khauh a, "Teuhlo, tunge ti?" ka ti vat a, " Ka hrelo, I inbual hlan khan 'I U Tetea khawnge?, Bial nu a nei em?' tihte min zawt sek a, chuvang chu mawle" a ti a, " chutiang inzawh chu in ngaihzawnna chhan tur a ni hleinem" ka ti a, Mahse ka rilru tak chuan ka ngaihzawng neih leh neihloh a hriat duhchhan ka hre lo. "Ka hre biklo, a ngah mai i lo tilo nia" ka ti a, kan nui dun hak hak a, Khumah ka tlu zal a, Ka Phone ka la chhuak a, Ka Bial nu ve deuh, keiin ka ngaihzawn em em lemloh mahse min duh em emtu ni si chu ka be ta a.. Hei hi Mimii nen kan inhmelhriat tanna a ni ta a ni.

*** KAN WEBSITE A FAKNA LAM THIL MILEM LANG THIN I LO HMET ZEUH HIAN KAN WEBSITE ENKAWLNA TUR LEH WRITER TE HLAWH MIN TUMSAK ZEL TIH I HRE DAWN NIA, KAN LAWM E***